iTuvatuva ni Macawa e Tekivu ena 24 Janueri

MACAWA E TEKIVU ENA 24 JANUERI

Sere 53 kei na Masu

□ Vuli iVolatabu ni iVavakoso:

cf wase 16 ¶15-20, kato ena t. 171 (25 min)

□ Koronivuli ni Vuli Vunau:

Wili iVolatabu: Esera 6-10 (10 min)

Nb. 1: Esera 7:1-17 (kua ni sivia na 4 na miniti)

Nb. 2: A Vakaraitaka Vakacava o Jisu ni Ganiti Koya me Veiliutaki? (5 min)

Nb. 3: Yaga Vakacava na Lewaeloma?​—lv t. 16 ¶1-t. 19 ¶7 (5 min)

□ Soqoni ni Cakacaka:

Sere 30

5 min: Veika me kacivaki. Tukuna na ivola ena soli ena Feperueri, me qai dua na kena vakatasuasua.

20 min: “E Yaga ena Vuvale.”​—Wase 1. (Parakaravu 1 ina 6 kei na kato ena tabana e 6.) Veitarotarogi. Vakauqeti ira na vakarorogo mera muria eso na vakatutu ena kato ena tabana e 6 ena nodra Sokalou Vakavuvale e tarava. Ni veivosakitaki oti na vo ni parakaravu ena macawa mai qo, mera qai vakamacalataka na sala e yaga kina ena nodra vuvale.

10 min: Tu Vakarau mo Solia na Mekesini ena Feperueri. Mera vakaitavi na vakarorogo. Mo vakamacalataka na lewe ni mekesini ena loma ni dua se rua na miniti. Digia e rua se tolu na ulutaga, qai kerea na nodra vakatutu na vakarorogo ena taro kei na tikinivolatabu e rawa ni vakayagataki. Me vakatasuasuataki na kena soli na mekesini ruarua.

Sere 32 kei na Masu

E Yaga ena Vuvale

1. E yaga vakacava na Siga ni Vakacecegu vei ira na vuvale e Isireli?

¹ Na ituvatuva i Jiova ena vakatatabutaki ni Siga ni Vakacecegu, e yaga ena vuvale e Isireli. Era cegu kina mai na nodra cakacaka ra qai vakasamataka na vinaka i Jiova kei na nodra veiwekani kei koya. Qori e gauna vinaka vei ira na itubutubu mera vakavulici ira na luvedra ena Lawa ni Kalou. (Vkru. 6:6, 7) Na Siga ni Vakacecegu, qori na gauna era sokaloutaki Jiova vakatabakidua kina e veimacawa na nona tamata.

2. Na cava eda vulica ena lawa ni Siga ni Vakacecegu me baleti Jiova?

² Sa sega ni qai lavaka o Jiova mera vakatatabutaka na Siga ni Vakacecegu na matavuvale. Ia na lawa oya eda vulica kina e dua na ka me baleta na noda Kalou. E dau kauaitaka vakalevu na nodra bula vakayalo na nona tamata. (Aisea 48:17, 18) E dua gona na sala e vakaraitaka kina nikua o Jiova na nona kauai, oya na Sokalou Vakavuvale.

3. Na cava na inaki ni Sokalou Vakavuvale?

³ Na Cava na iNaki ni Sokalou Vakavuvale? Ena Janueri 2009, sa caka na Vuli iVolatabu ni iVavakoso ena bogi vata ga e vakayacori kina na Koronivuli ni Vuli Vunau kei na Soqoni ni Cakacaka. E dua na vuna e caka kina na veisau qo, me rawa nira tara cake na vuvale na nodra veiwekani kei Jiova nira tuvanaka e dua na yakavi e veimacawa mera sokalou kina vakavuvale. Era a uqeti na vuvale yadua mera vuli vakavuvale ena bogi a dau caka kina na vuli ivola vakaiwasewase lalai ke veiganiti. Na gauna qori me veivosakitaki kina vakavinaka na iVolatabu me kua ni vakusakusataki, qai tuvanaki na ka e vulici me yaga ena vuvale.

