Na Cava ena Yaco ena iCavacava?
“Oni sega ni tiko ena butobuto, ena sega kina ni yaco vakidacala vei kemuni na siga ya me vaka vei ira na daubutako.”—1 CES. 5:4.
O RAWA NI VAKAMACALATAKA?
Na ituvaki cava e se bera ni yaco e vakamacalataki tiko ena veitikinivolatabu qo?
1. Na cava meda cakava meda yadra tiko ga kina, meda vosota tale ga na veivakatovolei?
SA NA vakarau yaco e vuravura eso na ka vakadomobula. Eda vakabauta qori baleta ni sa vakayacori tiko na parofisai vakaivolatabu. E bibi gona meda yadra tiko. Eda na cakava vakacava qori? E uqeti keda na yapositolo o Paula meda “raica tiko ga na ka . . . e sega ni rairai.” Io, e bibi meda vakasamataka tiko na noda icovi ni bula tawamudu e lomalagi se vuravura. E laurai ena veitikina yavolita ni a uqeti ira tiko na tacina vakayalo o Paula mera vakasamataka vakabibi na icovi ni nodra yalodina. Na nodra cakava qori ena vukei ira mera vosota na veivakatovolei kei na veivakacacani.—2 Kor. 4:8, 9, 16-18; 5:7.
2. (a) Na cava meda cakava ke da vinakata me dei tiko ga na noda inuinui? (b) Na cava eda na veivosakitaka tiko ena ulutaga ni vuli qo kei na kena e tarava?
2 Dua na lesoni bibi eda vulica ena ivakasala i Paula: Ke da vinakata me dei na noda inuinui, e dodonu meda kauaitaka na ka e se sega ni rairai. E bibi meda kauaitaka na veika vakasakiti e se bera ni yaco. (Iper. 11:1; 12:1, 2) Eda na veivosakitaka ena ulutaga qo kei na ulutaga e tarava e tini na ka ena yaco ena veigauna e se bera mai, era veisemati vinaka kei na noda inuinui ni bula tawamudu.
VEIKA ENA YACO NI BERA NA ICAVACAVA
3. (a) Na cava e tukuni ena 1 Cesalonaika 5:2, 3 ena yaco? (b) Na cava era na cakava na iliuliu vakapolitiki, o cei era na tokoni ira?
3 Ena nona ivola o Paula vei ira e Cesalonaika, a vakamacalataka e dua vei ira na ka ena yaco. (Wilika 1 Cesalonaika 5:2, 3.) A cavuta kina o Paula na “siga i Jiova.” Ena tekivu na gauna qori ni vakarusai o lotu lasu qai lai cava ena ivalu na Amaketoni. Ia ni bera ni tekivu na siga i Jiova, era na tukuna tiko na iliuliu kei vuravura “na Vakacegu kei na Sautu!” Qori ena rairai rogoci vakadua se vakavica vata. Era na rairai nanuma kina o ira na veimatanitu ni sa voleka mera walia na leqa lelevu era sotava tu. Ia vakacava o ira na iliuliu ni lotu? Macala ga nira na tokoni ira na iliuliu vakapolitiki baleta nira tiki tale ga kei vuravura. (Vkta. 17:1, 2) Na ka era cakava qori na iliuliu ni lotu, era sa vakatotomuri ira sara tiko ga na parofita lasu e Juta makawa. E tukuna o Jiova me baleti ira: “Ni ra kaya, ‘Dou vakacegu; dou vakacegu;’ ni sa sega na vakacegu.”—Jere. 6:14; 23:16, 17.
4. Na cava eda kila era sega ni kila e levu nikua?
4 Se o cei ga e tukuna na “Vakacegu kei na sautu!” na ka e yaco qori e dusia ni sa tekivu na siga i Jiova. Oya na vuna a tukuna kina o Paula: “Raveitacini oni sega ni tiko ena butobuto, ena sega kina ni yaco vakidacala vei kemuni na siga ya me vaka vei ira na daubutako, ni oni luve ni rarama kece.” (1 Ces. 5:4, 5) Eda sega ni vakataki ira e levu nikua, nida kila vinaka na ka e tukuna na iVolatabu me baleta na ka e yaco tiko ena noda gauna. Ia ena vakayacori vakacava na parofisai ni kena tukuni na “Vakacegu kei na sautu?” Meda waraka ga da qai raica. Meda vakadeitaka “meda yadra tiko da qai yalomatua.”—1 Ces. 5:6; Sefa. 3:8.
“RANADI” E CALA NA NONA VAKANANANU
5. (a) Ena tekivu vakacava na “veivakararawataki levu”? (b) Na cava e cala kina na nona vakanananu na ‘ranadi?’
