Tauvimate Bibi

“Na gauna au kila kina ni tauvi au na kenisa ni yatevuso kei na davuibuco, au sa vakadeitaka ga niu na mate. Ia niu laurai oti vakavuniwai, au veinanuyaka: ‘Au sega ni namaka qo, ia au na qara na sala meu vosota kina.’”—Linda, yabaki 71.

“Dua na mate mosimosi e tauvi au, lai momosi kina na nave ni mataqu ena yasana imawi. Na kena mosi au dau lomabibi sara ga ena so na gauna. Levu na gauna au galili, au dau via vakamatei au tale ga.”—Elise, yabaki 49.

Dabe toka ena idabedabe qiqi e dua na tauvimate, ratou qai wavoliti koya na wekana voleka

O NA vakila tale ga na rarawa ke o sa sotava oti na ituvaki qori, se tauvimate bibi e dua na wekamu voleka. Ena leqataki o koya e tauvimate kei ira na veiqaravi. E rawa ni vakavu lomaocaoca tale ga na rere kei na lomaleqataki ni so na ka me vaka na laurai vakavuniwai, qarai se kena saumi, kei na lako vakaca ni wainimate ina yago. E rawa sara ga ni vakavuna na veilecayaki ni vakasama ni dua e tauvimate bibi.

Eda na vakacegui vakacava? E levu era vakila na vakacegu nira masu vua na Kalou, ra qai wilika na tikinivolatabu e veivakacegui. E vukei ira tale ga na loloma, kei na veitokoni ni nodra vuvale vaka kina o ira na itokani.

SALA ERA VOSOTA KINA ESO

E kaya o Robert e yabaki 58: “Ena vukei iko nomu vakabauta na Kalou mo vosota na kemu mate. Masuti koya, talaucaka vua na lomamu, qai kerea na yalona tabu. Kerea me vukei iko me donu tiko ga nomu rai, mo vu ni veivakayaloqaqataki ina nomu vuvale, mo vosota tale ga na kemu ituvaki.”

E tomana: “E dau yaga sara ga nodra veivuke na lewenivuvale. Rawa ni dua se le rua e qiriti au mai e veisiga me rau taroga seu vakacava tiko. Era vakayaloqaqataki au tale ga noqu itokani ena so tale na vanua. E veivakacegui dina, e vukei au tale ga meu kua ni soro.”

Ke o sikova e dua nomu itokani e tauvimate, vakasamataka na ka e kaya o Linda: “E vinakata o koya me bula vinaka tale, ena rairai votivoti vua ke veitalanoataki na kena mate. De vinaka mo drau veitalanoataka ga na ka drau dau taleitaka.”

Eda nuidei ni na marautaki tale na bula ke da vosota na tauvimate bibi, vakaukauataki keda na Kalou, veivakacegui na iVolatabu, kei na nodra veitokoni vakayalololoma na lewenivuvale vaka kina o ira na itokani.

Tikinivolatabu e Veivakacegui

Nuitaka na Kalou.

“Au vakatarogi Jiova, e qai rogoci au o koya. E vakabulai au mai na ka kece au rerevaka. E kaci o koya sa vakaloloma, qai rogoca o Jiova.”—Same 34:4, 6.

E kaya o Linda sa cavuti oti mai: “Au sega ni dau masulaka meu bula vinaka tale. Au na masulaka ga meu kaukaua, meu vosota na kequ mate.’”

Me vakaukauataki iko na Vosa ni Kalou.

“Ena sega ni kaya e dua na lewenivanua: ‘Au tauvimate.’”—Aisea 33:24.

Vakasamataka vakatitobu na yalayala ni Kalou me baleta na veigauna se bera mai, ena vukei iko qori mo vosota.

Qara nodra veitokoni nomu lewenivuvale kei ira na itokani.

“Na itokani dina e loloma ena veigauna, e tacida ena gauna ni rarawa.”—Vosa Vakaibalebale 17:17.

E kaya o Elise sa cavuti oti mai: “Kua ni tu duadua ga. Qara nodra veivuke nomu itokani. So na gauna o na rairai galili, o nanuma tale ga ni sega ni rogoci iko na Kalou. Ia kua sara ni vakayawaki iko.”