Draki Mamaca—Cava e Kaya na iVolatabu?

• “Ena yabaki qo, e ripotetaki ni ‘sivia’ na ivakatagedegede ni katakata e Jaina. E yaco tale ga kina vakatolu na draki mamaca. Qori e iwiliwili levu duadua me volatukutukutaki.”—niusipepa The Guardian, Seviteba 7, 2022 .

• “Ena lima na yabaki sa sivi, e yaco veitaravi na draki mamaca ena so na vanua e Aferika.”—UN News, Okosita 26, 2022.

• “Era vakaroti e sivia ni veimama na vanua e Urope ni na yaco na lauqa e se bera ni vakilai ena 500 na yabaki sa oti.”—BBC News, Okosita 23, 2022.

Era raica rawa na kenadau ni na yaco tiko na draki mamaca, ena sivia tale ga na katakata. Vakacava e tiko na inuinui ni na vinaka na gauna se bera mai? Cava e kaya na iVolatabu?

Draki mamaca kei na parofisai ena iVolatabu

Ka e kaya na iVolatabu me baleta na noda gauna:

• “Ena tatara na leqa ni kakana . . . ena levu na vanua.”—Luke 21:11.

Na draki mamaca e vakavuna na leqa ni kakana. Na rarawa kei na mate e vu mai ena leqa ni kakana, e vakayacori kina na parofisai vakaivolatabu.—Vakatakila 6:6, 8.

Cava e levu tiko ga kina na draki mamaca?

E kaya na iVolatabu na vuna e levu kina na draki mamaca. E kaya:

• “E sega ni vu vua na tamata e lako tu me lewa na nona ilakolako.”—Jeremaia 10:23.

Kena ibalebale, eda sega ni rawa ni ‘lewa ga [na noda] ilakolako,’ se meda liutaki keda. Na nodra vakatulewa cala e levu e vakavuna na mamaca ni draki, kei na leqa ni wai.

• Era kaya e levu na saenitisi na ka era cakava eso e vakavuna na katakata sivia, vakilai kina na mamaca ni draki e veiyasa i vuravura

• E lekaleka ga qai sega ni yaga na ka era cakava na tamata kocokoco, kei na ka era vakatulewataka eso. Qori e vakavuna na musu kau vakaveitalia, benuci qai vakayagataki vakatawadodonu na veika bula. E vakaleqai kina na ivurevure ni wai.

Ia e tu ena iVolatabu na inuinui.

Vakacava e tiko na inuinui ena gauna se bera mai?

E kaya na iVolatabu na Kalou ena walia na maca ni wai. Ena sala cava?

1. 1. Na Kalou ena “vakawabokotaki ira  .  . na vakarusai vuravura tiko.” (Vakatakila 11:18) Ena vakarusai ira na vakavuna tiko na leqa ni wai, ya o ira na tamata ca kei ira na kocokoco era vakaleqa tiko na veika bula.—2 Timoci 3:1, 2.

2. 2. “Ena vuki na qele katakata mamaca me tobu ni kuta.” (Aisea 35:1, 6, 7) Na Kalou ena vakaotia na leqa e vu mai na draki mamaca, ena veisautaka tale ga na vuravura qo me dua na parataisi totoka.

3. 3. “Oni kauaitaka na vuravura, oni vakavuna me vuavuaivinaka vakalevu qai sautu.” (Same 65:9) Ena vakalougatataka o Jiova na vuravura me sautu ena kakana, kei na wai.