Macala ni Bose Vakayabaki

Laurai na Duavata Qai Totoka na iNakinaki

E DAU marautaki na bose kece vakayabaki ni Watch Tower Bible and Tract Society of Pennsylvania. E dina tale ga qori me baleta na ika127 ni bose vakayabaki ena 1 Okotova, 2011. O ira na sureti mai na veiyasa i vuravura era soqoni vata ena nodra Assembly Hall na iVakadinadina i Jiova e Jersey City, New Jersey, e Merika.

Era mamarau o ira na tiko ena soqo qori, qai kidavaki ira o Gerrit Lösch e lewe ni iLawalawa Dauvakatulewa. A tukuna vei ira na vulagi era gole mai na rauta na 85 na vanua ni duatani duadua na duavata eda marautaka tiko e veiyasa i vuravura. E vakatakilakilataki keda na duavata qori, qai lagiti kina o Jiova. A usutu sara ga ni bose vakayabaki na duavata.

IROGO MARAUTAKI MAI MEXICO

Na imatai ni iwase ni porokaramu e ivakaraitaki ni noda duavata na tamata i Jiova. O Baltasar Perla a vakataroga e tolu na nona itokani ena Peceli mai Mexico ena nodratou cokovata kei na valenivolavola ni tabana mai Mexico e ono na valenivolavola ni tabana mai Sauca Amerika. Na ka e yaco qori era mai lewe kina ni vuvale ni Peceli e Mexico na duikaikai e duidui na nodra itovo vakavanua. Nira cavutu mai na duidui vanua na mataveitacini, e rawa kina mera veivakayaloqaqataki. E vaka ga e bokoca na Kalou na kedra iyalayala na veivanua.

Dua na ka dredre e sotavi ena nodratou cokovata na vica na valenivolavola ni tabana qori, oya mera vukei na dautukutuku mera kua ni nanuma ni yawaki ira na isoqosoqo i Jiova baleta sa sega ni dua na nodra valenivolavola ni tabana. Qori na vuna e vakarautaki kina ena ivavakoso kece e dua na sala ni veitaratara ena e-mail e taqomaki sara vakavinaka, e rawa kina vei ira mada ga na tu yawa mera veitaratara vakadodonu ina valenivolavola ni tabana.

IROGO MAI JAPANI

A vakamacalataka o James Linton mai na valenivolavola ni tabana e Japani na nodra vakaleqai na mataveitacini ena uneune kei na ualoka ena Maji 2011. E levu na wekadra na mataveitacini era mate, qai vakaleqai na veika era taukena. Era veivakaicilitaki na iVakadinadina era sega ni vakaleqai, era solia tale ga na nodra lori mera vakayagataka na mataveitacini era vakaleqai. Ena veidusimaki ni Komiti ni Taravale ena Duidui Vanua, e sega ni cegu na nodra ripeataka na nodra vale na mataveitacini o ira era bolecakacaka. E sivia na 1,700 era bolecakacaka ena vanua cava ga e gadrevi kina na veivuke. Era gole mai Merika e dua na ilala mera ripeataka na Vale ni Soqoni. O ira kece na bolecakacaka ena kena vakavinakataki na Vale ni Soqoni era le 575.

E kauaitaki vakalevu na nodra bula vakayalo kei na ka era vinakata o ira era vakaleqai. Era veivuke e sivia na 400 na qase ni ivavakoso ena vanua e gadrevi kina na veivakatawani. E laurai ni kauaitaka na iLawalawa Dauvakatulewa na ituvaki qori ni rau lesi mai na itikotiko liu e rua na ivakatawa ni dua na iwase kei vuravura me rau lai veivakayaloqaqataki vei ira era vakaleqai. Na nodra kauai na iVakadinadina e veiyasa i vuravura e veivakayaloqaqataki tale ga vakalevu.