5 Na cava ena yaco tarava? E tukuna o Paula: “Ena gauna era kaya kina: ‘Na vakacegu kei na sautu! ena qai yaco vakidacala vei ira na veivakarusai!’ Ena tekivu na veivakarusai qori ena nona ravuti o “Papiloni na Ka Levu” na lotu lasu kece e vuravura, e kilai tale ga me “saqamua.” (Vkta. 17:5, 6, 15) Na nodra ravuti na lotu lasu kece, wili kina o lotu ni Veivanua Vakarisito e itekitekivu sara ga ni “veivakararawataki levu.” (Maciu 24:21; 2 Ces. 2:8) E levu era na kidacalataka na kena yaco qori. Baleta? Ena gauna mada ga ya, ena raici koya tu ga na saqamua me vaka e dua na ‘ranadi’ ena “sega sara ga ni lolosi.” Ia ena liaca ni cala na nona vakanananu. Na totolo ni nona vakarusai e vaka ga e yaco ena “dua ga na siga.”—Vkta. 18:7, 8.
6. O cei ena vakarusai lotu lasu?
6 E tukuna na Vosa ni Kalou ni “manumanu kila” e ‘tini na kena ileu’ ena ravuta na saqamua. Nida vulica na ivola na Vakatakila, eda na kila kina ni manumanu kila e dusia na Matabose kei Vuravura. Na “tini na ileu” e vakatayaloyalotaki ira na iliuliu kece vakapolitiki nikua era tokona tiko na “manumanu kila kulakula.”a (Vkta. 17:3, 5, 11, 12) Na ivakarau vakaloloma cava ena caka vua ni sa ravuti? Na veimatanitu era lewe ni Matabose kei Vuravura era na kauta kece na nona iyau na saqamua, era na vakatakila na nona ivakarau ca kei na nona itovo vakasisila, era na basuraki koya qai “vakamai koya ena bukawaqa me yavu sara.” Io, ena qeavu vakadua o lotu lasu.—Wilika Vakatakila 17:16.
7. Na cava ena vakavuna na nona ravuravu na “manumanu kila”?
7 E vakamacalataki tale ga ena iVolatabu na ka ena vakavuna na nona ravuti o lotu lasu. O Jiova ena uqeta na lomadra na iliuliu vakapolitiki “mera cakava na nona inaki,” ya me vakarusai na saqamua. (Vkta. 17:17) Dua na ka na nona bukana tiko o lotu na ivalu, e vakavuna tale tiko ga e levu na leqa e vuravura. Oya na vuna era nanuma kina na veimatanitu ni na yaga vei ira me vakarusai na saqamua. Nira ravuta na saqamua na iliuliu vakapolitiki, de dua era na nanuma nira “lomavata” tiko mera cakava na ka era vinakata. Na kena dina ga ni vakayagataki ira tiko na Kalou mera vakarusa na lotu lasu kece. Ni veisau gona vakasauri na ituvaki, era na veiraravui ga vakataki ira na ito i Setani, ena sega ni tarova rawa qori o Setani.—Maciu 12:25, 26.
RAVUTI NA TAMATA NI KALOU
8. Na cava na ibalebale ni nona ravuravu o “Koki, na vanua nei Mekoki”?
8 Ni sa vakarusai o lotu lasu, ena laurai tiko ga vei ira na dauveiqaravi ni Kalou nira “tiko vakacegu” qai ‘sega tu nira vakabai.’ (Isik. 38:11, 14) Na cava ena yacovi ira na ilala qori era sokaloutaki Jiova e nanumi nira sega tu ni taqomaki? Era na rairai ravuti ira na ilala qori e “lewe vuqa.” E vakamacalataka na Vosa ni Kalou na ituvaki qori me nona ravuravu o “Koki, na vanua nei Mekoki.” (Wilika Isikeli 38:2, 15, 16.) Meda raica vakacava na ravuravu qori?
9. (a) Na cava e bibi cake vei keda na lotu vaKarisito? (b) Na cava meda cakava ena gauna qo me dei kina na noda vakabauta?
9 Eda kila nira na ravuti na tamata ni Kalou, ia eda na sega ni leqataka vakasivia qori. Na kena vakalagilagi na yaca i Jiova kei na vakacerecerei ni nona veiliutaki e bibi cake mai na noda vakabulai. A cavuta sara ga vaka60 vakacaca o Jiova: “Ia dou na kila ni sai au ko Jiova.” (Isik. 6:7) Eda vakanamata ena gauna ena vakayacori kina na parofisai bibi i Isikeli, nida vakabauta “ni kila o Jiova na sala me vakabulai ira kina era qarava na Kalou nira vakatovolei.” (2 Pita 2:9) Ena gauna mada ga qo, meda saga ena noda vinaka kece me dei na noda vakabauta me rawa nida yalodina tiko ga vei Jiova, veitalia se veivakatovolei cava eda na rairai sotava. Eda na cakava vakacava qori? E dodonu meda masu, vulica na Vosa ni Kalou qai vakasamataka vakatitobu, meda tukuna tale ga yani na itukutuku vinaka ni Matanitu ni Kalou vei ira na so tale. Nida cakava qori, ena dei me vaka na “ikelekele” na noda nuitaka na bula tawamudu.—Iper. 6:19; Same 25:21.
