Kilai ni iVolatabu—Na Cava ena Vakarawarawataka?
“KO SA vunia na veika oqo vei ira na vuku kei na yalomatua, ko ni sa vakatakila ga vei ira na gone lalai.” (Luke 10:21) Na veivosa e cavuta oqori o Jisu vei Tamana vakalomalagi e vakaraitaka ni dodonu me tiko vei keda na rai donu kevaka eda via kila na iVolatabu. E vakatakilai na vuku i Jiova ena nona vakarautaka e dua na ivola era na kila na ka e tukuni kina o ira ga na yalomalumalumu, kei ira era vinakata mera vakavulici.
E dau ka dredre toka vei keda e levu meda yalomalumalumu. Vakauasivi nida sucukaya kece mai na gagadre ni via dokai. Kuria, eda bula tu oqo ena iotioti ni veisiga da qai maliwai ira tu “era . . . dau lomani ira vaka i ira . . . sega ni ririko ni ra cakava e dua na ka, ka ra na dokai ira ga vakai ira.” (2 Timoci 3:1-4, VV) Na itovo vaka oqori e latia na noda saga meda kila na Vosa ni Kalou. E ka ni rarawa ni rawa ni takavi keda tale ga na nodra yalodokadoka o ira eda bula veimaliwai. O koya gona, o na rawata vakacava na itovo ni rai e gadrevi taumada me tiko vei iko mo rawa ni kila kina na iVolatabu?
Vakarautaka na Lomada kei na Noda Vakasama
O Esera a dau liutaki ira na tamata ni Kalou ena gauna makawa, a “vakarautaka oti na lomana . . . me vakasaqaqara e na vunau i Jiova.” (Esera 7:10) E tiko beka na ka meda cakava me rawa nida vakarautaka kina na lomada? Io. Rawa ni tekivu sara ga ena noda taurivaka na rai donu me baleta na iVolatabu. A vola vei ira na nona itokani lotu Vakarisito na yapositolo o Paula: “Ni dou a vakabauta na vosa ni Kalou dou a rogoca maivei keitou dou sa sega ni vakabauta me vaka e vosa ni tamata, me vaka ga na kena dina, na vosa ni Kalou.” (1 Cesalonaika 2:13) Dina ni a taurivaki e so na tagane mera vola na iVolatabu, ia na veika era vola e lako mai vei Jiova. Na noda vakabauta na tikina bibi oqo ena vakarawarawataka meda ciqoma na veika eda wilika ena iVolatabu.—2 Timoci 3:16.
Dua tale na sala eda rawa ni vakarautaka kina na lomada, oya na noda dau masu. A volai na iVolatabu ena veiuqeti ni yalo tabu, e macala ni na rawa ni vakayagataka tale ga na Kalou na yalo tabu oqori me vukei keda meda kila na iVolatabu. O koya gona, meda kerea ena masu na veivuke ni yalo tabu. Dikeva na nona kauaitaka na tikina oqo na daunisame ena nona vola: “Mo ni vakavukui au kina, ka’u na qai cakava na nomuni vunau; io, ka’u na vakabauta e na lomaqu taucoko.” (Same 119:34) Ena gadrevi kina meda kerea ena masu na vuku, kei na ivakarau ni yalo, ena vakarawarawataka na noda ciqoma na ka e kaya na iVolatabu. Io, ke da vinakata meda kila na iVolatabu, ena gadrevi meda taleitaka na ka dina.
E macala ni na vinakati mo vakananuma vakatitobu na ka me rawa ni donu kina na nomu rai. De vinaka mo vakasamataka tale ga se na vukei iko vakacava na nomu vulica na iVolatabu. Levu sara tu na vuna vinaka e dodonu meda wilika kina na Vosa ni Kalou, ia o koya e bibi duadua oya ni na vukei keda meda toro voleka vua na Kalou. (Jemesa 4:8) Nida wilika na ka e cakava o Jiova ni duidui na ituvaki e sotavi, na nona mareqeti ira era lomani koya, kei na ka e cakava vei ira era biuti koya, e vakavotui kina se Kalou vakacava o koya. E dodonu me inaki levu duadua ni noda wilika na iVolatabu, oya meda veikilai vinaka kei na Kalou qai vaqaqacotaka tale ga na noda veiwekani kei koya.
