Vuna Eda Gadreva Kina na Kalou

Era tukuna o ira na dau dikeva na vakasama nida na marau ke da gadreva na veika vakayalo. Eda vakadinadinataka nikua ni levu era saga me vakainaki na ka era cakava, se ra lewena eso na isoqosoqo mera vukei ira eso tale. Eso era nanuma ni na vakacegui na nodra gagadre vakayalo ena nodra vakayagataka nodra gauna galala ena cakacaka ni liga, vulica na ivakavakayagataki ni iyaya ni ivakatagi, se dikeva na kau kei na manumanu. Ia e levu era sega ni vakila na vakacegu dina nira cakava qori.

Era kila vinaka na dauwilika na iVolatabu nida buli meda gadreva na veika vakayalo. E tukuni ena imatai ni iwase ena Vakatekivu ni buli rau oti na imatai ni veiwatini na Kalou, a vosa vei rau e veisiga, e rawa kina me ratou veivolekati. (Vakatekivu 3:​8-10) A sega ni buli keda na Kalou meda lewai keda ga, eda gadreva gona na nona veidusimaki. Qori na ka e cavuti wasoma ena iVolatabu.

Kena ivakaraitaki, a tukuna o Jisu: “Era marau o ira na kila nira gadreva na Kalou.” (Maciu 5:3) Eda kila mai na vosa qori ni na rawa ga nida marau qai lomavakacegu ke da vakaceguya na noda gagadre meda kila na Kalou. Eda na cakava vakacava qori? A vakaraitaka o Jisu na kena isau ena nona kaya: “E sega ni bula na tamata ena madrai wale ga, e bula ga ena vosa kece e lako mai na gusu i Jiova.” (Maciu 4:4) Na vosa ni Kalou se na nona vakanananu kei na nona ivakasala ena iVolatabu ena vakamarautaki keda qai vakainaki kina na noda bula. E rawa vakacava qori? Meda dikeva mada e tolu na vuna.

Gadrevi na Veidusimaki Dodonu

Nikua sa dua na ka na levu ni ivakasala, sa tu na tabana e veivakasalataki me baleta na veimaliwai, veidomoni, bula vakavuvale, veivakameautaki, marau kei na sala me vakainaki kina na bula. Ia na ivakasala i cei e vinaka duadua? Na nona ivakasala ga na Kalou o Jiova, ni a buli keda.

Kena ivakaraitaki: Nida volia e dua na iyaya vou me vaka na kompiuta se itaba, e dau lako vata mai kei na idusidusi ni kena ivakavakayagataki dodonu. E vaka tale ga na ivoladusidusi na iVolatabu. E vakarautaka vei keda na Kalou qai vakamacalataki tu kina na ivakasala yaga me baleta na noda bula. E tukuni kina na ka eda rawa ni cakava kei na sala ena vinaka qai vakainaki kina na noda bula.

Me vaka ga e dua na ivoladusidusi matata, na iVolatabu e vakasalataki ira na wilika ena ka e rawa ni vakaleqa na nodra bula. De dua eda taleitaka na nodra ivakasala eso tale se rawarawa cake me muri, ia vakacava ke da via kila na iwali vinaka duadua ni leqa, kei na ka meda qaqarauni kina, ena ka vakayalomatua beka meda muria ga na veidusimaki nei koya e buli keda?

E dau veidusimaki qai veivakavulici o Jiova, ia ena sega vakadua ni vakasaurarataki keda meda muria na ka e tukuna. Ni lomani keda qai vinakata meda marau, e vakamasuti keda: “Koi au ko Jiova na nomu Kalou, ka’u sa vakavulici iko mo vinaka kina, ka’u sa tuberi iko e na sala mo lakova. De ko a vakarorogo ki na noqu vunau! sa na qai vaka na uciwai na nomu vakacegu, ka vaka na ua ni wasawasa na nomu cakacaka dodonu.” (Aisea 48:​17, 18) Eda rawa ga ni kaya ke da muria na veidusimaki ni Kalou ena vinaka na noda bula. Ena dua tale na yasana, me vinaka na noda bula da qai marau e gadrevi na veidusimaki ni Kalou.

Gadrevi na iSaunitaro ni Noda Leqa

Eso era nanuma nira sega ni gadreva na Kalou ni levu na ka era lomatarotarotaka tu me baleta na bula, era sega kina ni vakabauta ni dauloloma na Kalou. Kena ivakaraitaki, era na rairai kaya: ‘Na cava era rarawa kina na tamata vinaka?’ ‘Na cava e bulicaki kina vakatani na yagodra eso na gone era sucu?’ ‘Na cava e levu kina na veika tawadodonu?’ Era taro bibi dina qori, ena yaga sara vakalevu ena nomu bula ke o kila na kena isau. E vinaka meda kua ni totolo ni beitaka na Kalou ni yaco na leqa, ia meda raica mada na ka e tukuna nona Vosa na iVolatabu.

Ena ikatolu ni wase ni Vakatekivu, eda wilika kina na itukutuku kei Setani, e vakayagataka na gata me nona waqawaqa me vakacalai rau kina na imatai ni veiwatini me rau beca na ivakaro ni Kalou o Jiova me rau kua ni kania na kau e kilai kina na ka vinaka kei na ka ca. E kaya vei Ivi o Setani: “Drau na sega dina ni mate: ni sa kila na Kalou e na siga drau na kana kina ena qai yadra dina na matamudrau; ia drau na vaka na Kalou, ni drau na kila na ka vinaka kei na ka ca.”​—Vakatekivu 2:​16, 17; 3:​4, 5.