ERA NA QAI KILAI JIOVA NA VEIMATANITU
10, 11. Ena tekivu vakacava na Amaketoni, na cava ena yaco ena gauna qori?
10 Dua na ka veivakurabuitaki ena yaco nira sa ravuti na dauveiqaravi i Jiova. Na cava ya? O Jiova ena vakayagataki Luvena kei ira na mataivalu vakalomalagi mera vukei ira na tamata ni Kalou. (Vkta. 19:11-16) Qori sara ga na “ivalu ni siga levu ni Kalou Kaukaua Duadua,” na Amaketoni.—Vkta. 16:14, 16.
11 A tukuna o Jiova me baleta na ivalu ena ravuti kina o Koki: “‘Ia ka’u na kaciva mai na kenai seleiwau e na noqu veiulu-ni-vanua kecega, sa kaya na Turaga ko Jiova: era na dui vala na tamata yadua kei na kai nona.’ ” Ena tatawasewase na ka kece e lewa tu o Setani. E tukuna o Jiova: “Na buka waqa, kei na sulifuri, ka’u na vakatauca vua [Koki] kei na nonai valu, kei na veimataqali e vuqa era tiko kaya.” (Isik. 38:21, 22) Na cava ena yaco ni cakava qori na Kalou?
12. Na cava era na qai kila na veimatanitu?
12 Era na qai kila na veimatanitu ni o Jiova ga e vakarota mera vakarusai. Me vakataki ira ga na kai Ijipita era cemuri ira na Isireli ena Wasa Damudamu, era na domobula tale ga na ito nei Setani ena nodra rairai kaya: “Sa totaki ira ko Jiova”! (Lako 14:25) Io era na qai kila ena gauna qori na veimatanitu se o cei dina o Jiova. (Wilika Isikeli 38:23.) Vakacava, sa voleka sara na gauna ena yaco kina na ituvaki kece qori?
ENA SEGA NI DUA TALE NA MATANITU QAQA
13. Na cava eda vulica me baleta na ikalima ni tiki ni matakau e vakamacalataka o Taniela?
13 Na parofisai ena ivola i Taniela e vukei keda meda kila na gauna eda sa donuya tu qo. A vakamacalataka o Taniela e dua na matakau e vaka na irairai ni tamata qai buli mai na duidui vatutalei. (Tani. 2:28, 31-33) E vakatayaloyalotaki ira qori na veimatanitu qaqa e vuravura, qai levu na ka era dau cakava vei ira na tamata ni Kalou ena gauna qo kei na gauna sa oti. Qori o Papiloni, Mitia kei Perisia, Kirisi, Roma. Na kena iotioti e matanitu qaqa ena noda gauna. Eda vulica ena parofisai i Taniela ni iotioti ni matanitu qaqa qori e vuravura, e vakatayaloyalotaki tiko ena yava kei na qaqalo ni yava ni matakau. Ena iMatai ni iValu Levu erau tekivu cakacaka vata ena dua na inaki o Peritania kei Merika. Na ikalima gona ni tiki ni matakau a parofisaitaka o Taniela, na matanitu qaqa e vuravura o Peritania kei Merika. Na yava e iotioti ni tiki ni matakau, qori e dusia ni na sega ni dua tale na matanitu qaqa e vuravura. Na veiwaki ni aironi kei na tete ena yava kei na qaqalo ni yava ni matakau, e dusia eso na ka e vakamalumalumutaki Peritania kei Merika.
14. Na matanitu qaqa cava ena veiliutaki tiko e vuravura ni yaco na Amaketoni?
14 E vakamacalataki ena parofisai vata ga ya, na Matanitu ni Kalou e vakatayaloyalotaki ena vatu levu a kavida mai na ulunivanua se na veiliutaki cecere i Jiova ena 1914. Na vatu sa voleka sara ni lauta na takete—oya na yava ni matakau. Ena vurumemeataki ena Amaketoni na yava kei na vo tale ni tiki ni matakau. (Wilika Taniela 2:44, 45.) Koya gona, ena matanitu qaqa tiko e vuravura o Peritania kei Merika ena gauna e yaco kina na Amaketoni. Ena vakasakiti dina meda raica na vakayacori ni parofisai qori!b Ia na cava ena cakava o Jiova vei Setani?
NA CAVA ENA YACO VUA NA MECA LEVU NI KALOU?
