RA TAROGA NA ITABAGONE
Au Dau Namaka Vakasivia na Ka?
Ke o
sega ni vinakata me dua na cala ena nomu pepa ni veitarogi
vakasuka e dua na ilesilesi vou ni o leqataka o na sega ni cakava vinaka
nanuma ni sega ni dodonu me vakalewai e dua na ka o cakava
. . . , de dua o sa namaka dina vakasivia na ka. Vakacava e dodonu mo kauaitaka na tikina ya?
Cava na kena ca?
E sega ni cala ke o solia nomu vinaka kece ena ka o cakava. Ia e kaya na ivola na Perfectionism—What’s Bad About Being Too Good?: “Dua na duidui levu e tiko ena noda saga meda kenadau ena ka eda cakava, kei na noda sasagataka na veika eda na sega ni rawata. Sega ni dua vei keda e uasivi, ena vakalomaocaocataki keda ga noda dau namaka vakasivia na ka.”
E tokona qori na iVolatabu ni kaya: “E sega ni dua na tamata yalododonu e vuravura me vakayacora tiko ga na ka vinaka qai sega ni valavala ca.” (Dauvunau 7:20) Ena sega ni vinaka tu ga e veigauna na veika eda cakava nida tamata ivalavala ca.
Ke dredre mo vakabauta ya, raica mada e va na sala e rawa ni vakaleqai iko kina nomu namaka vakasivia na ka.
Nomu rai me baleti iko. Sa rui cecere na ivakatagedegede era saga mera rawata o ira era dau namaka vakasivia na ka, era na rarawa ga kina. “Ena sega tu ga ni vinaka vakaoti na ka kece da cakava, ke da sa beci keda tu ga ni sega ni vinaka vakaoti na ka eda cakava, lakolako ga eda sa na datuvu. Qori ena vakavuna ga na rarawa.”—Alicia.
Nomu rai me baleta na ivakasala yaga. Ke vinaka mada ga na vakalelewa e caka, era dau nanuma o ira na namaka vakasivia na ka ni caka ya me vakacacani kina na kedra irogorogo. E kaya e dua na cauravou o Jeremy: “E dau ca sara ga vei au niu vakadodonutaki. Ke o namaka vakasivia na ka, o na sega ni vakadinata ni vakaiyalayala ga na ka o rawata, o na sega tale ga ni vinakata mo vukei.”
Nomu rai me baleti ira eso tale. E sega ni kurabuitaki na nodra dau veivakalewai o ira era namaka vakasivia na ka. E kaya e dua na goneyalewa yabaki 18 o Anna: “Ni o namaka me vinaka vakaoti na ka kece o cakava, ya tale ga na ivakatagedegede o na vinakata mera yacova eso tale. Nira sega ni yacova na ivakatagedegede qori, o na rarawataki ira tu ga.”
Nodra rai eso tale me baleti iko. Kua ni kurabui ke ra sega ni taleitaki iko eso tale ni o dau namaka vakasivia vei ira na ka! E kaya e dua na goneyalewa o Beth: “E veivakaocai na noda saga meda yacova nodra ivakatagedegede cecere o ira era namaka vakasivia na ka. E votivoti na tiko kei ira va ya!”
Rai donu
E kaya na iVolatabu: “Me kilai na nomuni yalorawarawa.” (Filipai 4:5) O ira era yalorawarawa era sega ni namaka vakasivia na ka me baleti ira, kei na veika me baleti ira eso tale.
“Levu na ka sa vakalomaocaocataki keda rawa tu. E ikuri ga ni lomaocaoca na noda namaka vakasivia na ka. Sa da na taqea dredre sara ga na lomaocaoca kece ya!”—Nyla.
E kaya na iVolatabu: “Mo yalomalumalumu . . . ni o lako vata kei na nomu Kalou!” (Maika 6:8) Era kila na yalomalumalumu ni vakaiyalayala na ka era rawata. Era na cakava ga na veika era rawata, era na sega ni vakalusi gauna ena itavi era sega ni cakava rawa.
“Keu via cakava vinaka na noqu itavi, meu ciqoma ga na itavi au na rawa ni cakava. Ni vakaiyalayala ga na ka au rawata.”—Hailey.
E kaya na iVolatabu: “Na ka kece e cakava na ligamu mo qarava ena nomu igu taucoko.” (Dauvunau 9:10) E sega ni vinaka na vucesa. O na sega ni namaka vakasivia na ka ke o dau gugumatua, yalorawarawa, qai yalomalumalumu.
“Au dau saga meu cakava vinaka na noqu cakacaka, meu solia kina noqu vinaka kece. Au kila ena sega ni vinaka vakaoti, ia au marau niu kila au solia kina noqu vinaka taucoko.”—Joshua.