E tukuna tiko e keri o Setani ni na vinaka cake na bula ni kawatamata ke ra vakarorogo vua, e kaya tale ga ni lasu na Kalou qai sega ni dodonu na ivakarau ni nona veiliutaki. Ena taura toka na gauna me na qai wali na ile qori, mani vakalaiva o Jiova me yaco mada na lomai Setani me vakadinadinataka kina na nona veibeitaki. E solia o Jiova na gauna me vakadinadinataka mada o Setani kei ira na nona ito na nona ile ni na vinaka cake na bula ni kawatamata ke sega na veidusimaki ni Kalou.

Na cava mada o nanuma me baleta na veibeitaki i Setani? Ena vinaka cake na noda bula ke sega na veidusimaki ni Kalou? Sa vica vata mai qo na senitiuri eda se rarawa voli ga, dua na ka na levu ni ivalavala tawadodonu, tauvimate kei na mate, basulawa, ivakarau kei na itovo vakasisila, ivalu, labakawa kei na ivalavala torosobu tale eso, qori e vakadinadinataka ni sa sega tu ga ni rawa vua na tamata me lewai koya ga. Na iVolatabu e sega ni tukuna ni vakavuna na Kalou na noda rarawa, ia e vakamacalataka vakamatata na ka e vakavuna: “Sa dua na gauna sa lewa kina na tamata vua na tamata tani ka sa mani ca kina.”​—Dauvunau 8:9.

E vakadinadinataki beka ena ka eda sa dikeva qori ni dodonu ga me dusimaki keda na Kalou meda kila na isaunitaro ni leqa e tarai keda kei na kena iwali? Na cava ena cakava na Kalou?

Gadrevi na Veidusimaki ni Kalou

Era vinakata tu e levu mera galala mai na tauvimate, bula vaqase kei na mate. Dua na ka na levu ni gauna, ilavo kei na iyau era vakayagataka mera rawata kina qori, ia e maumau wale. Eso era vakabauta nira na bulabula vinaka tu ga ke ra gunuva na veimataqali wai se toki ina so tale na vanua, ia era vakanuinuikara wale ga.

E vinakata na Kalou me vinaka na noda bula, meda marau tale ga. Ia se sega ni guilecava o koya na inaki taumada qori. (Vakatekivu 1:​27, 28; Aisea 45:18) E vakadeitaka o Jiova ni na yaco dina na nona inaki. (Aisea 55:​10, 11) E tukuna vei keda na iVolatabu na yalayala ni Kalou me vakalesui tale mai na Parataisi erau a vakayalia o Atama kei Ivi. Ena iotioti ni ivola ena iVolatabu e vakamacalataki kina qo: “[Na Kalou o Jiova ena] qusia . . . na wainimata kece mai na matadra, sa na sega tale na mate, na lolosi, na tagiyaso, kei na mosi. Sa sega na veika e dau yaco e liu.” (Vakatakila 21:4) Ena vakalesuya mai vakacava na Kalou na veika totoka qori? Ena yaga vakacava vei keda?

A vakavulici ira na nona imuri na Luve ni Kalou o Jisu Karisito mera masuta me yaco na loma ni Kalou e vuravura. E levu era kila se rawa nira cavuqaqataka na masu, e dau tukuni tu me masu ni Turaga: “Tamai keimami mai lomalagi, me dokai na yacamuni. Me yaco mai na nomuni matanitu. Me caka na lomamuni e vuravura me vaka e caka tiko mai lomalagi.” (Maciu 6:​9, 10) Io, na Matanitu ni Kalou ena vaqeavutaka na veivakalolomataki ni veiliutaki vakatamata qai tauyavutaka e dua na vuravura vou me vaka na nona yalayala era na tiko kina na yalododonu.a (Taniela 2:44; 2 Pita 3:13) Na cava meda cakava meda marautaka kina na yalayala ni Kalou?

E vakamacalataka o Jisu e dua na ka meda cakava e sega sara ni dredre: “Ena rawata na bula tawamudu o koya e vulica tiko ga na veika e baleti kemuni na Kalou dina duadua ga, kei Jisu Karisito oni tala mai.” (Joni 17:3) Io, ena veivuke ni Kalou eda na bula tawamudu ena vuravura vou me vaka e yalataka. Na nomu kila na inuinui qori o na rawa ni vakaiotaka tale ga kina na taro eda taroga voli mai: Eda gadreva dina na Kalou?

Meda Vakasaqara na Kalou

Ena rua na udolu na yabaki sa oti ni vunau tiko o Paula ena Areopakasi vei ira na kai Aceni era dau rogoca na ivakavuvuli vou, e kaya: “O koya ga e solia vei keda na bula, na icegu, kei na ka kece ga. Ni o koya ga a buli keda, e vakatau tale ga vua na noda bula tiko kei na noda yavala me vaka ga era kaya eso na nomuni dauniserekali, ‘Eda nona kawa tale ga o keda.’ ”​—Cakacaka 17:​25, 28.

E dina sara ga na ka e tukuna qori o Paula. E solia vei keda na Dauveibuli na cagi, kakana, kei na wai meda gunuva. Eda na sega ni bula ke sega ni vakarautaka o Jiova na veika totoka qori. E wasea vei keda vakatautauvata, se da qaravi koya se sega. Na cava e cakava kina qori? E tukuna o Paula me rawa nira “vakasaqara na Kalou, de dua era na vakayayamo ra qai kunei koya sara, ni sega ni yawa o koya vei keda yadua.”​—Cakacaka 17:27.

E levu tale na ka o rawa ni kila me baleta na inaki ni Kalou kei na sala mo marautaka kina na nomu bula ena gauna qo kei na gauna se bera mai. O vinakata mo vulica tale ga qori? Ke vaka kina, mo veitalanoa tale kei na iVakadinadina i Jiova e solia vei iko na mekesini qo se dua tale e sikovi iko yani. Era na marau mera vukei iko.