Wase e 104

Rogoci na Domo ni Kalou ena iKatolu ni Gauna

NONA tiko voli ena valenisoro, sa mai rarawa voli na loma i Jisu ena mate ena vakarau sotava. E kauwaitaka vakalevu duadua na i rogorogo ni yaca i Tamana, sa qai masulaka: “Tamaqu, vakarokorokotaka na yacamuni!”

Ena gauna oqori, a rogo mai e dua na domo rogolevu mai lomalagi, ni kacivaka: “Au sa vakarokorokotaka, ka’u na vakarokorokotaka tale.”

Era kurabui na tamata era tu wavokiti koya. “Sa dua na agilose sa vosa vei koya,” era kaya e so. E so tale era kaya ni dua na kurukuru. Ia, a vosa dina ga na Kalou ko Jiova! Na yaco ni ka oqo, e sega ni qai i matai ni gauna me rogo na domo ni Kalou ena vuku i Jisu.

Ena papitaiso i Jisu, ena tolu veimama na yabaki yani ki liu, a rogoca ko Joni na Dauveipapitaiso ni kaya na Kalou me baleti Jisu: “O koya oqo na noqu Gone ni toko, au sa dauvinakata vakalevu.” Oti oqori ena dua na gauna ni sa oti na Lakosivia e liu ena gauna a matalia kina ko Jisu e matadratou, ko Jemesa, Joni, kei Pita, eratou a rogoca kina ni a kacivaka na Kalou: “Oqo na noqu Gone ni toko, au sa dau vinakata vakalevu; dou vakarogoci koya.” Ia oqo, ena i katolu ni gauna, ena 10 Naisani, e va na siga ni bera ni mate ko Jisu, era rogoca tale na tamata na domo ni Kalou. Ia e rawa ni ra rogoca na lewe vuqa na vosa oqo i Jiova!

E vakamacalataka ko Jisu: “Sa sega ni lako mai na vosa oqo ena vukuqu, e na vukumudou ga.” A solia mai na i vakadei ni ko Jisu na Luve dina ni Kalou, na Mesaia yalataki. E tomana ko Jisu: “Sa qai lewai ko ira na kai vuravura oqo: sa qai biu ki tautuba na turaga ni vuravura oqo.” Na yalodina i Jisu e vaka ga e vakadeitaka, ni sa kilikili vei Setani na Tevoro, na i liuliu ni vuravura oqo me “biu ki tautuba,” me vakarusai.

Ni dusia na veika rarawa sa vakarau sotava ena nona mate, e kaya ko Jisu: “Ia ni’u sa na laveti cake mai vuravura, au na vakayarayarataki ira na tamata kecega kivei au.” Na nona mate e sega ni vakamalumalumutaki kina, ia ena vuku ni nona mate ena vakayarayarataki ira yani na so vei koya me ra na rekitaka na bula tawamudu.

Ia era saqati koya na lewe vuqa: “Keimami a rogoca mai na Vunau ni sa tiko vakadua na Karisito; ia ko sa kaya vakacava, Ena laveti cake na Luve ni Tamata? ko cei na Luve ni Tamata oqo?”

E veitalia ga na i vakadinadina kece, kei na nodra rogoca na domo ni Kalou, e lewe vuqa era sega ga ni vakabauta ni Luve dina ni tamata ko Jisu, na Mesaia yalataki. Ia, na veika e cakava ena vula ono yani ki liu ena Solevu ni Vale Vakacevaceva, e tukuni koya tale ko Jisu ni “rarama” ka uqeti ira era rogoci koya: “Ni sa tu vei kemudou na rarama, dou vakabauta na rarama, mo dou yaco me luve ni rarama.” Ni sa tukuna oti na veika oqo, sa qai lako yani ko Jisu me vunitaki koya, rairai ena kena rui leqataki vakalevu sara na nona bula.

Ena nodra sega ni vakabauti Jisu na Jiu sa vakayacori kina na parofisai i Aisea ni ‘sa vakabibitaka na yalodra na tamata, ka vakabobotaka na matadra ka ra sa sega ni saumaki mai me ra vakabulai.’ A raica ena raivotu ko Aisea na i tikotiko vakaturaga i Jiova mai lomalagi, kei Jisu talega ena nona i ukuuku ni bera nona mai bula vakatamata ni tiko vata kei Jiova. Ia, o ira na Jiu, me vakayacori kina na veika a vola ko Aisea, era besetaki koya ka vakalialiai koya ena i vakadinadina e sa mai vakayacora o Koya oqo na nodra Dauveisereki yalataki.

Ena dua tale na yasana, e vuqa vei ira na i liuliu (rairai o ira na Jiu era lewe ni mataveilewai cecere, na Sanadrini) era vakabauti Jisu. Ko Nikotimo kei Josefa mai Arimacea e rua vei ira na i liuliu oqori. Ia, o ira na i liuliu ena gauna mada ga oqo, era guce ni vakaraitaka na nodra vakabauta, de ra na vakasivoi mai na nodra i tutu ena valenilotu. Sa dua na ka na levu ni nodra dravudravua o ya!

Sa qai tomana ko Jisu ena nona dikeva: “O koya sa vakabauti au, sa sega ni vakabauti au ga, sa vakabauti koya talega sa talai au mai: ia ko koya sa raici au, sa raici koya sa talai au mai. . . . Ia kevaka e dua sa rogoca na noqu vosa, ka sega ni vakabauta, au sa sega ni lewai koya: ni’u sa sega ni lako mai me’u lewai ira na kai vuravura, me’u vakabulai ira ga na kai vuravura. . . . A vosa ka’u sa vosataka, sai koya oqo ena lewai koya ena siga maimuri.”

Na nona lomani ira na vuravura ni kawatamata ko Jiova e uqeti koya me talai Jisu mai kina me rawa ni ra vakabulai o ira era vakabauti koya. Se ra vakabulai na kawatamata se sega ena vakatau mai na nodra muria na veika e vakasalataki Jisu kina na Kalou me tukuna. Ena vakayacori na siga ni veilewai ena “siga maimuri” ena loma ni Dua na Udolu na Yabaki ni Veiliutaki vaka-Tui nei Karisito.

A qai tinia ko Jisu ena nona kaya: “Ni’u sa sega ni vosa vakataki au; ia ko Tamaqu sa talai au mai, sa vakarota vei au na ka me’u kaya, kei na ka me’u tukuna. Ia ka’u sa kila sa vu ni bula tawa mudu na nona i vakaro: o koya ga, e na ka kecega ka’u sa vosataka, au na vosa me vaka na ka sa kaya vei au ko Tamaqu.” Joni 12:28-50; 19:38, 39; Maciu 3:17; 17:5; Aisea 6:1, 8-10.

▪ Ena tolu na gauna cava a rogoci kina na domona na Kalou me baleti Jisu?

▪ A raica vakacava na parofita ko Aisea na i ukuuku i Jisu?

▪ O cei na i liuliu era vakabauti Jisu, ia na cava ga era sega ni vakatusai koya kina e matana levu?

▪ Na cava na “siga maimuri,” na sala cava era na lewai kina na tamata?