Ni o Vakacegui—Mo Veivakacegui Tale Ga

E dua na ka ena vukei keda meda vosota na ituvaki va qori, oya na nodra dauveivakacegui na noda vuvale, noda itokani, kei ira na tacida vakayalo.

Nona vosa vakayalovinaka e dua na itokani e rawa ni vaka e dua na imasi e dauveivakabulai qai veivakabulabulataki. (Vkai. 16:24; 18:24; 25:11) Ia era sega wale ga ni kauaitaka na lotu vaKarisito dina na nodra vakacegui. Era vakaliuliu mera “vakacegui ira . . . era sotava na veimataqali rarawa ena vakacegu vata ga e vakacegui [ira] tiko kina na Kalou.” (2 Kor. 1:4; Luke 6:31) Qori sara ga na ka a vakila o Antonio, e dua na ivakatawa ni tikina mai Mexico.

Dua na ka na levu ni nona rarawa ena gauna a tauvi koya kina e dua na mataqali kenisa ni dra e vakatokai na lymphoma. Ia a saga me donu tiko ga na nona rai. A cakava vakacava qori? E dau saga me vakananuma na noda sere qai lagata me rawa ni rogoca na qaqana qai vakasamataka vakatitobu. E vakacegui koya tale ga vakalevu na nona dau masu vakadomoilevu kei na nona wili iVolatabu.

Ia e sa qai kila qo o Antonio ni dua na ka a vukei koya vakalevu, oya o ira na mataveitacini. E tukuna: “Ni keirau vakila na lomaocaoca vakaveiwatini, keirau na dau kerea e dua na wekai keirau e qase ni ivavakoso me keitou dau mai masu vata. Qori e vakacegui keirau sara ga. Ena nodra veitokoni na neirau vuvale kei ira na mataveitacini, keirau sega kina ni rarawa vakadede.” E kalougata dina o Antonio nira tu na nona itokani dauloloma ra qai dauveikauaitaki!

E dua tale na ka e rawa ni veivuke ena gauna ni rarawa, oya na yalo tabu, ni yalataki ni na soli vei keda. E tukuna na yapositolo o Pita ni yalo tabu ni Kalou e dua na “iloloma soli wale.” (Caka. 2:38) E vakadinadinataki sara ga qori ena nodra lumuti e levu ena Penitiko 33 S.K. A vosa tiko o Pita vei ira na lumuti, ia na yalo tabu e vakarautaki me baleti keda kece. Me vaka ni soli tu vakarawarawa vei keda na yalo tabu, vakacava mo kerea wasoma? —Aisea 40:28-31.

KAUAITAKI IRA VAKALEVU ERA RARAWA

E levu na ituvaki dredre a vosota o Paula, eso mada ga na gauna a rawa ni tagutuva na nona bula. (2 Kor. 1:8-10) Ia a sega ni rerevaka o Paula na mate. E vakacegui koya na nona kila ni tokoni koya tiko na Kalou. E vola: “Me vakacaucautaki mada ga na Kalou, na Tama ni noda Turaga o Jisu Karisito, na Tama ni yalololoma, na Kalou e dau vakacegui keda ena ka kece ga, e vakacegui keda ena noda rarawa kece.” (2 Kor. 1:3, 4) A sega ni vakalaiva o Paula na nona leqa me vakamalumalumutaki koya. Ia a uqeti koya na veivakatovolei a sotava me dau kauaitaki ira tale ga na tacina vakayalo, qori e kila vinaka kina na ka me cakava me rawa ni vakacegui ira ena gauna e gadrevi kina.

A tomana tale o Antonio na nona cakacaka vakaivakatawa dauveilakoyaki ena gauna sa bula vinaka kina. E dau kauaitaki ira na tacina vakayalo, ia erau sa saga sara vakaveiwatini me rau dau sikovi ira na tauvimate, me rau uqeti ira tale ga. Kena ivakaraitaki, ena gauna a sikova kina e dua na tacina vakayalo a tauvimate bibi, e qai kila o Antonio ni a sega ni via lako ena soqoni na tacina ya. E tukuna o Antonio: “Ia sega ni kena ibalebale ni a sega ni lomani Jiova se o ira na tacina vakayalo, a tarai koya ga vakalevu na nona tauvimate, e lai nanuma kina ni sa sega na betena.”

A cakava o Antonio e dua na ka me uqeti tacina vakayalo, oya na nona kerei koya me masu ena dua na soqo a caka wale tiko ga qo. A nanuma na tacida oya ni sega ni ganiti koya qori, ia a masu ga. E tukuna o Antonio: “E rogorogo vinaka dina na nona masu, qai gauna e sa oti kina, e veisau sara ga. E sa sega tale ni beci koya.”

Io, eda sa rairai sotava kece na ituvaki dredre e vinakati kina na vosota. Ia me vaka ga e tukuna o Paula, qori e rawa ni vukei keda meda vakacegui ira kina eso tale ena gauna era gadreva kina. Koya gona, meda dau kauaitaka na ituvaki dredre era vakila tiko na tacida vakayalo da qai vakatotomuria na Kalou o Jiova ena noda dauveivakacegui.