Na Veika e Rawa ni Latia na Rai Donu
Na cava e dua na ka ena rawa ni latia na noda kila na Vosa ni Kalou? Dua na ka e dau vakalatilati, oya na noda solia taucoko na noda dina ina dua na ka, se ina dua na tamata. Taura mada, rairai o dau doka vakalevu na nodra vakabauta kei na nodra rai e so. Ia, vakacava ke ra sega ni tokona se vakamareqeta o ira oqori na ka dina ena Vosa ni Kalou? Ena ituvaki oqo ena rairai ka dredre toka na kilai ni ka dina e vakavuvulitaka na iVolatabu. Sa rauta me uqeti keda na iVolatabu meda vakadeuca vinaka sara na veika eda sa vakavulici kina.—1 Cesalonaika 5:21.
A sotava tale ga na ituvaki vaka oqori o Meri na tina i Jisu. E susugi o Meri me doka na nodra itovo vakavanua na Jiu. A doka na Lawa a soli vei Mosese, qai sega ni vakabekataki ni a dau lako tale ga ina nodra valenilotu. Ni sa qase cake sa qai raica rawa o Meri ni ivalavala ni sokalou rau a vakavulica vua na nona itubutubu e sa sega ni vakadonuya na Kalou. Mani ciqoma o Meri na ivakavuvuli i Jisu qai yaco me dua vei ira na isevu ni lewe ni ivavakoso lotu Vakarisito. (Cakacaka 1:13, 14) E sega ni kena ibalebale kina oqori ni beci rau na nona itubutubu se na nodra itovo vakavanua na Jiu, ia, e ivakaraitaki ni nona lomana na Kalou. Kevaka eda vinakata me yaga vei keda na iVolatabu eda na sega ni solia na noda dina vua e dua na tamata se ina dua na ka, ia eda na vakatotomuri Meri ga ena noda solia noda dina vua na Kalou.
E ka ni rarawa, ni levu na tamata era dau vakalailaina na ka dina ena iVolatabu. So era lomavakacegu mera muria ga na ivalavala ni qaravi Kalou e yavutaki ena ivakavuvuli lasu. So tale, e votu ena nodra ivosavosa kei na ivakarau ni nodra bula nira sega ni doka na ka dina. Macala gona ni noda ciqoma na ka dina ena iVolatabu e kena ibalebale nida na tu vakarau meda bolea e so na ituvaki: Era na rairai cati iko na nomu itokani, o ira oni tiko veitikivi, cakacaka vata, kei ira sara mada ga na lewe ni nomu vuvale. (Joni 17:14) Ia, na vuku o Solomoni a vola: “Mo volia na dina, ka kakua ni volitaka.” (Vosa Vakaibalebale 23:23) Ke o mareqeta na ka dina, o Jiova ena vukei iko mo kila na iVolatabu.
Dua tale na ka e rawa ni latia na noda kila na itukutuku ni iVolatabu, oya ni sega ni lomada meda bulataka. O Jisu a kaya vei iratou na nona tisaipeli: “Ni sa soli vei kemudou mo dou kila na veika vuni ni matanitu vakalomalagi, ia ka sega ga ni soli vei ira. Ni sa uro mai na lomadra na tamata oqo, a sa didivara na daligadra.” (Maciu 13:11, 15) Levu a vunau vei ira o Jisu era sega ni via vakarorogo se veisau. E duidui vakalevu sara oqo kei na tamata dauveivoli a vakamacalataka o Jisu ena dua na nona vosa vakatautauvata! Ni sa kunea na tamata dauveivoli na mataniciva talei sara, a bolea me volitaka na ka kece sa tu vua me volia kina. E dodonu me vaka sara tale ga oqori na kena talei vei keda na noda kila na iVolatabu.—Maciu 13:45, 46.
