Na Bula e Vinaka Vakaoti—E Sega ni Tadra Wale Ga!
Na vuravura uasivi—na cava beka na kena ibalebale? Raitayaloyalotaka mada e dua na vuravura e sega kina na basulawa, na vakayagataki ni wainimate gaga, na dausiga, na dravudravua, se na veivakaduiduitaki. Era bulabula vinaka kece na lewenivanua, e sega ni dua vei ira e lomabibi. Sa sega tale na rarawa se na luluqa ni yalo ni sa oti vakadua o mate. Ena veiganiti beka meda namaka e dua na vuravura vaka oya?
DINA ga ni sa toso sara tiko vakatotolo na ivakatagedegede ni bula ena toso ni saenisi kei na veika sa rawata na tamata, e levu era sega ga ni vakabauta ni na rawati na bula uasivi, na kena ena solia na veisaututaki kei na bula marau. Ena dua tale na yasana, e ivalavala ni tamata me tovolea me via vakavinakataka na veika e sa rawata kei na kena sagai na bula uasivi. Ena sega wale na betena me tatadrataki ga na bula uasivi, ni na sega ni vakavinakataki kina na ivakatagedegede ni nodra bula na dravudravua kei na leqa ni veivakavaletaki, ena sega tale ga ni vakacegui ira era leqa tu e dua na tikiniyagodra se o ira era tauvimate ena nodra gadreva vakaidina mera bau vakabulai mai na rarawa e bikai ira tu. Ena sega ni rawati rawa na bula uasivi mai na sasaga ga ni kawatamata. Dina ga nida se sotava tu oqo na rarawa kei na veivakalolomataki, ia, e tu na vuna vinaka meda vakabauta ni sa voleka na gauna ni bula uasivi.
Ena rawa ni votu mai vei iko na bula i Jisu Karisito ke o vakasamataka na bula uasivi. E sega ni tamata uasivi taudua ga o Jisu me bula e vuravura. Rau a buli o Atama kei Ivi me rau ucuya na Kalou, erau marautaka tale ga na bula uasivi e parataisi. Ia, erau vakayalia na bula totoka vakaoti oya ena nodrau a vorata na Tamadrau vakalomalagi. (Vakatekivu 3:1-6) Ia, na Dauveibuli a vakatikora vua na tamata na gagadre ni bula tawamudu. E vakadeitaka na Dauvunau 3:11 ni kaya: “Sa cakava na ka kece [na Kalou] me rairai vinaka e na kena gauna: ia sa vakatikora ki lomadra na gauna ena sega ni mudu, sa sega kina na tamata sa kunea rawa na cakacaka sa cakava na Kalou mai na kenai vakatekivu ka yacova na kenai otioti.”
Me vaka ni bula tawauasivi kei na ivalavala ca e vakamua na tamata “me ca” qai “[vei]vakabobulataki ki na rusa,” dikeva mada na vosa ni veivakacegui nona na yapositolo o Paula: “Ni sa gadreva vakalevu ko vuravura ka wawa tikoga me ra vakarairaitaki ko ira na luve ni Kalou. Ni sa vakamalumalumutaki ko vuravura me ca, a sa sega ni vinakata, e na vuku i koya ga sa vakamalumalumutaka, ni sa vakanuinui tiko ni na sereki talega ko vuravura mai na kena vakabobulataki ki na rusa, ka me lalaga tu ka vakaiukuukutaki vata kei ira na luve ni Kalou.” (Roma 8:19-21) E vakamatatataka na iVolatabu na isolisoli mai vua na Kalou me vakalesuya mai kina ina kawatamata na bula uasivi ena rawati ga ena vuku i Jisu Karisito.—Joni 3:16; 17:3.
Me ikuri ni inuinui totoka vakaoti oqori me baleta na veigauna mai muri, e tu kece vei keda na isolisoli meda toso kina vakayalo, ia meda vakaraitaka noda toso ena gauna sara ga oqo.