QAQA ENA VEILEWAI

Era vakarorogo vinaka na tiko ena soqo ni vakamacala o Stephen Hardy mai na valenivolavola ni tabana mai Igiladi ena qaqa se qai rawati toka ga qo ena nodra veilewaitaki na tacida. Kena ivakaraitaki, a vakarota na matanitu o Varanise me sauma na isoqosoqo vakalawa eda vakayagataka tiko e kea e 82 na milioni na na ilavo ni Merika me isau ni ivakacavacava. A wali na leqa qori ni talaca na kisi na European Court of Human Rights (ECHR), e tukuna ni beca na matanitu o Varanise na Tikina e 9 ni European Con­vention e dau taqomaka na galala ni sokalou. Na ka e volai e vakaraitaka ni lewa e tau e sega ni baleta na ilavo, a volai kina: “Na kena tawase e dua na lotu ni sega ni via vakalawataki, kei na vosa veibeci e tau me baleta e dua na lotu e ivakaraitaki ni kena beci na dodonu e vakadeitaki tu ena Tikina e 9 ni Convention.”

A talaca tale ga na ECHR na kisi me baleti Armenia. A nanuma tu na ECHR me tekivu mai na 1965, ni European Convention e sega ni taqomaki ira era dau vakasaurarataki mera curu ena mataivalu. A qai vakatulewataka na mataveilewai levu ni European Court, ni dodonu me doka na European Convention na nona “sega ni via curu ina mataivalu e dua ni sega ni donu ena nona lewaeloma.” Na lewa e tau qori me baleta na dodonu ni tamata yadua, me muria tale ga na vanua o Armenia kei na vanua tale eso me vakataki Azerbaijan kei Taki.

TARAVALE

Ni vosa tarava o Guy Pierce e lewe ni iLawalawa Dauvakatulewa, a tukuna nira na via kila o ira era tiko ena soqo na veika me baleta na taravale e Niu Yoka. A vakaraitaka e dua na vidio e laurai kina na veika sa vakayacori tiko e Wallkill, Patterson, kei na tikiniqele se qai voli ga e Warwick kei Tuxedo, e Niu Yoka. Na itikotiko vou e Wallkill e sivia na 300 na kena rumu e nanumi me vakaoti na kena tara ena 2014.

Sa tiko na lalawa me baleta na ka me caka ena tikiniqele e Warwick e 248 na eka. E tukuna o Brother Pierce: “E se sega ni vakadeitaki se cava e vinakata o Jiova me caka e Warwick, ia sa tekivu na cakacaka qai nanumi me tokitaki e kea na itikotiko liu ni iVakadinadina i Jiova.” Sa lalawataki tale ga me vakayagataki na tikiniqele e 50 na eka, e tiko ena rauta ni 10 na kilomita ena vualiku kei Warwick me biu kina na misini kei na iyaya ni taravale. A kaya o Brother Pierce: “Ni sa vakadonui me caka na taravale, e nanumi tiko me vakaoti qori ena loma ni va na yabaki. Oti sa na qai volitaki na qele kei na vale e Brooklyn.”

A taroga o Brother Pierce: “Sa veisau beka na vakasama ni iLawalawa Dauvakatulewa me baleta na kena sa voleka na veivakararawataki levu?” A sauma: “Sega. Ke yaco na veivakararawataki levu qai sega ni yaco na neitou lalawa, sa na dua dina na ka totoka!”

QARAUNA NA LAIONE E TAGI

A vosa tarava o Stephen Lett e lewe tale ga ni iLawalawa Dauvakatulewa, qai veivosakitaka na 1 Pita 5:8: “Moni yalomatua, ni yadra tiko. E veilakoyaki voli na kemuni meca, na Tevoro, me vaka na laione e tagi, e vakasaqara e dua me basuraka.” A tukuna o Brother Lett ni vica na ka me baleti ira na laione e ganita vinaka kina na Tevoro na vosa vakatautauvata i Pita.