4. Me yalani beka na balavu ni gauna ni Sokalou Vakavuvale ena dua ga na aua? Vakamacalataka.

⁴ E dau taura na gauna meda vakavakarau da qai lako ina Vulivola ni iVavakoso. Na vuli qo e dau dua ga na aua, ia e levu vei keda ena sivia sara na dua na aua meda tiko kina. Ena veisau ni noda ituvatuva ni soqoni, sa vakayagataki kina na bogi ni Vulivola meda sokaloutaki Jiova kina vakavuvale. Koya gona me kua ni yalani na noda Sokalou Vakavuvale ena dua ga na aua. Ia me vakasamataki na veika e gadrevi kei na levu ni ka eratou rawa ni vulica na lewenivuvale qai vakatulewataki na levu ni gauna ni vuli me rawati kina na inaki ni Sokalou Vakavuvale.

5. Ena vakayagataki beka na gauna taucoko ena vuli vata vakavuvale? Vakamacalataka.

⁵ Ena Vakayagataki Beka na Gauna Taucoko ena Vuli Vata Vakavuvale? Era na veivakayaloqaqataki na veiwatini kei na vuvale era tiko kina na gone nira veivosakitaka vata na ulutaga era yavutaki ena iVolatabu. (Roma 1:12) Era na veivolekati kina vakavuvale. Ia me usutu bibi ni Sokalou Vakavuvale na veivosakitaki ni iVolatabu. Era rawa tale ga ni vuli vakataki ira na lewe ni vuvale yadua. Kena ivakaraitaki, ni sa oti na vuli vata vakavuvale, e rawa ni ratou dui vakavakarau ena soqoni se wilika Na Vale ni Vakatawa kei na Yadra! ni ratou se tiko vata ga. Eso na vuvale era vakatulewataka me kua na sara tivi ena yakavi oya.

6. Me caka vakacava na vuli?

⁶ Me Caka Vakacava na Vuli? Me kua ni vaka tu ga na veitarotarogi. Na Sokalou Vakavuvale me bulabula qai taleitaki, e levu gona na vuvale era vakatotomuria na ituvatuva ni soqoni ni ivavakoso ena lomanimacawa. Era vidavida na ka era vulica, qai duidui na sala era cakava kina. Kena ivakaraitaki, era na rairai wilika vata na iVolatabu, vakarautaka e dua na iwase ni soqoni, qai vakatovotovotaka na ka mera tukuna ena cakacaka vakavunau. Eso na vakatutu e tiko ena tabana e 6.

7. Na cava mera cakava na itubutubu me marautaki kina na vuli?

⁷ Na Cava Mera Cakava na iTubutubu me Marautaki kina na Vuli? Era marautaka na vuvale na vuli ke caka ena sala e taleitaki qai veivakacegui. Ena so na gauna e rawa ni caka e tuba ke draki vinaka. Rawa ni cegu vakalailai ke gadrevi. Eso na vuvale era dau kania se gunuva e dua na ka ni oti na nodra vuli. Erau na sega ni vakayagataka na itubutubu na Sokalou Vakavuvale me vosataki se me vakadodonutaki kina na luvedrau, ia erau na rairai vakayagataka e dua na iwase ni gauna qori me veivosakitaki kina e dua na ka e caka tiko se dua na leqa erau sa qai kila. Ia ke vinakati me veivosakitaki na nona leqa e dua vei ratou na gone, me qai caka ena dua tale na siga ena macawa oya me kua ni madua kina o koya e matadratou na vo ni tacina. E sega ni dodonu me vakavucesa se gauna ni vakaloloku na Sokalou Vakavuvale, ia e dodonu me marautaki nida qarava tiko na Kalou mamarau.​—1 Tim. 1:11.

8, 9. Na cava ena cakava o ulunivale ni vakavakarau?

⁸ Na Cava ena Cakava o Ulunivale ni Vakavakarau? Ena yaga na vuli ke vakarautaka e liu o ulunivuvale na ka me vulici kei na sala vinaka me caka kina ena Sokalou Vakavuvale. (Vkai. 21:5, NW) Ena vinaka sara ke veivosakitaka e liu kei watina. (Vkai. 15:22) Vakacava mo taroga tale ga nodratou vakatutu na luvemu? Ke o cakava qo, o na kila kina na veika eratou taleitaka, eratou kauaitaka tale ga.

