Dina Niu Mamadua ia Au Sega Vakadua ni Veivutunitaka e Dua na Ka!

Au sucu ena 1934 e Pescara na siti e tiko ena tokalau kei Itali, ena wasawasa na Adriatic. Keitou le va na veitacini yalewa, au gone duadua. E vakayacani keitou o Ta ena veitaravi ni matua vosa. E tekivu ena “A,” na yacaqu gona e tekivu ena “D.”

E dau kauaitaka o Ta na veika vakayalo. Ena Julai 1943, a gole mai vale e dua na turaga o Liberato Ricci, e iVakadinadina i Jiova qai vakamacalataka vei Ta na iVolatabu e solia tale ga e dua na Vale ni Vakatawa. Oti ga vakalailai qori, e gumatua o Ta na wasea vei ira eso tale na ka e vulica tiko. A ciqoma tale ga na dina o Na, dina ni sega ni kila na wilivola ia e wasea rawa na nona inuinui vei ira eso tale. E kila vinaka eso na tikinivolatabu qai dau cavuta vei ira eso tale.

E ka lailai na neitou vale, ia e levu na ka e caka kina. Kena ivakaraitaki, e dau caka kina na soqoni. E rua ga kena rumu ni moce, ia ra dau vakaicili kina na ivakatawa ni tabacakacaka kei na painia.

Rau sega ni kauaitaka na tuakaqu na veika vakayalo. Toso na gauna, rau biubiu e vale me rau lai vakawati. Ia o yau kei na tuakaqu o Cesira keirau dau taleitaka na vakarogoci Ta ni wilika na iVolatabu. Keirau taleitaka tale ga na rogoca na nodra ivunau veiuqeti na tacida era sikova mai na neitou iwasewase lailai.

Au dau tomani Ta kei ira eso tale ena cakacaka vakavunau, ia au mamadua. Voleka ni vica vata na vula noqu saga tiko meu doudou na vunau vei ira na itaukeinivale. Ia dua na ka noqu lomani Jiova, au papitaiso sara ena Julai 1950. E solia na ivunau ni papitaiso e dua na tacida tagane ena neitou vale, qai caka na papitaiso ena dua na baravi. Na yabaki tarava, rau lesi yani ena neitou yasayasa e dua na veiwatini painia lavotaki. Au dau gole vata kei rau ena cakacaka vakavunau. Na levu ga ni noqu gole vata kei rau ena cakacaka vakavunau, au sa qai doudou ga vakalevu. Au taleitaka na cakacaka qo!

Na Vakatulewa e Veisautaka Noqu Bula

O Piero Gattia na imatai ni neitou ivakatawa ni tabacakacaka. E uqeti au meu painia, meu toki tale ga ena vanua e vinakati vakalevu kina na veivuke. Qori e dua na ka au sega ni vakasamataka tu. E kena ivakarau ena neitou vanua mera tiko ga e vale na goneyalewa me yacova nira vakamau. Koya gona, au painia ena Maji 1952, qai tiko ga e vale. Au sega ni kila ni vakatulewa qori e tara na vo ni noqu bula.

Gauna ya, e vinakata tale ga me painia e dua na goneyalewa o Anna. Keitou sa qai mai tiko vata e vale me rawa ni keirau gole vata ena vunau. Ena 1954, keirau lesi me painia lavotaki ena siti o Perugia. E rauta ni 250 na kilomita na kena yawa, e sega tale ga ni dua na iVakadinadina i Jiova e tiko e kea.

Au marautaka na ilesilesi qori. Au se biubiu ga mai i vale noqu gole kei rau noqu itubutubu ena dua na soqo ni tikina, au se yabaki 20 kina ya. Ia qo niu sa lesi meu lai painia ena dua tale na vanua, e vaka ga au gole ena dua tale na yasa i vuravura! A lomaleqa vakalailai o Ta baleta na vanua keirau na lai tiko kina kei Anna. E mani vukei keirau ena vaqarai ni vale me keirau tiko kina. Keirau mani redetaka e dua na vale, e caka tale ga kina na soqoni. Ni se qai tekivu, keirau ga na tiko ena soqoni. Ia keirau marautaka na cakacaka vakavunau ena tauni kei na koro voleka e Perugia. E levu era tataleitaki. Oti e dua na yabaki, a toki yani e Perugia e dua na tacida tagane. E qai dau liutaka tiko na soqoni. Ena 1957, e tauyavu kina e dua na ivavakoso lailai.

