E Bibi Meda Lewena e Dua na Lotu?

Kena isau vakaivolatabu

Io, ni vinakata na Kalou meda soqoni vata nida sokalou. E kaya na iVolatabu: “Meda dau veinanumi nida veivakauqeti ena loloma kei na caka vinaka, meda kua ni biuta na noda soqoni vata.”​—Iperiu 10:24, 25.

E tukuna o Jisu ni o ira na nona imuri era na lewena e dua na isoqosoqo ni kaya: “Na ka qo era na kila kece kina ni dou noqu tisaipeli, ke dou veilomani.” (Joni 13:35) Ena laurai na loloma qo nira soqoni vata na tisaipeli i Jisu kei ira era vakabauta vata. Era na tuvanaki vakaivavakoso mera soqoni wasoma nira sokalou. (1 Korinica 16:19) Qori ena vakavuna mera sokalou vakamataveitacini e veiyasa i vuravura.​—1 Pita 2:​17.

Me laurai ena nomu itovo na lotu o lewena

E tukuni ena iVolatabu ni dodonu mera soqoni vata na tamata mera qarava na Kalou, ia e sega ni tukuna ni o na vakamarautaka na Kalou ke o lewena e dua na lotu. Me vakadonuya e dua na Kalou, e bibi me laurai ena nona itovo ni muria tiko na veika e vakavulica nona lotu. Kena ivakaraitaki, e kaya na iVolatabu: “E va qo na lotu e savasava qai sega ni dukadukali ena mata ni noda Kalou na Tamada: meda qaravi ira na luveniyali kei ira na yada era rarawa tu, meda qarauna tale ga me kua ni tauvi keda na duka ni vuravura.”​—Jemesa 1:​27.