Era le Vica na iVakadinadina i Jiova e Veiyasa i Vuravura?

O cei e wili mera lewenilotu?

Era vakatokai ga mera iVakadinadina i Jiova o ira na gumatua ni vunautaka e veivula na itukutuku vinaka ni Matanitu ni Kalou. (Maciu 24:14) Qori era wili kina o ira sa papitaiso mera iVakadinadina kei ira era se bera ni papitaiso, ia era sa rawata na ivakatagedegede mera vakaitavi ena cakacaka vakavunau.

E gadrevi me cau vakailavo e dua ke via lewenilotu?

Sega. E sega ni gadrevi me cau e dua me vakatokai kina me iVakadinadina i Jiova, se me soli kina vua e dua na itavi se ilesilesi ena neimami isoqosoqo. (Cakacaka 8:18-​20) E levu mada ga na cau e sega ni kilai se o cei e solia. Na nona vakayagataka e dua na iVakadinadina i Jiova nona gauna, igu, kei na iyau me tokoni kina neimami cakacaka e vuravura raraba, e vakatau sara ga vua kei na kena ituvaki.—2 Korinica 9:7.

Oni kila vakacava e vica era vakaitavi tiko ena cakacaka vakavunau?

E veivula, era ripotetaka na iVakadinadina i Jiova ena veivavakoso era lewena na nodra cakacaka vakavunau. Era sega ni vakasaurarataki mera cakava qori.

E dau tuvanaki matau na ripote ni vavakoso, ni sa kumuni taucoko na kena iwiliwili sa qai dau vakau ena Vale ni Volavola. Na Vale ni Volavola sa qai vakauta ena tikotiko liu e vuravura ni iVakadinadina i Jiova.

Ni oti na yabaki vakacakacaka ni soqosoqo,a sa qai dau kilai mai na iwiliwili levu taucoko ni veivanua yadua. Na iwiliwili qo sa qai dau kumuni vata me rawa ni kilai kina na iwiliwili kece e veiyasai vuravura. Na itukutuku matailalai me baleta na veivanua yadua e dau tabaki ena neimami website ena iwasewase na “Veiyasai Vuravura”. E dau veivakauqeti na itukutuku ni ripote qori, me vaka ga na kena dau uqeti ira na mataveitacini ena imatai ni senitiuri.—Cakacaka 2:41; 4:4; 15:3.

Era wili tale ga o ira na se bera ni vunau, ia era sa veimaliwai tiko kei kemuni?

Eda na sega ni wiliki ira beka mera iVakadinadina, ia keimami dau ciqomi ira ena noda ivavakoso. Levu vei ira qori era dau tikova na siga ni vakananumi ni mate i Jisu, e dau kilai na kedra iwiliwili nira tikova yani kei na kedra iwiliwili na iVakadinadina. Ena 2015, era tikova na ivakananumi e lewe 19,862,783.

Levu vei ira na dau sega ni tikova na noda soqoni era dau taleitaka mera vulivolatabu sega ni saumi. Ena loma ni 2015, e rauta ni lewe 9,708,968 na vulivolatabu a vakayacori e veivula, eso era vakavulici sara ga yadudua ena dua vata ga na gauna.

Cava e levu cake kina na iwiliwili ni iVakadinadina i Jiova e ripotetaka na tabana ni wili lewenivanua ni matanitu?

E dau vakatau na iwiliwili ni lewenivanua nira tarogi se lotu cava era lewena. Kena ivakaraitaki, e kaya na tabana ni wili lewenivanua e Merika “nira dau via kila ke ra lewena e dua na isoqosoqo lotu se sega.” Na iwiliwili tale ga qori “e vakatau ga ena ka era tukuna.” Ia era okati mera iVakadinadina i Jiova o ira ga era vunau, ra qai ripotetaka na nodra cakacaka. Era sega nira vakatokai wale ga kina.