Warwick, Niu Yoka: iTikotiko Liu
iTukutuku ni Vunau ena Yabaki sa Oti
NI TOROSOBU tiko ga na ituvaki ena vuravura i Setani, era gumatua tiko ga na tamata yalodina i Jiova ena nodra “vakaitavi vakalevu ena cakacaka ni Turaga.” (1 Kor. 15:58) Eso na irogo eda vakarau raica qo e vakaraitaka nodra “nuitaki Jiova . . . cakava na ka vinaka . . . , qai cakacaka ena yalodina” na iVakadinadina i Jiova e veiyasa i vuravura.—Same 37:3.
Tokitaki na iTikotiko Liu kei na Valenivolavola
A oti ena imatai ni Feperueri, 2016, na cakacaka a vakayacori tiko e Wallkill, Niu Yoka. E tokitaki rawa kina na Komiti ni Valenivolavola ni Tabana e Merika, na Tabana ni Cakacaka, kei na so tale na tabana e qarava na valenivolavola qori. Ni vakarau cava na tara ni itikotiko liu e Warwick, era veivuke ena tokitoki na lewenivuvale e Peceli mai Brooklyn, Niu Yoka.
Ena dola na itikotiko liu ena Moniti na ika3 ni Epereli, 2017, sa rawa tale ga na sarasara ni oti qori. E va na vanua ni sarasara, e tolu ena sega ni gadrevi kina e dua me veivakasarasarataki.
Dua na vanua ni sarasara e vakatokai “The Bible and the Divine Name.” E vakaraitaki tu e keri eso na iVolatabu kunekuneidredre, kei na ivakamacala ni kena maroroi vinaka na yaca ni Kalou ena iVolatabu.
Na ikarua ni vanua ni sarasara e vakatokai “A People for Jehovah’s Name.” E tu kina na kedra ivolatukutuku na iVakadinadina i Jiova, kei na sala e dusimaki, vakavulici qai liutaki ira kina vakamaqosa nona tamata o Jiova mera vakayacora na nona inaki.
Na ikatolu ni vanua ni sarasara e vakatokai na “World Headquarters—Faith in Action.” E vakamacalataki ena vanua ni sarasara qo na nodratou cakacaka na komiti ni iLawalawa Dauvakatulewa kei na sala era vukei kina na tamata i Jiova mera muria na veidusimaki ni iVolatabu me baleta na soqoni, veivakatisaipelitaki, vakayagataki ni kakana vakayalo, kei na kena vakaraitaki na loloma.
Na tolu na vanua ni sarasara qori ena sega ni gadrevi kina e dua na dauveivakasarasarataki, qai dola na sarasara mai na Moniti ina Vakaraubuka, mai na 8 ena mataka ina 4 ena yakavi. Ena tu vakarau tale ga e dua me vakasarasarataki ira na vulagi ena so tale na tabana e Peceli, wili kina na lomanibai. E 20 ga na miniti na sarasara qori, qai dola mai na Moniti ina Vakaraubuka, mai na 8 na kaloko ena mataka ina 11 na kaloko, kei na 1 ina 4 ena yakavi.
Ke o lalawataka tiko mo lai sarasara, kerekere rai ena jw.org ena BALETI KEIMAMI > VALENIVOLAVOLA & SARASARA> Merika.