E Tiko Nodra Lawa na iVakadinadina i Jiova me Baleta na Veibuku?

Keimami vakabauta na iVakadinadina i Jiova ni na yaga vei keda kece na ivakavuvuli, kei na ivakaro ena iVolatabu nida vakatulewa. Qori ena vakamarautaka na Kalou, ena yaga tale ga vei keda kece. (Aisea 48:17, 18) Keimami sega ni bulia na ivakavuvuli kei na ivakaro, ia keimami bulataka sara ga. Raica se yaga vakacava qo ena veika e vauca na veibuku.a

• Na vakawati e dei na kena veidinadinati. (Maciu 19:6) Keimami raica vakabibi na iVakadinadina i Jiova na veibuku ni qori ena tini ena vakawati.

• Era veibuku ga o ira sa tu vakarau mera vakawati. O ira qori sa ‘oti nodra gauna vakaitabagone,’ se ra sa sivita na gauna e kaukaua kina na gagadre ni veiyacovi.—1 Korinica 7:36.

• E rawa nira veibuku o ira na sa galala mai na ivau ni vakawati. Eso e vakalawataki nodra veisere, ia ena rai ni Kalou e sega ni dodonu mera vakawati tale, ni yavu ga vakaivolatabu ni veisere na veibutakoci.—Maciu 19:9.

• Era vakaroti na lotu vaKarisito era via vakawati mera digia ga e dua era vakabauta vata. (1 Korinica 7:39) Era kila na iVakadinadina i Jiova ni muri ni vakaro qo e baleti ira na lewenilotu era papitaiso ra qai muria na kena ivakavuvuli, sega ni dua e doka tu ga na nodra vakabauta. (2 Korinica 6:14) E dusimaki ira na nona dauveiqaravi na Kalou mera vakawati ga kei ira era vakabauta vata. (Vakatekivu 24:3; Malakai 2:11) Era vakadinadinataka tale ga qori o ira na dauvakadidike nikua.b

• E dodonu mera talairawarawa na gone vei ira na nodra itubutubu. (Vosa Vakaibalebale 1:8; Kolosa 3:20) Kena ibalebale, ni dodonu vei ira na gone era se tiko e vale mera talairawarawa vei ira nodra itubutubu ena ka e vauca na veibuku. Okati kina o ira na sa yacova na kena yabaki.

• Nira muria na ivakavuvuli vakaivolatabu, era na vakatulewataka sara ga na ka me baleta na veibuku. Qori e salavata kei na tikinivolatabu qo: “Nida na dui colata ga na noda itavi.” (Kalatia 6:5, ivakamacala e ra) E levu era kerea na nodra ivakasala na iVakadinadina era matua, era kauaitaki ira dina.—Vosa Vakaibalebale 1:5.

• Levu na itovo e dau caka ena gauna ni veibuku e tini ena ivalavala ca bibi. Kena ivakaraitaki, e vakarota na iVolatabu ni tabu na veiyacovi tawadodonu. E okati kina na ivalavala tale eso me vaka na vakayagoi ni yago tabu, vakayagataki ni gusu kei na sala ni valelailai ena veiyacovi. (1 Korinica 6:9-11) E cata na Kalou na “ivalavala dukadukali,” na itovo veivagarogaroi e vakayacori ni bera na vakawati. (Kalatia 5:19-21) E sega ni tokona na iVolatabu na veitalanoa vakasisila, e okati qori me “vosa vakasisila”.—Kolosa 3:8.

• E dauveivakaisini na loma ni tamata. (Jeremaia 17:9) E rawa ni uqeta e dua me vakayacora na itovo dukadukali. Me kua ni yaco qori, de vinaka me rau kua ni tiko taurua, me rau veibuku nira tiko lewe levu se me dua na kedrau ikatolu. (Vosa Vakaibalebale 28:26) Ena kila tale ga na lotu vaKarisito dawai na rerevaki ni veibuku ena internet, vakabibi ni via veivosaki kei na dua e rau sega ni veikilai vinaka sara.—Same 26:4.