Ena Vakarau Yaco na iValu e Vuravura?—Cava e Kaya na iVolatabu?

Ena 30 na yabaki sa oti, e levu era nanuma ni dei qai vinaka cake tiko nodra veimaliwai na veimatanitu. Ia vaka e sega ni dina qori ni laurai vata kei na veika e yaco tu nikua.

“Na veiraravui e yaco mai Gaza era leqataka kina e levu de na tete ena so tale na vanua.”—Reuters, Janueri 6, 2024.
“Levu na vanua era vakacaca tiko kina e dua na ilawalawa mai Iran. E bulia tale ga o Iran eso tale na nona iyaragi vakaniukilia. O Rusia kei Jaina rau sa nona ito, ena rawa ni leqataki kina na veivanua vakavalagi.”—The New York Times, Janueri 7, 2024.
“ Sa qai levu ga na vakacaca e cakava tiko o Rusia vei Ukraine.”—UN News, Janueri 11, 2024.
“E tubu na ka vakailavo e Jaina, e kaukaua tale ga na nona mataivalu. Dua na ka na boletaki vanua e Taiwan. Erau sega ni veiriti tiko o Jaina kei Merika ena rawa ni basika kina na tikoyavavala.”—The Japan Times, Janueri 9, 2024.

Vakacava e tukuna na iVolatabu na nodra veilecayaki na veimatanitu e yaco tu nikua? Ena yaco kina na ivalu?

Parofisaitaka na iVolatabu na veika sa yaco tu nikua

E sega ni tukuna sara vakamatailalai na iVolatabu na ivalu e yaco tu nikua. Ia e tukuna ga ni na yaco na veivaluvaluti qai “kauta tani na sautu e vuravura.”—Vakatakila 6:4.

E tukuni ena parofisai ena ivola i Taniela nira na ‘veicumu,’ se ra na vinakata na veiliutaki na matanitu qaqa “ena gauna ni icavacava.” Qori e okati kina na nodra vakaraitaka na kaukaua ni nodra mataivalu, ra qai vakayagataka e levu na “iyau” se ilavo.—Taniela 11:40, 42, 43.

Vakarau yaco e dua na ivalu

E tukuna na iVolatabu ni sa qai torosobu ga na ituvaki ni vuravura qo. E parofisaitaka o Jisu ni na “yaco na veivakararawataki levu ena ivakatagedegede e sega ni bau vakilai vakadua mai na ivakatekivu.” (Maciu 24:21) Na “veivakararawataki levu” ena yaco kina na ivalu na Amaketoni, e vakatokai “na ivalu ni siga levu ni Kalou Kaukaua Duadua.”—Vakatakila 16:14, 16.

Ia na Amaketoni ena vakabula na kawatamata, e sega ni vakarusa. Na Kalou ena vakarusa na veiliutaki vakatamata era vakavuna tiko na veivaluvaluti. Mo kila na sala ena kauta mai kina na vakacegu dina na Amaketoni, wilika na ulutaga:

“Na iValu Vakacava na Amaketoni?”
“E iTukutuku Vinaka na Amaketoni!”