Nira kaukaua sara qai totolo na laione ni vakatauvatani kei keda, meda kua sara ni saga meda valuti Setani se drovaki koya ena noda kaukaua ga. Ena gadrevi me vukei keda o Jiova. (Aisea 40:31) E dau yaqa lo na laione ni vakasasa kena, meda cata gona na butobuto vakayalo e dau vaqara kina o Setani e dua me toboka. Me vaka ga na nona vakamatea e dua na antelope manoa se dua na luve ni zebra e moce tu na laione, o Setani tale ga e sega ni dauloloma qai vinakata me vakamatei keda. Ni sa mamau na laione, e sega tale ni kilai na irairai ni manumanu e kania. E va sara ga qori na ‘ca ni kedra ituvaki’ eso ni basuraki ira oti vakayalo o Setani, ‘e bau vinaka cake na kedra ituvaki e liu.’ (2 Pita 2:20) E bibi gona meda vorati Setani, meda muria dei tale ga na ivakavuvuli vakaivolatabu eda sa vulica.​—1 Pita 5:9.

VAKAMAREQETA NOMU ITAVI ENA VALE I JIOVA

A vunau tarava o Samuel Herd e lewe ni iLawalawa Dauvakatulewa qai kaya: “E tiko kece na noda itavi ena vale i Jiova.” Na lotu vaKarisito kece e tiko na nodra itavi ena “vale” ni Kalou se na nona valenisoro vakayalo​—na ituvatuva eda rawa ni sokaloutaki koya kina ena vuku ni isoro ni veivoli i Jisu. Meda vakamareqeta na vanua qori qai okata me dua na ka dokai. Me vakataki Tevita, eda vinakata meda “tiko e na vale i Jiova e na veisiga kecega ni [noda] bula.”​—Same 27:4.

A vakamacalataka o Brother Herd na Same 92:12-14 qai taroga, “Na cava ena cakava o Jiova meda bulabula tiko ga kina?” A sauma: “Ena parataisi vakayalo, e karoni keda na Kalou, taqomaki keda, qai solia vei keda na wai veivakacegui ni ka dina. Qori na ka meda vakavinavinakataka vua.” E uqeti ira na vakarorogo o Brother Herd: “Meda marautaka na noda tiko ena vale i Jiova​—me kua ni vakalekaleka ga, ia me tawamudu.”

DOKA NA VOSA NI KALOU NA LOTU VAKARISITO

O David Splane e lewe tale ga ni iLawalawa Dauvakatulewa, a vakamacalataka ena ivunau tarava nira dau doka na Vosa ni Kalou na lotu vaKarisito dina. Era nuitaka na iVolatabu ena imatai ni senitiuri me wali kina na ile me baleta na cili. (Caka. 15:16, 17) Ia eso era kaya nira lotu vaKarisito ena ikarua ni senitiuri ra qai vakavulici ena vuku vaKirisi, era vakaliuca na nodra vuku, sega ni iVolatabu. Ena dua na gauna e muri, eso tale era sosomitaka na ivakavuvuli vakaivolatabu ena nodra rai o ira era kaya nira Qasenilotu kei ira na empara ni Roma. Qori e vakavuna me tete e levu na ivakavuvuli lasu.

A vakamacalataka o Brother Splane ni vakaraitaka o Jisu ena dua na vosa vakatautauvata nira na bula tiko e vuravura na lotu vaKarisito dina era lumuti mera valataka na ka dina. (Maciu 13:24-30) E sega ni rawa ni tukuni sara o cei o ira qori. Ia ena veisenitiuri sa oti, e levu era biuta na ivakavuvuli kei na itovo e sega ni yavutaki ena iVolatabu. Qori e wili kina o Ajibisovi Agobard mai Lyons ena ika9 ni senitiuri, Peter mai Bruys, Henry mai Lausanne, Valdès (se Waldo) ena ika12 ni senitiuri, John Wycliffe ena ika14 ni senitiuri, William Tyndale ena ika16 ni senitiuri, Henry Grew, kei George Storrs ena ika19 ni senitiuri. O ira na iVakadinadina i Jiova nikua era muria tiko ga na ivakatagedegede vakaivolatabu ra qai vakadinata ni yavutaki ena iVolatabu na ka dina. Qori na vuna e digia kina na iLawalawa Dauvakatulewa me tikinivolatabu ni yabaki 2012 na Joni 17:17: “E dina na nomuni vosa.”

