Vuna ena Yaco Kina na Veivakarusai

E levu na sala sa vukei ira kina na lewenivanua o Jisu mera vakasamataka nodra veiwekani kei na Kalou. A basika e dua tale na ituvaki va qori ni veivosaki tiko kei ira na lewenivanua ena yasa ni nona vale e dua na Farisi.

Era vakamacalataka sara eso e dua na ituvaki vakaloloma a yaco. Qori nodra “wakia vata [na Kovana ni Roma o Ponitio] Pailato na nodra dra na kai Kalili kei na nodra isoro.” (Luke 13:1) Cava na ibalebale ni nodra vosa?

De dua era mate na kai Kalili qo nira kudruvaka na vica na udolu na Jiu nona vakayagataka o Pailato na ilavo ni valenisoro me tara kina na salasala ni wai e Jerusalemi. Ratou rairai vakadonuya na vakailesilesi ni valenisoro na ilavo e vakayagataka o Pailato. Era rairai nanuma na talanoa tiko vei Jisu nira sotava na ka vakaloloma na kai Kalili ena vuku ni nodra ivakarau ca. Ia e sega ni va qori na nanuma i Jisu.

E taroga: “Vakacava, oni nanuma ni ca sara nodra ivalavala ca na kai Kalili ya vei ira na vo ni kai Kalili, nira sotava na ka vakaloloma qo?” E tukuna o Jisu ni sega ni dina ya. Ia e vakayagataka na ituvaki a yaco me vakasalataki ira kina na Jiu: “Ke oni sega ni veivutuni, oni na vakarusai kece tale ga.” (Luke 13:2, 3) E cavuta tale o Jisu e dua na ka vakaloloma e rairai se qai yaco oti ga, qai rairai sema ina tara ni salasala ni wai sa cavuti oti. E taroga:

“O ira na le 18 e baleti ira na valececere mai Sailoama, ra mani mate kina. Oni nanuma ni levu cake nodra ivalavala ca ni vakatauvatani kei ira na uabula kece e Jerusalemi?” (Luke 13:4) Era rairai nanuma na ilala levu nira mate na le 18 ena vuku ni nodra ivakarau ca. E vakacala tale nodra nanuma o Jisu ni kila e rairai vakavuna na ka vakaloloma qori ‘na gauna kei na ka tawanamaki e dau yaco.’ (Dauvunau 9:11) E dodonu mera kauai na lewenivanua ena ka e yaco ya. E kaya o Jisu: “Ke oni sega ni veivutuni, oni na vakarusai tale ga va ya.” (Luke 13:5) Na cava e vakabibitaka kina qori o Jisu?

E vakavotuya na vuna o Jisu ena dua na vosa vakatautauvata: “E dua na tagane e tei tu ena nona loganivaini e dua na vunilolo, mani lai vaqara eso na vuana, ia e sega ni kunea e dua. E qai kaya vua na dausamaki loganivaini, ‘Sa tolu na yabaki noqu mai vaqara vuanilolo ena vunilolo qo, ia au sega ni kunea e dua. Taya laivi! Na cava e vakamaumautaki qele tiko kina?’ E kaya na dausamaki loganivaini, ‘Kemuni na Turaga, laiva mada me dua tale na yabaki, meu cukita wavoki, meu vakamaniwataka tale ga. Ke mani vua, e daumaka, ia ke sega ni taya laivi.’”—Luke 13:6-9.

Sa sivia e tolu na yabaki na nona saga voli o Jisu me vukei ira na Jiu mera bucina na vakabauta. Ia e le vica ga era sa tisaipeli, e rawa ni tukuni nira vua ni nona cakacaka. Sa qai gumatua sara ena ikava ni yabaki ni nona cakacaka vakaitalatala. E vaka sara ga e cukita wavoki qai vakamaniwataka na vunilolo, oya nona vunau kei na nona veivakavulici e Jutia kei Peria. Cava e yaco kina? Era veiciqomi ga eso na Jiu. Ni sega ni via veivutuni na matanitu taucoko, sa waraka ga na veivakarusai.

Sega ni dede, e laurai tale nodra sega ni kauai e levu ena nona veivakavulici tiko o Jisu ena valenilotu ena dua na Siga ni Vakacecegu. E raica e kea e dua na yalewa e vakavuna na timoni nona vakalairoro voli me 18 na yabaki. E tukuna vakayalololoma vua o Jisu: “Noqu lewa, o sa vakabulai mai na nomu malumalumu.” (Luke 13:12) E tarai koya o Jisu, mani tucake vakadodonu na yalewa ena gauna vata ya qai vakacaucautaka na Kalou.

Dua na ka nona cudru na ivakatawa ni valenilotu, e kaya: “E ono na siga ni cakacaka, ni lako mai ena dua vei ira na siga qori moni mai vakabulai, me kua ga ena Siga ni Vakacecegu.” (Luke 13:14) E vakabauta na ivakatawa ni tu vei Jisu na kaukaua me veivakabulai, ia e cudruvi ira na lewenivanua nira gole yani mera lai vakabulai ena Siga ni Vakacecegu! E sauma vakamatata o Jisu: “Ni dauveivakaisini, oni sega beka ni dau sereka ena Siga ni Vakacecegu nomuni bulumakau kei na asa mai na kena vale moni lai vagunuva? E sega beka ni kena gauna vua na yalewa qo, na luvei Eparama, a vesuka tu o Setani me 18 na yabaki, me sereki kina mai na ivesu qo ena Siga ni Vakacecegu?”—Luke 13:15, 16.

Era madua sara ga na dauveitusaqati, ia era marautaka na ilala levu na veika lagilagi e cakava tiko o Jisu. Ena nona tiko voli qo e Jutia o Jisu, e tokaruataka kina e rua na vosa vakatautauvata vakaparofisai me baleta na Matanitu ni Kalou, a cavuta mai waqa ena dua na gauna ena Wasa o Kalili.—Maciu 13:31-33; Luke 13:18-21.