Sa Dede Rau Qai Sota Tale!

Linda: Gauna au yabaki 12 kina, e tukuna vei au o tinaqu ni tiko e dua na taciqu yalewa, ia sa lai susugi ena dua tale na vuvale. Au dau veinanuyaka ke sucu didivara tale ga me vakataki au. Au sega sara ga ni kila e dua na ka me baleti koya.

Sally: Au sega tu ni kila niu gonesusu. E dau mokulaki au na marama a susugi au, e vakacakacakataki au tale ga me vaka na bobula. Au sa sucu didivara mada, e vaka me ikuri tale ni icolacola vei au na noqu rarawa kei na galili. Au qai vuli iVolatabu kei ira na iVakadinadina i Jiova. Ni kila qori na marama e susugi au, e mokulaki au ena beleti qai veisautaka na loka ni katuba meu toka vakadua kina e vale. Niu yabaki 20, au biubiu mai vale meu lai tiko kei ira na iVakadinadina. Au sa qai papitaiso ena 2012.

Linda: Au tekivu vuli iVolatabu kei ira na iVakadinadina i Jiova niu yabaki 20. Au dau tiko tale ga ena soqo ni veiwasewase e Jakarta, e vakadewataki kina na porokaramu vei keimami na didivara. Au sotavi ira e keri e levu tale na didivara, wili kina o Sally dua na goneyalewa iVakadinadina mai North Sumatra. Au vakila ni keirau veivolekati sara kei Sally, ia au sega ni taura rawa na vuna.

Sally: Keirau veitokani vinaka sara kei Linda. Au nanuma ni tautauvata na keirau irairai, ia au sega ni vakasamataka sara vakalevu.

Linda: Ni bera niu papitaiso ena Okosita 2012, dua na ka noqu vinakata me keirau sota kei taciqu. Au mani masuti Jiova: “Kerekere, meu sotavi taciqu mada ga meu rawa ni tukuni kemuni vua.” Sega ni dede, sa tukuna yani e dua vei tinaqu ni kila na vanua e tiko kina o taciqu. Qori sara ga na imatai ni ikalawa ina neirau sota kei Sally.

Sally: Ni tukuna vei au o Linda ni keirau veitacini, au vuka sara i Jakarta me keirau lai sota. Niu sobu ena raraniwaqavuka, eratou sa veitavaki tu mai o Linda, rau noqu itubutubu, kei na tuakaqu yalewa. Au ninini tale ena levu ni noqu luluvu. Keitou regu qai veimokomoko, e dede duadua nona mokoti au o tinaqu. Keitou veitagicaki kece. Nirau kere veivosoti na noqu itubutubu ena nodrau soli au meu lai susu ena dua tale na vuvale, keitou veimokomoko qai veitagicaki tale.

Linda: E duidui na neirau itovo ni duidui na neirau isususu. Ia dua na ka na neirau veilomani.

Sally: Keirau sa tiko vata ena gauna qo kei Linda, keirau lewe tale ga ni ivavakoso vagalu e Jakarta.

Linda: E 20 vakacaca na yabaki na neirau sega tu ni veiraici kei Sally. Keirau vakavinavinaka vei Jiova ni sa dede keirau qai sota tale!