Tovolea me Veiraurau na Nomu Bula
Ena nona a vakabibitaka o Jisu Karisito na bula uasivi e kaya kina ina dua na ilala tamata levu: “O koya mo dou qai vinaka sara, me vaka sa vinaka sara na Tamamudou sa tiko mai lomalagi.” (Maciu 5:48) E namaka li o Jisu meda tawacala ena ituvaki carukaica eda bula donuya tu oqo? E sega. E dodonu meda taravaka cake na ivalavala ni dauveikauaitaki, ni yalovinaka, kei na veilomani vakaveiwekani, e dina ga nida dau lekata na caka vinaka. E dua sara mada ga na yapositolo i Jisu a vola: “Kevaka eda sa vakatusa na nodai valavala ca, sa yalodina ka yalododonu ko koya me bokoca na nodai valavala ca, ka vakasavasavataki keda mai na ka kecega sa sega ni dodonu. Kevaka eda sa kaya eda a sega ni valavala ca, eda sa vakalasui koya, a sa sega ni tu vei keda na nona vosa.”—1 Joni 1:9, 10.
Ia ena rawa nida vakavinakataka na ivakarau ni noda raici keda kei na ka eda cakava vei ira na tani, meda kua ga ni yalododonu sara vakasivia. O cei tale e rawa ni solia e dua na ivakarau ni bula vinaka e vakarauta ga, me tautauvata kei na kena e tu ena Vosa ni Kalou, na iVolatabu? Nida vakaitovotaki keda ena yalomarau kei na yalorawarawa, ena vukea na noda veimaliwai vinaka ena noda vanua ni cakacaka, vua na watida kei rau na noda itubutubu se o ira na luveda. E vakasalataki ira kina na lotu Vakarisito na yapositolo o Paula: “Dou reki tikoga vua na Turaga: au sa kaya tale, Dou reki. Me kilai na nomudou yalomalumalumu vei ira na tamata kecega.”—Filipai 4:4, 5.
Na Vinaka ni Bula e Veiraurau
Ni veiraurau ga na veika o namaka, ena vinaka vei iko kei ira tale ga na tani, o na sega kina ni vakila na rarawa se na yalo ni druka e dau tarai keda e vu mai na via vinaka vakaoti. Ni o kila na ka o rawa ni cakava, ena gadrevi me vakarauta na ivakarau ni nomu bula, me salavata kei na veika o via cakava. Nanuma tiko ni a buli keda na Kalou meda bula e vuravura, meda marautaka tale ga na cakacaka ena vakavinakataki keda kei ira eda bula vata tu.—Vakatekivu 2:7-9.
Kevaka o dau namaka vakasivia na ka, vakacava mo masulaka mada vei Jiova? O na kune vakacegu ke vakadonui iko na Kalou. E kila vinaka tu o Jiova na keda ibulicaki kei na bula ivalavala ca eda tu kina, ena sega kina ni rawa me tawaveinanumi se me dredre noda vakalomavinakataki koya. E vakadeitaka kina vei keda na daunisame: “Me vaka sa lomana na luvena e dua na tamata, sa lomani ira vakakina ko Jiova era sa rerevaki koya. Ni sa kila ko koya na nodai bulibuli; sa nanuma ga nida sa kuvu-ni-soso.” (Same 103:13, 14) Sa dodonu meda vakavinavinaka ena nona kauaitaki keda vakayalololoma na Kalou ena vuku ni keda ituvaki! E kila vinaka na veika eda lekata, ia ena rawa ni vakamareqeti keda me vaka na nodra dau vakademeni na gone itovo vinaka.
Ena ka vukutaki cake meda bucina na yalomatua vakayalo kei na rai e veiraurau, mai na kena tovolei me rawati na vinaka vakaoti! Kena ikuri, eda nuidei ni na sega ni rawa vua e dua me na tarovi Jiova rawa me vakayacora na lomana me na rawata kina na bula uasivi na kawatamata ena ruku ni veiliutaki ni Matanitu ni Kalou. Ia na cava sara mada na bula uasivi?
