“Au Vakila e Levu na Mosi Niu Basulawa Qai Lomana Vakalevu na iLavo”

NOQU BULA E LIU

Au susu ena vuvale dravudravua ena siti o Tirane, e Albania. E dau dina qai cakacaka vakaukaua o tamaqu me qaravi keitou kina. Ia e sega ni veirauti na ilavo me keitou bula kina e veisiga. Niu se gone au dau rarawataka ni keitou dravudravua. Levu na gauna au sega ni vakaivava, sega ni levu tale ga na kakana au kania.

Au tekivu butako niu se gone lailai. Au nanuma meu vukei ratou kina na noqu vuvale. Toso na gauna, ratou qai kila na ovisa. Ena 1998, niu yabaki 14, e biuti au o tamaqu ina valeniveivesu ni tabagone. Au tu ekea me rua na yabaki, au vulica tale ga kina na tuki kaukamea. Niu lesu i vale au vinakata meu kua ni rawata vakailawaki na ilavo. Ia au sega ni kunea rawa e dua na cakacaka ni yaco tiko e Albania na tiko yavavala vakapolitiki. Dua na ka noqu yalolailai, au lesuvi ratou tale noqu itokani makawa, au tekivu butako tale ga. Au vesu kei ratou noqu ilala, keitou bala e valeniveivesu me tolu na yabaki.

Oti noqu sere mai valeniveivesu, au tomana tale na butako. E lutu na ka vakailavo e Albania, qai vakavuna e levu na leqa. Ena gauna dredre qori, au rawata vakailawaki e levu na ilavo. Dua na siga rau vesu e rua noqu itokani ni keitou butako. Au mani dro ina dua tale na vanua meu kua kina ni vesu. Gauna vata qori, au sa vakawatitaki Julinda, e dua tale ga na luvei keirau tagane.

Keitou yaco sara vakaveitamani e Igiladi. Au vinakata meu kua ni cakacaka vakailawaki, ia e dredre meu biuta noqu itovo makawa. Au tomana tale na basulawa—ia qo au sa volitaki wainimate gaga, au rawata sara kina e levu na ilavo.

Ia cava nona rai o Julinda ena cakacaka au cakava tiko? E kaya: “Niu susu e Albania, au vinakata meu lako tani mai na bula dravudravua. Au saga na sala cava ga meu vutuniyau kina. Au nanuma ni na vakavinakataka neitou bula na ilavo. Au mani tokoni Artan ena nona dau lasu, butako, kei na volitaki wainimate gaga—me rawa ga kina na ilavo.”

E veisau kece qori ena 2002. E sega ni tini vinaka neitou vinakata me keitou bula vutuniyau ena veigauna se bera mai. Au vesu ni kune vei au e dua na iwiliwili levu ni wainimate gaga, au mani bala tale e valeniveivesu.

VEISAUTAKI AU NA IVOLATABU

Au sega ni kidava ni sa veisautaki au tiko na iVolatabu. Ena 2000, a sotavi rau e rua na iVakadinadina i Jiova o watiqu e vulica sara na iVolatabu. E sega ni uqeti au vakalevu na iVolatabu niu nanuma e vakavucesa. Ia e taleitaka vakalevu qori o Julinda, e kaya: “Au susu ena vuvale daulotu. Au taleitaka qai doka tale ga na ka e kaya na iVolatabu. Au dau via kila na ka e tukuni kina, qori e uqeti au meu vulica na iVolatabu kei ira na iVakadinadina i Jiova. Au vakadinata sara ga na ka e vakavuvulitaka na iVolatabu. Na ka au vulica kina e vukei au meu cakava eso na veiveisau ena noqu bula. Ia e sega ni veisau noqu rai me baleta na ilavo. Me yacova na gauna e vesu kina o Artan, qori e veisautaka sara ga na noqu rai. Au qai liaca ni dina na ka e kaya na iVolatabu me baleta na ilavo. Dua na ka neirau sasaga me levu na neirau ilavo, ia e sega vakadua ni vakamarautaki keirau. Au sa qai kila ni dodonu meu muria vinaka ga na ka e kaya na iVolatabu.”

Au sere mai valeniveivesu ena 2004, au tekivu volitaki wainimate gaga tale. Ia sa veisau na rai nei Julinda, qai tukuna vei au e dua na ka au vakasamataka sara ga vakabibi. E kaya: “Au sega ni vinakata tale nomu ilavo. Au vinakata ga mo lomani au, mo lomani rau tale ga na gone.” Au kidacala sara ga, ia e dina na ka e tukuna. Levu na gauna au biuti ratou tu na noqu vuvale, au vakasamataka tale ga na levu ni rarawa au vakila meu rawata vakailawaki e levu na ilavo. Au mani vakatulewataka meu veisautaka na noqu itovo, meu kua tale ga ni veimaliwai kei ira na noqu itokani makawa.

E veisau na noqu rai ena gauna keitou gole kina vakaveitamani ena nodra soqoni na iVakadinadina i Jiova. Au qoroya vakalevu na nodra yalovinaka kei na nodra veikauaitaki. Qori e uqeti au meu vulica na iVolatabu.

Au vulica ena iVolatabu “ni levu sara na ka ca e vu mai na lomani ni ilavo, nira vakasaqara qori eso . . . era sualaka na yagodra taucoko ena levu na mosi.” (1 Timoci 6:9, 10) Au vakadinadinataka ena ka au sotava na dina na tikinivolatabu qo! Au veivutunitaka vakalevu na cala au cakava ena veigauna sa oti. E vakararawataki au, ratou rarawa tale ga kina na noqu vuvale. (Kalatia 6:7) Niu vulica na loloma rau vakaraitaka vei keda o Jiova kei na luvena o Jisu Karisito, qori e uqeti au meu veisautaka na ivakarau ni noqu bula. Au sa sega ni qai nanumi au ga, ia au sa kauaitaki ira vakalevu eso tale wili kina na noqu veimaliwai vakalevu kei ratou na noqu vuvale.

KENA YAGA

Au vakila na yaga ni noqu muria na ivakasala qo ena iVolatabu: “Me kua ni laurai ena nomuni bula ni oni lomana na ilavo, ni lomavakacegu ga ena ka e sa tiko vei kemuni.” (Iperiu 13:5) Ena gauna qo au sa vakila na lomavakacegu, e savasava tale ga noqu lewaeloma. Au se bera vakadua ni vakila na mataqali marau va qo. E dei noqu bula vakawati, keitou veivolekati tale ga vakaveitamani.

Au dau nanuma tu ni keitou na marau ga ke levu neitou ilavo. Ia qo au sa vakadinadinataka niu vakila e levu na mosi niu basulawa qai lomana vakalevu na ilavo. E dina ni keitou sega ni vutuniyau vakayago, ia keitou kunea e dua na ka e talei sara—ya na neitou veitokani kei na Kalou o Jiova. Keitou marau vakavuvale ni keitou duavata ena qaravi Jiova.