Katakata Sivia na Draki e Veiyasa i Vuravura—Cava e Kaya na iVolatabu?

Ena 2023, e vakilai vakalevu duadua kina na katakata ni draki ni vakatauvatani kei na veigauna sa oti. E lai vakavuna tale ga eso na leqa tubukoso. Qo eso na ripote:

•  “Tekivu mai na 174 na yabaki sa oti, qo na imatai ni gauna me volatukutukutaki kina na sivia ni katakata ni draki e vakilai e veiyasa i vuravura ena June ni yabaki qo.”​—National Oceanic and Atmospheric Administration, U.S. Department of Commerce, Julai 13, 2023.

•  “Dua na ka na katakata sivia ni draki e Itali, Sipeni, Varanise, Jamani kei Poladi. E tubu kina na katakata ni cagi ina 48 na dikiri ena yanuyanu o Sicily kei Sardinia. E kena irairai ni qo e dua na draki katakata me volatukutukutaki e Urope.”​—European Space Agency (isoqosoqo e dau dikeva na maliwalala), Julai 13, 2023.

•  “Meda namaka ni na tau tiko vakalevu na uca ena vuku ni draki katakata. Ena rawa tale ga ni waluvu e levu na vanua.”​—Stefan Uhlenbrook, dairekita ni veika me baleta na wai e World Meteorological Organization, Julai 17, 2023.

Vakacava o lomaleqa ni sa qai sivia tiko ga na katakata ni draki? Dikeva mada na ka e kaya na iVolatabu me baleta na ulutaga qo.

Sa vakayacori tiko na parofisai vakaivolatabu ena veisau ni draki?

Io. E parofisaitaka na iVolatabu ni na yaco ena noda gauna na katakata sivia ni draki e veiyasa i vuravura, kei na so na leqa tubukoso e vu mai kina. Kena ivakaraitaki, e parofisaitaka o Jisu nida na raica eso na “ka e dauveivakarerei,” se “duatani qai rerevaki.” (Luke 21:11; Good News Translation) Na katakata sivia ni draki era lai leqataka kina e levu nida na vakarusa na vuravura.

Vakacava ena vakalalai na vuravura?

Sega. E bulia na Kalou na vuravura me noda itikotiko tudei, ena sega gona ni vakatara meda vakarusa. (Same 115:16; Dauvunau 1:4) E yalataka ni na “vakawabokotaki ira . . . tale ga na vakarusai vuravura tiko.”​—Vakatakila 11:18.

E kaya na iVolatabu ni Kalou e rawa ni taqomaka na vuravura mai na ka e veivakaleqai.

•  “[Na Kalou] e vakaruruya . . . na cagi kaukaua, e maravu na biau ni wasawasa.” (Same 107:29) E tu vua na kaukaua me lewa na draki. E rawa ni walia na ka e vakaleqai keda tiko mai na katakata ni draki ena gauna qo.

•  “Oni kauaitaka na vuravura, oni vakavuna me vuavuaivinaka vakalevu, qai sautu.” (Same 65:9) Ena veivakalougatataki ni Kalou, ena parataisi na vuravura.

Mo kila eso tale na ka e yalataka na iVolatabu me baleta na kena vakavinakataki tale na bula e vuravura, wilika na ulutaga “O Cei ena Taqomaka na Vuravura?”