Ena Rawa ni Vinaka na Bula Vakailavo?

Levu na vanua era dau tayabe na lewenivanua mera vakaraitaka kina nodra kudruvaka na leqa ni bula vakailavo ni nodra vanua. Sa qai kuria na leqa qori na veitauvi ni matedewa na COVID-19. Era rarawataka kina na lewenivanua ni vakatabui na nodra veilakoyaki, lailai na wainimate qai so era sega ni qaravi vinaka vakavuniwai. E vakilai tale ga kina na nodra vakaduiduitaki na dravudravua kei na vutuniyau.

Ia vakacava ena rawa ni oti na leqa vakailavo e tarai vuravura tu qo? Io. E vakamacalataka na iVolatabu na sala ena walia kina qori na Kalou.

Ena walia na Kalou na leqa vakailavo

Leqa: E sega ni vakarautaka na matanitu vakatamata na ivakarau ni bula vakailavo ena yaga vei keda kece.

Kena iwali: Na Kalou ena sosomitaka na matanitu vakatamata ena nona matanitu e vakatokai na Matanitu ni Kalou. Ena veiliutaki mai lomalagi me lewa na vuravura taucoko.—Taniela 2:44; Maciu 6:10.

Ka ena yaco: Ena uasivi na ka ena cakava na Matanitu ni Kalou ni sa veiliutaki e vuravura taucoko. Ena vakaotia vakadua na dravudravua, eda na sega tale ga ni leqataka tiko na ka meda bula kina. (Same 9:7-9, 18) Eda na marautaka na vua ni noda cakacaka, ena vuavuaivinaka na ka eda cakava da qai marautaka na bula kei na noda vuvale. E yalataka na iVolatabu: “Era na tara vale era na tiko kina, era na tea na loganivaini era na kania na vuana. Era na sega ni tara vale qai duatani e tawana, era na sega ni tea qai duatani e kania.”—Aisea 65:21, 22.

Leqa: Eda na sega ni levea rawa na ituvaki e vakavuna me dredre kina na noda bula e veisiga.

Kena iwali: Ena vakayagataka na Kalou na nona Matanitu me vakaotia na ka kece e vakavuna na rere kei na yalolailai.

Ka ena yaco: Ni veiliutaki na Kalou ena oti vakadua na veika e dau vakavuna meda vakayalia na veika meda bula kina. Kena ivakaraitaki, ena sega tale na ivalu, leqa ni kakana kei na matedewa. (Same 46:9; 72:16; Aisea 33:24) E kaya na Kalou: “Era na tiko na noqu tamata ena vanua vinaka ni vakacegu. Ena itikotiko tudei kei na ivakavakacegu vinaka.”—Aisea 32:18.

Leqa: Era dau veivakalolomataki o ira na tamata kocokoco qai nanumi ira ga.

Kena iwali: O ira na vakarurugi ena Matanitu ni Kalou era na vakaraitaka na loloma dina, ra qai vakaliuci ira eso tale.—Maciu 22:37-39.

Ka ena yaco: Ni veiliutaki na Matanitu ni Kalou era na vakatotomuria o ira na vakarurugi kina nona dauloloma na Kalou. Era na ‘sega ni kauaitaka ga na ka e baleti ira.’ (1 Korinica 13:4, 5) E kaya na iVolatabu: “Era na sega ni veivakaleqai se veivakarusai ena noqu ulunivanua tabu kece, ni na robota na vuravura na kilaka me baleti Jiovaa me vaka e ubia na wasawasa na wai.”—Aisea 11:9.

E kaya na iVolatabu nida bula tu qo ena iotioti ni veisiga ni ituvaki ca. Sa voleka tale ga na gauna me vakaotia kina na Kalou na leqa vakailavo kece.b (Same 12:5) Ia ena gauna mada ga qo ena rawa ni vukei keda na ivakavuvuli vakaivolatabu ena ka meda cakava nida sotava na leqa vakailavo. Kena ivakaraitaki, raica na ulutaga “Cava mo Cakava ke Vakalailaitaki na Kemu iSau?” kei na “Rai Donu me Baleta na iLavo.”

Rai cala me baleta na iVolatabu kei na veika vakailavo

Rai cala: Ena sega ni oti na dravudravua ni kaya o Jisu: “Dou na tiko ga kei ira na dravudravua.”—Maciu 26:11.

Ka dina: E tukuna tiko o Jisu e dua na ka e yaco dina: Ena vakilai tiko ga na bula dravudravua nira se veiliutaki tiko na tamata ivalavala ca. Ia e veivakacegui nona vunautaka o Jisu na “itukutuku vinaka vei ira na dravudravua.” E okati kina na nona vakaotia vakadua na Matanitu ni Kalou na bula dravudravua.—Luke 4:18, 43.

Rai cala: O ira era via vakamarautaka na Kalou e dodonu mera dravudravua. Ni kaya o Jisu: “Lai volitaka nomu iyau, solia na kena ilavo vei ira na dravudravua.”—Maciu 19:21.

Ka dina: E sega ni kaya tiko o Jisu mera muria kece na nona imuri na ivakaro qori. Ia e vosa tiko ga vua na cauravou vutuniyau ni vakaleqai koya tiko na nona iyau. E uqeti koya gona o Jisu me bula rawarawa, me mai dua tale ga nona imuri.

Rai cala: Na Kalou e vakalougatataki ira na tamata mera vutuniyau. Ni kaya na iVolatabu: “Na veivakalougatataki i Jiova e veivakavutuniyautaki, e sega ni kuria o koya ena ka rarawa.”—Vosa Vakaibalebale 10:22.

Ka dina: Ena iVolatabu na vosa “veivakalougatataki i Jiova,” e dusia na vutuniyau vakayalo. Kena ivakaraitaki, ena vakainaki na noda bula, eda veivolekati kei na Kalou qai tiko na noda inuinui totoka ena veigauna se bera mai. (Same 25:14; Joni 17:3) Dina ni Kalou e vakalougatataki ira eso na nona dauveiqaravi mera vutuniyau vakayago, ia era sega ni va kece qori na lotu vaKarisito. (Vakatekivu 24:34, 35; Jemesa 2:5) O Jisu Karisito mada ga e sega ni taukena e levu na iyau.—Maciu 8:20.

Rai cala: E uqeta na iVolatabu na ivakarau ni bula vakominisi. E tukuni me baleti ira na lotu vaKarisito ena imatai ni senituri: Era “wasea na ka e tu vei ira, era volitaka nodra iyau kei na ka era taukena.”—Cakacaka 2:44, 45.

Ka dina: Na tikinivolatabu qori e vakamacalataka e dua na ka e caka ena dua na gauna lekaleka mera qaravi kina o ira era se qai tavuki ga mera lotu vaKarisito. Era gole mai Jerusalemi mera mai tiko ena Soqo ni Penitiko. (Cakacaka 2:5) Ia nira sa lotu Vakarisito era via vulica e levu tale na ka me baleta na nodra vakabauta vou, qori e vakavuna mera tiko vakadede e Jerusalemi. Era mani veivuke gona na vo ni lotu vaKarisito mera vakarautaka na kedra, kei na vanua mera tiko kina.—Cakacaka 2:41, 42, 46, 47.

a E tukuni ena iVolatabu ni yaca ni Kalou o Jiova.—Same 83:18.

b Mo kila na vuna mo nuitaka kina na iVolatabu, raica na ulutaga “Na iVolatabu—iVurevure ni ka Dina.”