E Dredre ke Da Sega ni Via Vakavulici
Dua na ka e vakadredretaka sara na noda kila na iVolatabu, oya kevaka eda sega ni vinakata meda dau vakavulici. Na tamata vaka oqori ena rairai dredre ni ciqoma na vakasama vovou e vakavulici vua, vakauasivi ke sega ni vuli o nona qasenivuli. Ia, o ira mada ga na yapositolo i Jisu Karisito era “sega so ni vuku, se tamata vuli.” (Cakacaka 4:13) E vakamacalataka o Paula na vuna, ena nona vola: “Ni dou sa raica, na veiwekani, na kenai valavala ni nomudou kacivi, ni sa sega ni lewe vuqa era sa vuku vakayago, sa sega ni lewe vuqa era sa kaukauwa, sa sega ni lewe vuqa era sa turaga me sa kacivi: ia sa digitaka na Kalou na veika vakalialia e vuravura, me vakamaduataki ira na vuku.” (1 Korinica 1:26, 27) Ke dua o iko o vakila ni dredre mo yalomalumalumu ni sega ni vuli nomu qasenivuli, mo nanuma deivaki ni o nomu qasenivuli e isuwai ga ni cakacaka, e vakavulici iko tiko na Kalou. E dua dina na ka dokai me vakavulici keda o Jiova, na noda “Dauveivakavulici Levu.”—Aisea 30:20, NW; 54:13.
O Neamani, na turaganivalu ni Siria a kunea ni dredre vua me ciqoma na nona veidusimaki e dua e lolovira. A vinakata me vakabulai mai na nona vukavuka, mani gole me lai raici Ilaisa na parofita i Jiova. Ia, e dua na bobula a lai vakasavuya na ivakaro ni Kalou vei Neamani. Na itukutuku a vakasavui kei na sala e vakasavui kina, e vakadredretaka sara ga vei Neamani me ciqoma ena yalomalumalumu na veidusimaki oya. Taumada, a bese ni muria na nona vosa na parofita ni Kalou. E muri, sa qai veisautaka na nona rai, a mani bula kina. (2 Tui 5:9-14) Eda na sotava na ka ni bolebole vaka oqori nida vulica na iVolatabu. Sega ni vakabekataki nida na vulica kina ni kevaka eda vinakata meda vakabulai vakayalo, me vinaka tale ga na noda itovo, ena gadrevi meda muria e dua na ivakarau ni bula vou. Eda na yalomalumalumu beka meda vakadonuya e dua me vakavulici keda ena ka meda cakava? O ira wale ga e rawarawa nira vakavulici era na rawa ni kila na iVolatabu.
A vakaraitaka na rai donu na matanivanua i Kadasi na nodra ranadi na kai Iciopea. A suka tiko o koya i Aferika ena nona qiqi ena gauna a cicimuri koya yani kina na tisaipeli o Filipi me vosa vua. Sa qai tarogi koya o Filipi se sa kila na ka e wilika tiko. Nona yalomalumalumu na turaga ni Iciopea oqo a sauma kina: “Au sa rawata vakaevei, kevaka sa sega e dua me tuberi au?” A yaco o koya me kila na Vosa ni Kalou, mani papitaiso sara. Oti oya, a “lako e nona sala ko koya ka reki tiko.”—Cakacaka 8:27-39.
E levu na iVakadinadina i Jiova era tauvanua ga, ra sega ni tamata rogo. Ia, e veimacawa era vakayaco vuli iVolatabu ena nodra vale e sivia na ononamilioni na tamata. Na iVolatabu e vakavulica na ivakarau ni bula totoka duadua, e vakamacalataka na inuinui duadua ga ni kawatamata, qai dusimaki keda ena sala meda veikilai vinaka kina kei na Kalou. Era vakadinadinataka gona e vica na milioni na tamata ni ka marautaki na vulici ni iVolatabu kei na noda kila na ka e tukuni kina. Io, e rawa nida marautaka kece na kila na iVolatabu.
[iYaloyalo ena tabana e 7]
A sega ni rawarawa vei Neamani me ciqoma na nona veidusimaki e dua na bobula
[iYaloyalo ena tabana e 7]
E uqeta na lomada na noda kila na iVolatabu