Vakacava ke Rau Veisere na Noqu iTubutubu?

Dua na ituvaki dredre era dau sotava na itabagone ni rau veisere na itubutubu. Cava o rawa ni cakava mo vosota kina na rarawa qori?

Ena veivosakitaki ena ulutaga qo

• Tolu na ka mo kua ni cakava

• Tolu na ka o rawa ni cakava

• Ka era kaya nomu icaba

Tolu na ka mo kua ni cakava

1. Kua ni beitaki iko

“E dau tukuna vei au o Na ni nodrau veileqaleqati kei tamaqu a tekivu sara ga na gauna au sucu kina, au nanuma kina niu vakaleqa nodrau bula vakawati​—Diana.

Ka mo nanuma: E sega ni beitaki vei iko na nodrau veisere nomu itubutubu. E rau vakavuna ga na leqa ni nodrau bula vakawati. O sega ni vakavuna nodrau leqa, o na sega tale ga ni walia rawa. E nodrau tavi sara ga me rau walia na leqa ni nodrau bula vakawati.

2. Kua ni katona na ca

“Au cudruvaki tamaqu vakalevu ni tawayalodina vei tinaqu. Ena taura na gauna meu na nuitaki koya tale.”​—Rianna.

Ka mo nanuma: O rairai cudru vakalevu qai rarawataki rau vakalevu nomu itubutubu, ia e tiko na vuna vinaka o cudru kina. Ia e sega ni vinaka na katona na ca. Ena rawa ni vakararawataka nomu bula vakayago qai vakararawataka na lomamu. Nida katona na ca e vaka ga ni dua e gunuva na poisoni qai namaka tiko mena vakaleqa e dua tale.a

3. Vakatitiqataki ni rawa ni marautaki na nomu bula vakawati

“Au lomaleqataka niu na cakava tale ga na ka e cakava o Ta. Au rere gona ni vakawati qai vakaluveni deu qai veisere tale ga me vakataki rau na noqu itubutubu.”​—Jessica.

Ka mo nanuma: Ke leqa nodrau bula vakawati na nomu itubutubu sega ni kena ibalebale ya ni na rawa tale ga ni leqa nomu bula vakawati. Koya gona, e tiko eso na ka yaga o rawa ni vulica mai na nodrau ivakaraitaki na nomu itubutubu. Kena ivakaraitaki ena vukei iko qori mo yadrava eso na itovo e vinakati me tiko vua o na via vakawatitaka. Ni leqa na nodra vakawati na nomu itubutubu ena rawa sara ga ni vukei iko mo bucina eso na itovo ena rawa ni vukei iko mo dua na tagane se yalewa vakawati vinaka.

Tolu na ka o rawa ni cakava

1. Veivosaki. O ira na dau kubuta lo na veika e tu e lomadra, e rawa nira lai vakayacora sara na itovo veivakaleqai me vaka na kena vakayagataki vakasivia ni alakaolo kei na wainimate gaga. Me kua ni yaco qori, tovolea mada qo:

Veivosaki kei rau na nomu itubutubu. Ke saga e dua vei rau na nomu itubutubu se o rau ruarua me okati iko ena nodrau leqa, tukuna vakavinaka ena yalomalua na sala e tarai iko tiko kina na nodrau veileqaleqati. Ke dredre mo veivosakitaka qori kei rau, o rawa ni volavola ga.

Veivosaki kei na dua na itokani nuitaki. Ni dua e tu vakarau me rogoci iko, ena rawa sara ga ni solia vei iko e dua na vakacegu levu. E kaya na iVolatabu: “Na itokani dina e loloma ena veigauna, e tacida ena gauna ni rarawa.”​—Vosa Vakaibalebale 17:17.

Talaucaka na lomamu vua na Dauveibuli. Na “Daurogo masu” na Kalou o Jiova, ena tu vakarau me rogoci iko ena veigauna. (Same 65:2) E kaya na iVolatabu ni o rawa ni ‘biuta vua na nomu lomaocaoca kece, ni kauaitaki iko o koya.’​—1 Pita 5:7.

• O cei vei rau na nomu itubutubu e rawa ni drau veivosaki vakavinaka ena yalomalua?

• O cei na itokani nuitaki (dua drau tabavata se qase vei iko) e rawa ni rogoci iko qai vakayaloqaqataki iko?

• Na ituvaki cava soti o rawa ni masulaka?

2. Yalorawarawa ni cakava na veisau

Ni rau veisere na nomu itubutubu ena vinakati mo vakamatauni iko ena so na ka me vaka na vale vou, veisau nomu koronivuli, veisau tale ga na levu ni ilavo mo dou bula kina kei na nomu itokani. Qori e rawa sara ga ni vakavuna nomu nuiqawaqawa kei na lomaocaoca, o na vakila tale ga ni veisautaka sara ga na nomu bula. Na cava ena vukei iko mo vakamatauni iko ena veiveisau? Saga mo kauaitaka tiko ga na sala o rawa ni matau kina.

• Na veisau levu cava o cakava ena nomu bula ni rau veisere na nomu itubutubu?

• Na cava o rawa ni cakava me vukei iko ni yaco na veiveisau?

3. Kauaitaka na ka o vinaka kina

Na nodrau veisere na nomu itubutubu e rawa sara ga ni vakavuna na nomu nuiqawaqawa. Ia ena vakavulici iko mo marautaka na veika o vinaka kina. Ena rawa tale ga ni vukei iko mo bucina eso na itovo vou. E dua na cauravou o Jeremy, e rau veisere na nona itubutubu ni se yabaki 13. E kaya :“Nodrau veisere na noqu itubutubu e vukei au meu nuitaki vakalevu. Me vaka niu qase duadua e vinakati meu vukei Na qai tokoni ratou tale ga na taciqu.”

• Ena vuku ni ituvaki e rau sotava na nomu itubutubu, na veiveisau cava o raica ena nomu bula?

• Na itovo cava o na via vakavinakataka?