Na Rai ni iVolatabu

Veibuku e Kena iNaki na Vakawati

Rau veibuku tiko o Julie kei Lee rau qai nakita me rau savasava tiko ga.a Ni rau tiko taurua ena dua na yakavi, a kaukaua sara nodrau gagadre ni veiyacovi. Erau kidava totolo qori, rau sega ni tini kina ena cala bibi.

E SEGA wale ga ni okati ena sokalou dina noda tiko ena soqoni e veimacawa. E ivakarau sara ga ni noda bula, e lewa na noda itovo kei na noda rai. Me vaka e tukuna o Jisu Karisito ni o ira ga na “cakava na loma” ni Kalou era na vakadonui. (Maciu 7:21) Me marau na Kalou, e bibi me savasava noda dau veimaliwai na tagane kei na yalewa, o ira tale ga na veibuku me nodra inakinaki na vakawati.

Ena savasava vakacava vua na Kalou na veibuku, vakabibi ke o temaki mo cakava na ivalavala dukadukali? Kena imatai, mo kila tiko ni ivakatagedegede e kotora na Kalou e ivakaraitaki ni nona kauaitaki keda. Kena ikarua, mo kua ni vakalecalecava na ka dina me baleti keda na tamata. Kena ikatolu, mo vakadeitaka na itovo savasava mo muria. Kena ikava, mo okati Jiova tale ga ena nomu veibuku. Meda veivosakitaka mada na veitikina qo.

iVakatagedegede e Yaga vei Keda

Eda wilika ena Aisea 48:17, 18: “Koi au ko Jiova na nomu Kalou, kau sa vakavulici iko mo vinaka kina, ka’u sa tuberi iko e na sala mo lakova. De ko a vakarorogo ki na noqu vunau! sa na qai vaka na uciwai na nomu vakacegu, ka vaka na ua ni wasawasa na nomu cakacaka dodonu.”

Io, na ivakaro kei na ivakavuvuli ena Vosa ni Kalou e volai me yaga vei keda. (2 Timoci 3:16, 17) Qo e ivakadinadina levu ni kauaitaki keda na Dauveibuli, e vinakata meda marau, me vinaka tale ga noda bula. (Same 19:7-10) O duavata kei na tikina qori? Ke vakakina o sa vakaraitaka tiko na vuku dina.

Kila Vinaka na Ka e Matau Vei Keda

O Jiova e itokani dina, ni tukuna sara ga na ka dina me baleti keda. Kena ivakaraitaki, eda vakasalataki ena nona Vosa ni “ka dauveivakaisini duaduaga na yalo ni tamata, ka sa dredre ni vinaka: ko cei me kila rawa?” (Jeremaia 17:9) E tukuna tale ga na iVolatabu: “O koya sa vakararavi ki na lomana sa lialia: ia ko koya sai valavala vakavuku, ena vakabulai.”​—Vosa Vakaibalebale 28:26.

Rau na vakaraitaka vakacava na veibuku tiko ni rau nuitaki rau ga? Dua, ena nodrau vakalaiva me rau temaki ena so na iwalewale ni veidomoni, me vaka eda wilika mai cake. Kena ikarua, nodrau vakawaletaka na ivakasala vuku ni itubutubu era rerevaka na Kalou. Era kila na itubutubu ni kaukaua sara na gagadre ni veiyacovi ena gauna vakaitabagone, e tautauvata kei na dua na misini kaukaua qai dredre me lewai vinaka.

Koya gona era na rogoca na ivakasala ni nodra itubutubu na itabagone era ‘muria na vuku vakalou.’ Era na taura vakabibi na ivakasala vakayalololoma ni nodra itubutubu, kevaka mada ga era sega ni taleitaka. Io, e lomani iko vakalevu na Tamamu vakalomalagi o Jiova, e vakasalataki iko mo ‘biuta tani mai lomamu na ka rarawa, kei na ca mai na yagomu.’ (Dauvunau 11:9, 10) O na cakava vakacava qori? Nomu vorata na gagadre ca.

Muria na iTovo Savasava

‘O ira sa vakavulici vinaka sa nodra ga na vuku.’ (Vosa Vakaibalebale 13:10) Ni tekivu nodrau veibuku, rau na vakadeitaka na veitau yalomatua me rau na vakaraitaka nodrau veitaleitaki ena kena ivalavala ga vakaivolatabu, rau na vakadeitaka tale ga na vanua me yala kina. Na kena vakatarai eso na ivalavala ni veidomoni se nomu nanuma ni o na sega ni vakaleqai kina, e tautauvata sara ga kei na dua e draiva vakalialia. Ena sega ni yaga nomu saga mo muria na lawa ni gaunisala ena gauna o sa coqa kina!

E tukuna na iVolatabu: “Na tagane [se yalewa] yalomatua ena vunitaki koya ni raica na ca. Ia o koya e sega, ena lako tu ga yani qai sotava na leqa.”(Vosa Vakaibalebale 22:3, The New English Bible) Rau na vorata na ca na veibuku tiko ke rau maliwai ira era taleitaka na ivakatagedegede savasava se ra itokani nuitaki. Ia ke rau via cakava ga na ka ca, ena vakaleqa nodrau lewaeloma, rau sega ni veidokai, ena vakarogorogocataka tale ga nodrau dui matavuvale kei ira tale na so. Koya gona, mo yalomatua mada ga qai muria deivaki na ivakatagedegede vakaivolatabu!

Me ‘iKatolu ni Dali’ o Jiova

Na vakawati e tautauvata kei na dali turai tolu, me kena ikatolu kei na kena ivakadei o Jiova. “Na dali e turai-tolu ena sega ni cavuka rawarawa,” e kaya na Dauvunau 4:12. E dina tale ga qori vei ira na veibuku tiko. Ke ra vinakata na veivakalougatataki ni Kalou, e dodonu mera veiwekani voleka kei koya. E tukuna na Same 1:1-3: “Sa kalougata na tamata sa sega ni muria tiko na nodrai vakavuvuli na tamata ca . . . Ia ka sa marau tiko e na vunau i Jiova; a sa vakananuma tiko na nona vunau e na siga kei na bogi . . . , na ka kecega sa cakava ko koya ena yaco.”

Io, ena vakainaki na bula qai vinaka tale ga na veibuku kei na vakawati ke muri na sala i Jiova. Me qai sega vakacava, ni Dauveibuli sara ga o koya qai nona isolisoli talei na veidomoni kei na vakawati. E dodonu gona me dokai.​—Jemesa 1:17.

[iVakamacala e ra]

O BAU VAKASAMATAKA?

● Eda kila vakacava ni vinakata na Kalou na ka vinaka duadua vei keda?​—Aisea 48:17, 18.

● Na ka dina cava meda kila me baleti keda?​—Jeremaia 17:9.

● Na cava me caka me savasava kina na veibuku kei na vakawati?​—Same 1:1-3.

[iYaloyalo ena tabana e 27]

Ni tekivu nodrau veibuku, rau na vakadeitaka na veitau yalomatua me rau na vakaraitaka nodrau veitaleitaki ena kena ivalavala ga vakaivolatabu, rau na vakadeitaka tale ga na vanua me yala kina