Na Gauna Cava ena Oti Kina na iValu?​—Cava e Kaya na iVolatabu?

Ena ika13 ni Epereli 2024, a valuti Isireli o Irani. Na ka e yaco qori e kaya kina na Vunivola Levu ni Matabose kei Vuravura o António Guterres, “qo na gauna meda cakava kina eso na ka me ruru kina na veivaluvaluti, me lewai vinaka na ituvaki me rawa ni vakamalumutaka na ka e yaco.”

Na ka e yaco qori ena Tokalau e Loma e dua ga na ivakaraitaki ni ivalu sa yaco tu e veiyasa i vuravura.

“Tekivu mai na iKarua ni Valu Levu e tubu cake tiko ga na ivalavala kaukaua, ra qai vakaleqai kina e rauta ni 2 na bilioni na lewenivanua.”​—United Nations Security Council, Janueri 26, 2023.

Qo eso na vanua e yaco tiko kina na ivalavala kaukaua, e Isireli, Gaza, Siria, Azerbaijan, Ukraine, Sudan, Iciopea, Niger, Myanmar, kei Haiti.a

Gauna cava ena oti kina na veivaluvaluti? Vakacava e rawa nira kauta mai na bula vakacegu na iliuliu kei vuravura? Cava e kaya na iVolatabu?

Yaco na ivalu e veivanua

Na itovo voravora e yaco tu e vuravura nikua e dusia ni sa vakarau oti na ivalu. Qori e vakayacori kina na ka e parofisaitaka na iVolatabu me baleta na gauna eda bula tu kina qo, me “ivakataotioti ni veika vakavuravura.”​—Maciu 24:3.

• “Dou na rogoca na ivalu kei na itukutuku ni ivalu. . . . Era na veivaluvaluti na veivanua kei na veimatanitu.”​—Maciu 24:​6, 7.

Mo kila na sala e vakayacori tiko kina nikua na parofisai vakaivolatabu me baleta na ivalu, wilika na ulutaga “Cava na iVakatakilakila ni ‘iOtioti ni Veisiga,’ se ‘Gauna ni iCavacava’?”

Dua na ivalu ena vakaotia na ivalu kece

E parofisaitaka na iVolatabu ni na oti na veivaluvaluti e yaco tiko qo. Ena yaco vakacava qori? Ena sega ni rawati ena kaukaua ni tamata, ia ena cakava qori “na ivalu ni siga levu ni Kalou Kaukaua Duadua” ya ena Amaketoni. (Vakatakila 16:​14, 16) Ni oti na ivalu, ena qai yaco na ka e yalataka na Kalou vei keda ya meda marautaka na bula vakacegu me tawamudu.​—Same 37:​10, 11, 29.

Mo kila eso tale na ka ena nona vakaotia na ivalu ni Kalou na ivalu kece, wilika na ulutaga “Na iValu Vakacava na Amaketoni?”