Vinaka Cake na Bula Uasivi Mai na Via Vinaka Vakaoti
E sega ni ibalebale ni bula uasivi na via vinaka vakaoti. Vei ira na vakalougatataki mera na bula ena Parataisi e vuravura ena ruku ni veiliutaki ni Matanitu ni Kalou era na sega ni dau dre ga na nodra mua, se dau via yalododonu vakasivia. E dua na ka e gadrevi meda rawa kina ni bulata na veivakararawataki levu oya na noda taleitaka mai vu ni yaloda na isoro ni veivoli, me vaka e vakamacalataka na yapositolo o Joni nira na kailavaka na isoqosoqo levu mai na veimatanitu: “A vu ni bula na noda Kalou, o koya sa tiko e nai tikotiko-vakaturaga, vua na Lami talega.” (Vakatakila 7:9, 10, 14) Era na vakavinavinakataka o ira kece era na bulata na veivakararawataki levu sa roro tiko mai na nona a soli koya na Karisito me mate ena vukudra kei ira kece era vakabauti koya. Na isoro e cabora ena dela ni yalololoma ena yavu ni nodra sereki tawamudu mai na bula tawasavasava kei na malumalumu.—Joni 3:16; Roma 8:21, 22.
Ena vakacava sara mada na bula uasivi? Ena isosomi ni veiqati kei na lomakocokoco na veilomani kei na veikauaitaki, ena qai vakainaki kina na bula ni sa na oti vakadua na nuiqawaqawa kei na yalolailai. Ia na bula uasivi ena sega ni ka ni voraki se me vakavucesa. E sega ni vakaraitaka na Vosa ni Kalou na matailalai ni veika e baleta na Parataisi, ia e tukuna ga se mataqali bula vakacava me na namaki kina: “A ra na tara vale, ka tiko kina; era na tea eso na were-ni-vaini, ka kania na vuana; era na sega ni tara, ka tiko kina na tamata tani, era na sega ni tea, ka kania na tamata tani: ia me vaka na kena dede e dua na kau ena vakakina na nodra gauna na noqu tamata, ia era na rekitaka vakadede na cakacaka ni ligadra ko ira na tamata ka’u sa digitaka. Era na sega ni oca walega, se vakasucu gone me ka ni rarawa vei ira.”—Aisea 65:21-23.
Eda na sega mada ni via leqataka ena gauna oqo na veika ena sotavi ena ituvaki vou ni Matanitu ni Kalou, me vaka na ka ni veivakalasai, vanua ni veivoli, veivakatorocaketaki, se na sala ni veilakoyaki, ia ena vinaka mo raitayaloyalotaka rawa oqo nomu na marautaka na vosa ni yalayala: “A wolifa kei na lami, erau na kana vata; ia na laioni, ena kania na lolo ni sila me vaka na pulumokau; ia na kuvu-ni-soso ena kena kakana na gata. Era na sega ni ia na veivakacacani se na veivakarusai e na noqu ulu-ni-vanua tabu kecega, sa kaya ko Jiova.” (Aisea 65:25) Ena duidui dina na bula uasivi mai na kena eda sotava tu nikua! Kevaka o iko e dua o kalougata mo na bula ena gauna oya, ena tiko na vuna vinaka mo nuidei kina ni na kauaitaka na Tamamu vakalomalagi na veika e baleti iko kei na nomu matavuvale. “Ia mo rekitaki Jiova; ena solia vei iko ko koya na ka sa gadreva na yalomu.”—Same 37:4.
Na bula uasivi e sega ni tadra wale ga. Ena vakayacori dina na inaki loloma i Jiova me baleta na kawatamata. Ena rawa vei iko kei ira tale ga na lewe ni nomu vuvale mo dou maliwai ira na rawata na bula uasivi, mo dou qai bula tawamudu ena vuravura vou ni Kalou. E sa yalataka tu na iVolatabu: “Era na taukena na vanua ko ira na yalododonu, ka tiko kina ka sega ni mudu.”—Same 37:29.
[iYaloyalo ena tabana e 6]
Ena rawa nida vakavinakataka cake na ivakarau ni noda dau raici keda kei ira na tani, meda kua kina ni via vinaka vakaoti se namaka vakasivia na ka
[iYaloyalo ena tabana e 7]
Vakacava mo sa raitayaloyalotaka rawa oqo ni o sa marautaka tiko na bula sautu kei na yalododonu e Parataisi?