15. Ni oti na Amaketoni, na cava ena yacovi Setani kei ira na timoni?
15 Kena imatai, ena raica sara ga o Setani na vakarusai ni nona isoqosoqo kece e vuravura. Sa na qai taketetaki o Setani. E tukuna na yapositolo o Joni na ka ena yaco tarava. (Wilika Vakatakila 20:1-3.) O Jisu Karisito “na agilosi . . . e taura tu na ki ni qara e sega ni vakabotona,” ena vesuki Setani kei ira na nona timoni, ena kolotaki ira ena qara e sega ni vakabotona, ra qai vesu me 1,000 na yabaki. (Luke 8:30, 31; 1 Joni 3:8) Qori na sala ena tekivu butuqaqi se vakarusai kina na ulu ni gata.c—Vakatekivu 3:15.
16. Na cava ena yacovi Setani ni biu ena “qara e sega ni vakabotona”?
16 Na cava na “qara e sega ni vakabotona” ena kolotaki kina o Setani kei ira na timoni? Na vosa vaKirisi e vakayagataka o Joni na aʹbys·sos e kena ibalebale “titobu sara ga.” E vakadewataki tale ga me “tawavakaiyalayala, e sega ni katumi rawa” qai “tawayalani.” Na vanua qori e sega ni lakova rawa e dua, o Jiova ga kei na agilosi e lesia me taura na “ki ni qara e sega ni vakabotona.” Ni tu e kea o Setani, ena vaka ga e mate tu qai sega ni cakava rawa e dua na ka me “kua tale ni vakacalai ira na veimatanitu.” Io, sa na sega tale ni ‘tagi na laione o Setani!’—1 Pita 5:8.
NA KA ENA YACO NI BERA NA GAUNA NI VAKACEGU
17, 18. (a) Na ituvaki cava e se bera ni yaco eda sa veivosakitaka mai? (b) Ni yaco oti na ituvaki kece qori, na cava eda na marautaka?
17 Sa voleka me yaco qo na ka vakairogorogo qai vakadomobula. Eda vakanamata ena gauna ena vakayacori kina na kena kacivaki na “Vakacegu kei na sautu!” Oti eda na qai raica na nona vakarusai o Papiloni na Ka Levu, na nona ravuravu o Koki ena vanua o Mekoki, na ivalu na Amaketoni, kei na nona kolotaki ena qara e sega ni vakabotona o Setani kei ira na nona timoni. Ni sa oti kece na ituvaki qori qai sega tale na veika ca, sa na veisau sara na noda bula ena loma ni duanaudolu na yabaki ni nona veiliutaki o Karisito. Eda na marautaka ena gauna qori na ‘vakacegu levu.’—Same 37:10, 11.
18 Me ikuri ni lima na ituvaki eda sa veivosakitaka mai, e tiko eso tale na ka “e sega ni rairai” e bibi meda “raica tiko ga.” Ena veivosakitaki qori ena ulutaga e tarava.
[iVakamacala e ra]
a Raica na Revelation—Its Grand Climax at Hand! tabana e 251-258.
b Na matavosa “vakaotia na veimatanitu oqori” ena Taniela 2:44, e vakaibalebaletaki ira na matanitu se matanitu qaqa e vuravura era vakatayaloyalotaki ena veitiki ni matakau. Ia e dua tale na parofisai vakaivolatabu e vakamacalataka na gauna qori, e tukuna ni o ira “na tui ni vanua tawani kece kei vuravura” era na vala kei Jiova ena “siga levu ni Kalou Kaukaua Duadua.” (Vkta. 16:14; 19:19-21) Kena ibalebale nira sega wale ga ni vakarusai ena Amaketoni na matanitu era vakatayaloyalotaki ena matakau, ia ena vakarusai na matanitu kece e vuravura.
c Na iotioti ni kena butuqaqi na ulu ni gata ena yaco ni sa oti na duanaudolu na yabaki, ni sa kolotaki o Setani kei na nona timoni ena “drano bukawaqa e caudre tu ena sulifure.”—Vkta. 20:7-10; Maciu 25:41.
[Kato/iYaloyalo ena tabana e 4, 5]
LIMA NA ITUVAKI E SE BERA NI YACO:
Tukuni na “Vakacegu kei na sautu!”
Na veimatanitu ena ravuravu qai vakarusai “Papiloni na Ka Levu”
Ravuti na tamata i Jiova
iValu na Amaketoni
Kolotaki ina qara e sega ni vakabotona o Setani kei ira na nona timoni
[iYaloyalo ena tabana e 3]
[iYaloyalo ena tabana e 4]
[iYaloyalo ena tabana e 4]
[iYaloyalo ena tabana e 5]
[iYaloyalo ena tabana e 5]
[iYaloyalo ena tabana e 5]