Oti keirau mani lesi ena siti lailai o Terni, e tiko ena loma kei Itali. Keirau marautaka na cakacaka vakavunau e kea nira sa tu kina e levu na tataleitaki. Ia keirau sotava tale ga eso na ituvaki dredre. Ena 1943, e mai cava kina na nodra veivakacacani na Fascist, ia eso na vakailesilesi era se via tarova tiko ga na nodra cakacaka vakavunau na tacida. Era vinakata tale ga mera vakalaiseni nira vunau e veivale.

Levu na gauna, era dau vakamuri keimami na ovisa. Eso na gauna, keirau na lai tu ena vanua e levu kina na tamata mera kua kina ni raici keirau. Au a tarovi qai vesu vakarua. Kena imatai, na gauna au cakacaka vakavunau tiko kina kei na ivakatawa ni tabacakacaka. Era vesuki keirau na ovisa qai kauti keirau ina siteseni. Ratou kaya ni cala vakalawa neirau cakacaka vakavunau, qai totogitaki keirau vakailavo. Keirau sega ni via solia na ilavo baleta ni keirau sega ni beca na lawa. Dua na ka noqu rere, ia au vakavinavinakataki Jiova niu sega ni tu taudua. Au vakasamataka nona vosa veivakacegui ena Aisea 41:13: “Kua ni rere. Au na vukei iko.” Oti keirau sere, e talaca o turaganilewa na neirau kisi ena gauna e rogoci kina. Oti tale e ono na vula, au vesu ena ikarua ni gauna. Au tiko taudua ena gauna qori, ia e talaci tale noqu kisi ni veilewai.

Levu Tale na Sala Au Qaravi Jiova Kina

Ena 1954, a caka e dua na soqo e Naples ena ceva kei Itali. Dua na ka noqu marautaka na soqo qori. Niu yaco yani, au vinakata meu sasamaki ena vanua ni soqo. Au lesi meu samaka na vanua volekata na buturara. Au raica sara e dua na tacida cauravou na yacana o Antonio Caparelli. E painia tiko e Libya. Ratou tu e Itali kei na nona vuvale, ratou qai toki ena vanua ya ena icavacava ni 1930.

E cauravou gugumatua qai yaloqaqa. E dau vodo motopai me gole vakayawa ena vanua dravuisiga kei Libya me vunau vei ira na kai Itali era tiko kina. Keirau dau veivolavolai. Ena itekitekivu ni 1959, a lesu tale i Itali. Vica na vula nona tiko ena Peceli e Roma, oti sa qai lesi me painia lavotaki ena siti o Viterbo ena loma kei Itali. Toso na gauna, keirau sa veivolekati qai vakamau ena ika29 ni Seviteba, 1959. Au tomani koya sara na veiqaravi e Viterbo.

Keirau vinakata e dua na vanua me keirau tiko kina, me caka tale ga kina na soqoni. Keirau redetaka sara e dua na rumu ena tabavale e ra e vaka tu na sitoa. E tiko e muri na vale ni sili. E biu ena dua na kona na neirau loga, qai biu e dua na ilati me wasea na rumu. Qori sara ga na neirau rumu ni moce. Na vo tale ni vanua e neirau rumu ni gade, e vakayagataki tale ga me caka kina na soqoni. E sega ni matau vei au na rumu qori, au na sega tale ga ni via tiko taudua kina. Ia au marau ni keirau tiko vata kina kei Antonio.

Ena 1961, e lesi o Antonio me ivakatawa ni tabacakacaka. E vinakati vua me tiko ena vuli vula dua me baleti ira na congregation servant, na yaca era kilai kina na ivakatawa ni tabacakacaka ena gauna ya. Kena ibalebale, au na tiko taudua me dua na vula. Meu kaya na ka dina dua na ka noqu lomalomani au, vakabibi ena yakavi niu tiko taudua. Ia au marau ni ogaoga tiko ga o Antonio ena veika vakayalo. Au vakaogai au tale ga ena veika vakayalo, e totolo kina na toso ni gauna.

Na itavi ni ivakatawa ni tabacakacaka e vinakati kina e levu na veilakoyaki. Keirau gole i Veneto ena vualiku kei Itali me yaco i Sicily e tiko ena ceva. E sega na neirau lori, keirau dau vodo basi ga. Dua na gauna, keirau gole ena gaunisala sukusukura ena veikoro e Sicily. Ni keirau sobu ena basi, era waraki keirau tu na mataveitacini kei na dua na asa me vodo kina neirau iyaya. E dara tu o Antonio nona kote qai vakaneketai, au dara tale ga noqu vinivo ni soqoni. Ena lasa mada ga vei ira na lewenivanua ni keirau taubale vata tu kei ira na dauteitei, dua na asa e usana neirau kato kei na dua na misini ni taipa.

