Cava Mo Cakava Mo Kila Vinaka Kina na iVolatabu?

Kena iSau Vakaivolatabu

E vakamacalataki ena iVolatabu na ka mo cakava mo kila vinaka kina. Se mani vakacava nomu isususu, na itukutuku ni Kalou ena iVolatabu ‘e sega ni dredre sara, se mo sega ni yacova rawa.’—Vakarua 30:11.

Ka mo cakava mo kila vinaka kina na iVolatabu

1. Rai donu. Mo ciqoma na iVolatabu ni Vosa ni Kalou. Mo yalomalumalumu, ni cati ira na viavialevu na Kalou. (1 Cesalonaika 2:13; Jemesa 4:6) Me kua ni tiko vei iko na vakabauta vakamataboko, ni vinakata na Kalou mo vakayagataka na ‘nomu vakasama.’—Roma 12:1, 2.

2. Kerea na vuku. E kaya na iVolatabu ena Vosa Vakaibalebale 3:5, “Mo kua ni vakararavi ena nomu yalomatua.” Ia mo “kerea tiko ga vua na Kalou” na vuku mo kila vinaka na iVolatabu.—Jemesa 1:5.

3. Vulica wasoma. Ena levu sara na ka o kila ni o vulica wasoma na iVolatabu ni vakatauvatani kei na nomu vulica vagauna.—Josua 1:8.

4. Vulica vakaiulutaga. Ena yaga dina na ka o vulica ena iVolatabu ke o vulica vakaiulutaga, oya mo dikeva vinaka na ka e tukuna na iVolatabu ena dua na ulutaga se usutu. Mo tekivu mada ena ‘imatai ni lesoni’ qai ‘toso tiko ga i liu ina ivakavuvuli matua.’ (Iperiu 6:1, 2, Easy-to-Read Version) O na raica ni o rawa ni veidutaitaka na veitikinivolatabu mo kila na kedra veisemati, vakabibi na veitikina e “kilakilai dredre.”—2 Pita 3:16.

5. Ciqoma na veivuke. E uqeti keda na iVolatabu meda ciqoma nodra veivuke na kila vinaka na iVolatabu. (Cakacaka 8:30, 31) O ira na iVakadinadina i Jiova era dau veivakavulici wale ena iVolatabu. Me vakataki ira na lotu vaKarisito taumada, era vakayagataka na idusidusi vakaivolatabu mera vukea kina e levu mera kila na ka e tukuni ena iVolatabu.—Cakacaka 17:2, 3.

Ka e sega ni bibi

1. Vuli vinaka. Eratou kila na iVolatabu na le 12 na yapositolo i Jisu ratou qai veivakavulici kina. Ia era tukuna eso ni ratou “sega ni vuli vinaka sara ratou qai tauvanua ga.”—Cakacaka 4:13.

2. iLavo. O rawa ni vulica wale na iVolatabu. E kaya o Jisu vei ratou nona tisaipeli: “E soli wale vei kemudou, dou solia wale tale ga.”—Maciu 10:8.