RA TAROGA NA ITABAGONE
Cava Meu Kila me Baleta na Cakava e Levu Tale na ka ena Dua ga na Gauna?
Vakacava na ivakarau ni nomu cakava e levu tale na ka ena dua ga na gauna?
E lasutaki wale noda rawa ni cakava e levu tale na ka ena dua ga na gauna
Vakacava na ivakarau ni nomu cakava e levu tale na ka ena dua ga na gauna?
O rawa ni cakava e levu tale na ka ena dua ga na gauna? Levu era nanuma o ira na kila vinaka na iyaya vakalivaliva era rawa ni cakava e levu tale na ka ena dua ga na gauna. Ia era sega ni rawa ni cakava qori o ira na qase cake, nira sega ni kila vinaka sara na vakayagataki ni ka vakalivaliva. E dina oya?
DINA se LASU?
O na sega ni vakalusi gauna ni o cakava e levu tale na ka ena dua ga na gauna.
O na kenadau ke o vakamatauni iko mo cakava e levu tale na ka ena dua ga na gauna.
Rawa nira cakava e levu tale na ka na itabagone ni vakatauvatani kei ira na qase cake.
Ke o sauma “dina” ena dua na iyatuvosa qori, de dua o sa vakacalai tiko ni rawa ni o cakava e levu tale na ka ena dua ga na gauna.
E lasutaki wale noda rawa ni cakava e levu tale na ka ena dua ga na gauna
O nanuma ni o rawa ni cakava e rua na ka ena dua ga na gauna? O na rairai cakava qori ke dua vei rau e sega ni vinakati kina e levu na gauna. Kena ivakaraitaki, o na rawa ni samaka nomudou vale ke o lagasere qai sasamaki tiko.
Ia ena vakaleqai iko ga ke o via cakava e rua na ka ena vinakati vakalevu kina na gauna. Qori na vuna e kaya kina e dua na yalewa o Katherine, me baleta na cakava e levu tale na ka ena dua ga na gauna: “Ena sakuca ni o cakava e levu tale na ka ena dua ga na gauna.”
“Au vosa tiko vua e dua, au raica sara e dua na itukutuku ena noqu talevoni, ena vinakati meu sauma lesu na itukutuku qori. Au mani nanuma meu cakava ruarua. Kena itinitini, au sega ni rogoca wale kina e levu na ka e tukuna tiko o koya keirau veivosaki tiko, au vola cala tale ga e levu na itukutuku ena talevoni.”—Caleb.
E vola o Sherry Turkle e kenadau ena tekenoloji: “Ke da nanuma nida rawa ni cakava e levu tale na ka ena dua ga na gauna, . . . eda na sega ni cakava vinaka noda itavi, sega tale ga ni vuavuaivinaka noda cakacaka. Na ivakarau qori ena yavalata noda vakasama meda nanuma kina ni na rawa ni vinaka cake tiko ga na ka eda cakava. Ia toso na gauna ena qai ca sara.”a
“Eso na gauna au nanuma ni sa vinaka na ka au cakava tiko. Oya meu vakauitukutuku vua e dua, gauna vata qori au vosa tiko vua e dua tale. Au qai liaca niu sa cavuta tu i cake na itukutuku e dodonu meu vakauta ga ena talevoni!”—Tamara.
Era na vakadredretaka ga nodra bula o ira na saga mera cakava e levu tale na ka ena dua ga na gauna. Kena ivakaraitaki, ena dredre mera vakaotia nodra lesoni e vale, se de dua ena vinakati mera cakava tale nodra lesoni e vale nira sega tu ni cakava vakavinaka. Se mani cava e yaco, o ira na via cakava e levu tale na ka ena dua ga na gauna, ena lailai na gauna mera cakava kina na ka era vinakata!
Sa rauta me tukuna o Thomas Kersting, e dua na vuniwai ni vakasama, e daunivakasala tale ga e koronivuli: “Na mona e vaka tiko e dua na kovate era maroroi vinaka tu kina na ivola se itukutuku. Ia ni dua e via cakava e levu tale na ka ena dua ga na gauna, nona mona e vaka sara ga e dua na kovate e kabuacara tu kina na ivola se itukutuku.”b
“O na raibaleta eso na itukutuku bibi ke o saga mo cakava levu tale na ka ena dua ga na gauna. Kena itinitini, de dua o na cakacaka vakaukaua, qai vakalusia kina e levu nomu gauna.”—Teresa.
Nomu saga mo cakava e levu na ka ena dua ga na gauna, e vaka ni o draiva tiko ena rua na gaunisala ena dua ga na gauna
iWalewale vinaka
Vakavulici iko mo dau kauaitaka ga e dua na itavi ena dua na gauna. Ena ka ni sasaga toka qori ke sa nomu ivakarau tiko mo vakauitukutuku ena talevoni vei ira nomu itokani, gauna vata qori o vuli lesoni tiko. Ia e kaya na iVolatabu meda “vakadeitaka . . . na veika era bibi sara.” (Filipai 1:10) E sega ni tautauvata na itavi kece eda cakava. Tuvanaka rawa gona na itavi bibi mo cakava e liu, qai kauaitaka tiko qori me yacova ni lai oti.
“Na mona e vakamuai tani e vaka e dua na gone lailai e via cakava ga vakataki koya na ka. Ia eso na gauna ena vinakati mo dei ni vakasega vua. E va tale ga qori nomu mona ena vinakati mo dei tiko ga ena dua na ka o sa cakava tiko.”—Maria.
Bokoca na ka e veivakawelei. O dau temaki mo raica nomu talevoni ni o vuli lesoni tiko? Biuta nomu talevoni ina dua tale na rumu. Bokoca na tivi, kua ni qai vakasamataka tale tiko na veika me baleta na internet! E kaya na iVolatabu: “Vakayagataka vinaka nomu gauna ena sala vinaka duadua.”—Kolosa 4:5, Easy-to-Read Version.
“Au raica ni vinaka cake meu vakaotia mada e dua qai dua tale. Sala qori au dau marau kina vakalevu niu bokoca na ka au sa cakava oti, qai toso ina kena e tarava. Au dau marau vakalevu niu cakava qori.”—Onya.
Kauaitaki koya drau veivosaki tiko. E veibeci ni o vosa tiko vua e dua, oti o qai raica tiko nomu talevoni. E rawa tale ga ni veivakaleqai vei kemudrau. E kaya na iVolatabu meda cakava vei ira eso tale na ka vata ga eda vinakata mera cakava vei keda.—Maciu 7:12.
“Eso na gauna niu vosa tiko vei ganequ, ena vakauitukutuku tiko vua e dua, se cakava tale tiko e dua na ka ena nona talevoni. Au dau sevaka sara ga qori! Ia meu kaya na ka dina, eso na gauna au dau cakava tale ga qori!”—David.