Dina ni lailai na ka era taukena na mataveitacini, ia dua na ka nodra lomasavu. Eso na vale e sega na kena valenisili, se wai. Dua na gauna keirau vakaicili ena dua na rumu e sega tu ni vakayagataki me vica vata na yabaki. Au veivukiyaki voli ga ena bogi, qai sega ni moce rawa. E mani vakayadrati au o Antonio. Ni keirau cereka na siti, keirau kidroa ni keirau raica na levu ni manumanu lalai era tu ena meteresi. E sega ni dua na ka keirau rawa ni cakava ni sa bogilevu tu. Keirau saga ga me keirau samaka na meteresi qai moce tale.

Ia e tiko e dua na ka e vakadredretaka vakalevu na noqu veiqaravi. Qo na noqu dau mamadua. E dau dredre meu veitokani kei ira na tacida, ke se qai matai ni gauna me keirau sikova kina e dua na ivavakoso. Ia au dau saga vagumatua meu vakayaloqaqataki ira na tacida yalewa. Ni oti e dua na macawa ni veisiko, au vakila na veivuke i Jiova niu sa matau sara ena ivavakoso. E ka dokai dina nida veiqaravi vata kei ira na mataveitacini da qai raica na nodra lomasavu, yalodina, kei na nodra lomani Jiova.

Ena 1977, oti e vica na yabaki neirau veiqaravi vakaivakatawa ni tabacakacaka,b keirau sureti me keirau lai veivuke ena Peceli e Roma. Qori ena kena vakarautaki na soqo ni veimatanitu e kena usutu na “Victorious Faith” ena 1978. Oti ga e vica na vula, keirau sa lewe ni vuvale e Peceli. E lesi tale ga o Antonio me lewe ni Komiti ni Tabana.

E sega ni rawarawa tale ga vei au na veiqaravi e Peceli niu dau mamadua. Ia Ena veivuke ga i Jiova kei na nodra veitokoni na vo ni lewe i Peceli, au marautaka na noqu veiqaravi kina.

Dua Tale na iTuvaki Dredre

Ena vica na yabaki e tarava, keirau sotava e dua na ituvaki dredre. Qori na tauvimate. Ena 1984, e tauvi mateniuto o Antonio qai caka vua na veisele. Oti tale e tini na yabaki, e tauvimate tale. Ena 1999, e laurai ni tauvi koya tiko na kenisa ni mona. I liu e dau bulabula vinaka qai kaukaua, ia e vakamalumalumutaki koya vakalevu na mate qori. Dua na ka na kena mosi vei au niu raica ni sa qai tauvimate bibi ga. Au masu vagumatua vei Jiova me vukei au meu tokoni watiqu. Au wilika tale ga vakalevu na Same. Qori e dau vakacegui au ena gauna au lomaleqa kina. E mate o Antonio ena ika18 ni Maji, 1999. Keirau vakawati me voleka ni 40 na yabaki.

Dina niu maliwai ira eso tale, ia au vakila na galili. Era lomani au qai vakayaloqaqataki au na lewe i Peceli, kei ira na mataveitacini keimami veikilai ena gauna keirau veiqaravi tu kina vakaivakatawa ni tabacakacaka. Niu tiko duadua ena noqu rumu e Peceli, au dau rarawa vakalevu. Ia e vukei au vakalevu na noqu dau masu kei na noqu vuli vakataki au. Toso na gauna, e seavu noqu rarawa. Au marau tale ga niu vakasamataka lesu neirau bula vata kei Antonio. Au nuidei ni sega ni guilecavi Antonio o Jiova, keirau na sota tale ena veivakaturi.

E duidui na itavi au lesi kina e Peceli, ia gauna qo au veiqaravi tiko ena tabana ni culacula. Au marautaka niu qarava tiko e dua na cakacaka e yaga vei ira kece na lewe i Peceli. Dina ni sega ni levu sara na ka au rawa ni cakava ena gauna qo, ia au marautaka tiko ga na vunautaka na itukutuku vinaka. Qori na ilesilesi au se marautaka mai niu se gone. Au uqeti ira gona na itabagone mera painia, qori na cakacaka marautaki duadua.

Sa voleka ni 70 na yabaki noqu veiqaravi vakatabakidua, niu vakasamataka lesu au vakadinadinataka na levu ni nona vukei au, qai vakalougatataki au o Jiova. Au se mamadua tiko ga, au kila gona niu na sega ni rawata e dua na ka ke sega ni vukei au o Jiova. Au gole ena veivanua yawa sara, au raica qai vakadinadinataka e levu na ka marautaki. Au sega vakadua ni veivutunitaka e dua na ka.