Vakadewataki na Porokaramu ni Soqo ni Veiwasewase ni 2020, e kena usutu ‘Marau Tiko Ga’!

Ena Julai kei na Okosita 2020, era na sarava vata kece kina na mataveitacini e veiyasa i vuravura ena dua vata ga na gauna na porokaramu ni soqo ni veiwasewase. Sa qai vakadua me yaco kina qori. Me rawa qori, ena vinakati me vakadewataki na porokaramu ni soqo ena sivia na 500 na vosa. Ia dau kena ivakarau me taura e dua na yabaki se sivia na kena tuvanaki na cakacaka, na kena katoni qai vakadewataki na suinivunau kei na vidio. Ia ni mai yaco na matedewa na COVID-19, ena vinakati vei ira na daunivakadewa mera vakadewataka na porokaramu ni soqo ni veiwasewase ni 2020, e kena usutu ‘Moni Marau Tiko Ga’! ena loma ni va na vula.

E veivuke sara vakalevu ena cakacaka levu qori na Tabana ni Vakadewa ena iTikotiko Liu ni iVakadinadina i Jiova kei na Tabana e Qarava na Volivoli vei ira na Valenivolavola ni Tabana e Veiyasa i Vuravura. Me vakaoti vinaka na nodra cakacaka na daunivakadewa, e raica na Tabana ni Vakadewa ena iTikotiko Liu ni vinakati me voli e levu na nodra iyaya ni cakacaka, vakabibi na gusunivosa era ka vinaka duadua. E mani tuvanaka na Tabana ni Volivoli me voli e 1,000 na gusunivosa qai vakau ena 200 na vanua.

Me bula na ilavo, e volia na Tabana ni Volivoli ena itikotiko liu e dua na iwiliwili levu ni gusunivosa me vakau ena dua ga na vanua, oti qori sa na qai vakau vei ira na daunivakadewa e veiyasa i vuravura. E tiko ena kena isau na gusunivosa qori ena $170 na ilavo ni Merika, sa wili tale tiko ga kina na isau ni kena vakau. Ni caka va qori na volivoli, e bula kina e 20 na pasede na ilavo ni vakatauvatani kei na kena voli yadudua na gusunivosa.

E tuvanaka sara na Tabana ni Volivoli me voli qai vakau na gusunivosa ena Epereli ina Me 2020. Ena gauna qori e sega ni toso vinaka sara tiko ga na bisinisi ena vuku ni matedewa na COVID-19. Ia ena icavacava ni vula o Me, era sa ciqoma na nodra iyaya ni cakacaka na daunivakadewa ena valenivolavola ni tabana tu yawa, ena valenivolavola ni tabana, kei na so tale na vanua ni vakadewa.

E kaya o Jay Swinney, o koya e qarava tiko na Tabana ni Volivoli: “E rawati kece na ka qo ena nodra veitokoni vinaka na veitabana e Peceli kei ira na kabani mai tuba. Na yalo tabu duadua sara ga nei Jiova e vakavuna me totolo na cakacaka, me keimami vakayagataka vinaka tale ga na cau mera tokoni kina na tacida.”

E kaya o Nicholas Ahladis e veiqaravi tiko ena Tabana ni Vakadewa: “Dua na ka na nodra vakavinavinaka na daunivakadewa era ciqoma na nodra iyaya ni cakacaka ena gauna e vakatabui tu kina na veitosoyaki. Dina nira veiyawaki tu na timi ni vakadewa, ia era se rawa ni cakacaka vata tiko ga vakatimi nira vakadewataka qai katona na vunau, drama kei na sere ena sivia na 500 na vosa.”

E levu na cakacaka e mai qaravi rawa me vakarautaki kina na soqo ni veiwasewase ni 2020 e kena usutu ‘Marau Tiko Ga’!, e dua vei ira na cakacaka ni vakadewa. E rawa wale ga qori ena nomuni cau ena donate.jw.org kei na so tale na sala.