YADRA TIKO!
Sivia na Katakata ni Draki—Cava e Kaya na iVolatabu?
E ripotetaki ni levu duadua na ivakarau ni katakata ni draki e veiyasa i vuravura ena Julai 2022:
“E vakarua nona kaya o Jaina ena vula qo ni na rawa ni leqataki na katakata sivia ni draki ena rauta na 70 na siti e kea.”—25 ni Julai 2022, tabana ni nius na CNN Wire Service.
“Na katakata ni draki e Urope e vakavuna me kama na veikau.”—17 ni Julai 2022, niusipepa The Guardian.
“Ena Sigatabu dua na ka na katakata sivia ni draki ena levu na siti e Merika ni vakatauvatani ena veigauna sa oti.”—24 ni Julai 2022, niusipepa The New York Times.
Cava e dusia qori? Vakacava ena sega tale ni dua na ka e bula e vuravura ni toso na gauna? Cava e kaya na iVolatabu?
E vakayacori na parofisai vakaivolatabu ena katakata sivia ni draki?
Io. Na katakata sivia ni draki e tautauvata kei na ka e parofisaitaka na iVolatabu ni na yaco ena noda gauna. Kena ivakaraitaki, e parofisaitaka o Jisu nida na raica “veika vakadomobula,”se “duatani qai rerevaki.” (Luke 21:11; Good News Translation) Na katakata sivia ni draki era leqataka kina e levu nida na vakarusa na kawatamata na vuravura.
Vakacava ena vakalalai na vuravura?
Sega. E bulia na Kalou na vuravura me noda itikotiko tudei na kawatamata. (Same 115:16;Dauvunau 1:4) Ena sega ni vakatara me vakarusa na tamata na vuravura. Ia e yalataka ni na “vakawabokotaki ira . . na vakarusai vuravura tiko.”—Vakatakila 11:18.
Qo e rua na parofisai e yalataka na Kalou ena cakava e vuravura:
“Ena reki na vanua talasiga kei na vanua sigasiga, kei na buca dravuisiga ena marau, ena se me vaka na senikau na sefaroni.” (Aisea 35:1) Ena sega ni vakalaiva na Kalou me dravuisiga na vuravura, qai sega ni dua e bula kina. Ia ena vakavinakataka tale na vanua e vakacacani.
“Oni kauaitaka na vuravura, oni vakavuna me vuavuaivinaka vakalevu, qai sautu.” (Same 65:9) Ena veisautaka na Kalou na vuravura me dua na parataisi totoka.
Mo kila eso tale na ka ena vakayacori ni parofisai vakaivolatabu me baleta na veiveisau ni draki, wilika na ulutaga “Ka e Kaya na iVolatabu ena Veiveisau ni Draki kei na Noda Gauna se Bera Mai.”
Mo kila eso tale na ka e yalataka na iVolatabu me baleta na kena vakavinakataki tale na bula e vuravura, wilika na ulutaga “O Cei ena Taqomaka na Vuravura?”