VEISAU TOTOKA ME BALETA NA VULI KEI NA VEIQARAVI

O Anthony Morris e lewe ni iLawalawa Dauvakatulewa a kacivaka na veiveisau me baleti ira na daukaulotu kei na painia lavotaki. Me tekivu ena Seviteba 2012, ena vakayacori na Koronivuli ni Vuli iVolatabu ena so tale na vanua sa digitaki tu. Sa veisau na inaki ni Koronivuli o Kiliati. Me tekivu ena Okotova ena yabaki sa oti, o ira kece era vuli e Kiliati era sa vakaitavi rawa toka mai na so na taba ni cakacaka vakaitalatala vakatabakidua​—era daukaulotu, ia era se sega ni vuli e Kiliati, era painia lavotaki, ivakatawa dauveilakoyaki se lewe ni vuvale e Peceli. Ni oti na nodra vuli, era na lai veiqaravi ena veivalenivolavola ni tabana se cakacaka vakaivakatawa dauveilakoyaki mera veivakacegui qai veivakayaloqaqataki vei ira na tamata ni Kalou. Era rawa tale ga ni lai veiqaravi ena vanua e levu kina na tamata mera rawa ni vakayaloqaqataki ira na ivavakoso ena cakacaka vakavunau.

Eso tale na painia lavotaki era na lai tauyavutaka na cakacaka ena veivanua tu yawa. Me tekivu ena 1 Janueri, 2012, eso era vuli ena Koronivuli ni Vuli iVolatabu ni Tagane Dawai kei na Koronivuli ni Vuli iVolatabu ni Veiwatini era na lesi mera painia lavotaki vakalekaleka ena veivanua tu yawa mera lai tauyavutaka na cakacaka se vakarabailevutaka. Nira lesi ina dua na vanua, ena dikevi tiko ena loma ni tolu na yabaki na nodra cakacaka vakapainia lavotaki. Ke vuavuaivinaka na nodra cakacaka, sa rawa ni nodra ilesilesi tudei na painia lavotaki.

A marautaki dina na bose vakayabaki ni 2011. Eda nuitaka ni na vakalougatataka o Jiova na ituvatuva vou me vakalevutaki kina na noda cakacaka vakavunau qai dei kina na noda duavata vakamataveitacini, me dokai qai lagiti kina o Jiova.

[Kato/​iYaloyalo ena tabana e 18, 19]

KILAI RATOU VINAKA

Eratou vakatarogi tale ga ena porokaramu e lima vei ratou na le ciwa na yada eratou se bula tiko, a lewe tu ni iLawalawa Dauvakatulewa na watidratou. Eratou vakamacalataka o Marina Sydlik, Edith Suiter, Melita Jaracz, Melba Barry, kei Sydney Barber se ratou kila vakacava na ka dina, a tekivu tale ga vakacava na nodratou cakacaka vakatabakidua. Eratou talanoataka na veika totoka eratou marautaka ena veigauna sa oti, na veika eratou nanuma me baleta na dui watidratou, kei na veivakalougatataki eratou marautaka. E veiuqeti dina na veivakatarogi qori, qai vakacavari ena nodra lagata na tiko ena soqo na sere naba 86, na kena usutu “Yalewa Yalodina, Tacida vaKarisito.”

[iYaloyalo]

(E cake) Daniel kei Marina Sydlik; Grant kei Edith Suiter; Theodore kei Melita Jaracz

(E ra) Lloyd kei Melba Barry; Carey kei Sydney Barber

[Mape ena tabana e 16]

(Raica tale na ivola)

Ono na valenivolavola ni tabana era cokovata qai vakarurugi ena valenivolavola ni tabana mai Mexico

MEXICO

GUATEMALA

HONDURAS

EL SALVADOR

NICARAGUA

COSTA RICA

PANAMA

[iYaloyalo ena tabana e 17]

Lalawa me baleta na itikotiko liu ni iVakadinadina i Jiova e Warwick, Niu Yoka