Era sa Sega ni Nuitaki na Daunipolitiki—Cava e Kaya na iVolatabu?

Ena loma ni yabaki ni 2024 ena yaco tiko e levu na veidigidigi ena veiyasa i vuravura. Ia e levu na lewenivanua era sa sega ni nuitaki ira na daunipolitiki.

•  E laurai nira kaya e dua na iwase levu ni lewe i Merika ni “levu na daunipolitiki era sa nanumi ira ga,” era sa sega ni via kauaitaka na ka era gadreva na lewenivanua.a​—Pew Research Center, Seviteba 19, 2023.

E levu tale ga na itabagone era sa sega nuitaki ira na daunipolitiki.

•  “O ira na itabagone nikua era kauaitaka vakalevu na iwali ni leqa ena so na veika bibi, ia era kaya ni o ira na daunipolitiki era sega ni saga mera qara na iwali ni leqa va qori.”​—The New York Times, Janueri 29, 2024.

•  “E laurai ena dua na vakadidike ni o ira na itabagone era sa sega ni nuitaki ira na daunipolitiki. Ia era sa nuitaki ira ga o ira na dau biuta na nodra vidio (YouTubers) ena sala ni veikilai ena internet, ra qai taleitaki kina vakalevu.”​—The Korea Times, Janueri 22, 2024.

Vakacava eda vakadeitaka ni na vinaka na ka era na cakava na daunipolitiki ena gauna se bera mai? O cei eda rawa ni nuitaka?

Qarauna o cei o nuitaka

E vinaka meda qarauna o cei meda nuitaka. E kaya na iVolatabu “na tamata yalowai e vakabauta na vosa kece, ia o koya e yalomatua e vakasamataka na nona ilakolako kece.”​—Vosa Vakaibalebale 14:15.

•  Mo kila eso na vakatutu yaga mo kila kina na itukutuku dina kei na itukutuku lasu, wilika na ulutaga “Mo Kua ni Vakacalai ena iTukutuku Lasutaki.”

Kena ikuri, o ira mada ga na daunipolitiki e vinaka na nodra inaki ra qai sasaga tiko ena nodra vinaka kece, e vakaiyalayala ga na ka era rawa ni cakava. Sa rauta me veivakasalataki na iVolatabu:

•  “Kua ni nuitaki ira na iliuliu vakatamata, e sega ni dua ena vakabulai iko.”​—Same 146:​3, Good News Translation.

Na iliuliu o rawa ni nuitaka

E kaya na iVolatabu na Kalou sa lesi Jisu Karisito na iliuliu nuitaki, ena cakava tale ga e levu na ka. (Luke 1:​32, 33) Ena Tui ni Matanitu ni Kalou o Jisu, qai veiliutaki mai lomalagi.​—Maciu 6:10.

•  Mo kila na vuna o rawa ni nuitaki Jisu kei na sala ena walia kina na noda leqa, wilika na ulutaga “O Cei na Tui ni Matanitu ni Kalou?” kei na “Na Cava ena Cakava na Matanitu ni Kalou?”