⁹ Ena sega ni gadrevi me vakayagataka e levu na gauna e veimacawa o ulunivale me vakavakarau kina. Ena veimacawa sa tu ga na ka me ratou vulica, me vaka na wiliki ni dua na iwasewase ni iVolatabu, ena sega gona ni gadrevi me na veisautaka kece na ituvatuva ni veika eratou vulica. Ena rairai yaga vakalevu me vakavakarau ni oti ga na vuli ni se kasa tiko ga vua na veika e gadrevi vakayalo ena nona vuvale. Eso na ulunivale era vola vakaleleka na veika eratou na vulica qai vakabira ena vanua ena rawarawa kina nira raica na vo ni vuvale, ena rairai vakabira ena fridge. Qo era na nanamaki kina qai solia tale ga na gauna mera vakavakarau ke gadrevi.

10. Ke o iko taudua, na cava o rawa ni cakava ena yakavi ni Sokalou Vakavuvale?

¹⁰ Vakacava Ke o Iko Taudua? O rawa ni vuli vakataki iko ena yakavi ni Sokalou Vakavuvale. Na ituvatuva vinaka ni vuli vakataki iko e okati kina na wili iVolatabu, vakavakarau ena soqoni, na wili Vale ni Vakatawa kei na Yadra! Me ikuri ni ka e vulici, eso na dautukutuku era vakekeli ena so tale na ulutaga. Ena so na gauna o rawa ni sureta e dua na dautukutuku se veiwatini mera tomani iko ena nomu Sokalou Vakavuvale qai kerei ira me talanoataka eso na ka e yaco ena cakacaka vakavunau se ra a taura vakacava na dina.

11, 12. E yaga vakacava ni caka wasoma na Sokalou Vakavuvale?

¹¹ E Yaga Vakacava ni Caka Wasoma na Sokalou Vakavuvale? Era na voleka sara vei Jiova o ira era sokaloutaki koya mai vu ni lomadra. Kuria qori, na vuvale era sokalou vata ena dei vinaka na nodra veiwekani vakavuvale. Erau tukuna e dua na veiwatini na veivakalougatataki erau vakila kina: “Me vaka ni keirau painia e sega na luvei keirau, keirau dau nanamaki ena yakavi ni neirau Sokalou Vakavuvale. Keirau vakila na neirau veivolekati kei na neirau voleka vua na Tamada vakalomalagi. Ni keirau yadra cake ena siga e dau caka kina na neirau vuli, keirau na kaya: ‘O nanuma na ka daru na cakava ena yakavi? Daru na Sokalou Vakavuvale!’”

¹² Ke ra digitaka e dua na yakavi na vuvale osooso mera sokalou kina vakavuvale, ena yaga tale ga vei ira. E dua na yalewa itubutubu le dua e rua na luvena qai painia tudei e vola: “Ena veigauna sa sivi na neitou vuli vakavuvale e sega ni dei qai vagauna baleta niu dau wawale. Au sega ni kila na ka meu cakava kina. Au volavola gona yani meu vakavinavinakataka na ituvatuva ni Sokalou Vakavuvale. Sa wasoma sara tiko na neitou vuli vakavuvale, keitou vakila tale ga na kena yaga.”

13.Me yaga na ituvatuva qo ena nomu vuvale, ena vakatau ena cava?

¹³ Me vaka ga na Siga ni Vakacecegu, na Sokalou Vakavuvale e isolisoli yaga e vakarautaka na Tamada vakalomalagi vei ira na vuvale. (Jeme. 1:17) Na ka era cakava na Isireli ena Siga ni Vakacecegu e laurai na kena yaga ni tara cake na nodra veiwekani kei Jiova. O keda tale ga, me yaga ena noda bula vakavuvale na ituvatuva ni sokalou vakavuvale ena vakatau qori ena veika eda dau vulica kina. (2 Kor. 9:6; Kala. 6:7, 8; Kolo. 3:23, 24) Ni vakayagataka vinaka na nomu vuvale na ituvatuva qo, dou na duavata kei na ka e kaya na daunisame: “Ia koi au, e yaga vei au me’u toro vua na Kalou: Au sa vakararavi oti vua na Turaga ko Jiova.”​—Same 73:28.

[Tikina bibi ena tabana e 5]

E sega ni dodonu me vakavucesa se gauna ni vakaloloku na Sokalou Vakavuvale, ia e dodonu me marautaki nida qarava tiko na Kalou mamarau

[Kato ena tabana e 6]

MAROROYA

So na Ka me Caka ena Sokalou Vakavuvale

iVolatabu:

• Wilika vata e dua na iwasewase ni wili iVolatabu vakamacawa. Eso na wase ni iVolatabu e volai tu me vaka na italanoa, e rawa ni lesi e dua me wilika qai so tale mera wilika na ka era dui tukuna o ira na talanoataki kina.

• Vakatasuasuataki na ka e talanoataki tiko ena dua na iwasewase ni wili iVolatabu.

• Lesia na wase ni iVolatabu me ratou dui wilika mai na lewenivuvale, ratou qai vola e dua se rua na taro me baleta na tikina eratou wilika. Dou qai raica vata na kedra isau.

• Ena veimacawa vakarautaka e dua na card qai vola kina e dua na tikinivolatabu, saga mo nanuma qai vakamacalataka. Toso na gauna sa na levu na card qai railesuva e veimacawa mo kila kina na levu ni tikinivolatabu o bau nanuma.

• Vakarogoca na wili iVolatabu katoni, qai vakamuria na wiliwili ena nomu iVolatabu.

Soqoni:

• Vakarautaka vata e dua na iwasewase ni soqoni.

• Vakatovotovotaka na sere e tuvanaki tu ena soqoni ena macawa mai qo.

• Ke dua ena vakaitavi ena Koronivuli ni Vuli Vunau se vakatasuasua ena Soqoni ni Cakacaka, me veivosakitaki na sala e rawa ni caka kina se vakatovotovotaka vei ratou na vo ni vuvale.

Veika e Gadrevi ena Vuvale:

• Veivosakitaki na ulutaga ena ivola na Young People Ask se Vuli Vua na Qasenivuli Levu.

• Me dua na gauna me vakatovotovotaki kina na ka e rawa ni caka ke dua na ituvaki e yaco mai koronivuli.

• Me vakatovotovotaki na veisau ni itavi itubutubu kei gone. Kena ibalebale eratou na vakekeli na gone ena dua na ulutaga, oti ratou qai vakamacala vei rau na nodratou itubutubu.

Vunau:

• Vakatovotovotaki na ka me tukuni ena cakacaka vakavunau ena muanimacawa.

• Veivosakitaki na isausau e rawa ni sauva na vuvale mera vakalevutaka kina nodra cakacaka vakavunau ena vula ni iVakananumi se na gauna ni gade.

• Me soli e vica na miniti me ratou vakekeli na lewenivuvale me saumi kina eso na taro ena rairai tarogi ena cakacaka vakavunau, qai vakatovotovotaki.

iKuri ni Vakatutu:

• Wilika vata e dua na ulutaga ena mekesini vou.

• Me ratou wilika eliu na vuvale na ulutaga eratou dui taleitaka ena mekesini vou, ratou qai vakamacalataka.

• Ena so na gauna o rawa ni sureta e dua na dautukutuku se veiwatini ina Sokalou Vakavuvale, qai kerea mera talanoataka eso na ka e yaco ena cakacaka vakavunau se ra a taura vakacava na dina.

• Sarava qai veivosakitaka na noda vidio.

• Veivosakitaka vata na ulutaga “Ra Taroga na iTabagone” ena Yadra!

• Veivosakitaka vata na ulutaga “Vakavulica na Luvemu” se “Ra iTabagone” ena Vale ni Vakatawa.

• Wilika qai veivosakitaka e dua na iwase ni ivola na Yearbook vou se na ivola a sevutaki ena soqo sigatolu se qai caka oti ga.

• Ni sa caka oti na soqo sigadua, sigarua se na soqo sigatolu, railesuva na veitikina bibi.

• Dikeva e dua na ibulibuli i Jiova, qai veivosakitaka na ka eda vulica me baleti Jiova.

• Cakava vata e dua na ka, me vaka na droini mape, na chart, se buli ivakatakarakara.