Marautaka na Vakamau ni Lami!

1, 2. (a) Na vakamau nei cei ena marautaki vakalevu e lomalagi? (b) Na taro cava e basika?

E DAU taura toka na gauna me vakarautaki e dua na soqo ni vakamau. Ia eda na veivosakitaka qo e dua na vakamau e vakasakiti duadua​—na vakamau vakatui. Vakasamataka mada! Sa rauta ni 2,000 na yabaki na kena vakarautaki voli mai. E toso totolo sara tiko na gauna me rau na vakaduavatataki kina o taganevou kei watina. Sa voleka me lalata na vale ni Tui na ivakatagi ni marau, ra qai sere ena domoilevu o ira na ka bula e lomalagi: “Moni vakacaucautaki Ja na tamata, ni sa tekivu veiliutaki vakatui o Jiova na noda Kalou Kaukaua Duadua. Meda marau, meda marau vakalevu, meda vakalagilagi koya, ni sa yaco mai na gauna ni nona vakamau na Lami, sa vakarautaki koya tu na watina.”​—Vkta. 19:​6, 7.

² O Jisu Karisito ga “na Lami” e tukuni ni na marautaki e lomalagi nona vakamau. (Joni 1:29) Ena vakacava mada na nona isulu ni vakamau? O cei na watina? E vakarautaki koya vakacava o watina ena vakamau? Ena yaco ena gauna cava na vakamau? Ena marautaki mai lomalagi na vakamau qo, ia vakacava era na marau tale ga o ira na nuitaka na bula tawamudu e vuravura? Eda via kila sara ga na isau ni taro qori. Sa na qai matata qori nida tomana noda dikeva na Same 45.

‘VAKABOIVINAKATAKI NA NONA ISULU’

3, 4. (a) Na cava e tukuni me baleta nona isulu ni vakamau na Taganevou, na cava tale e marautaka? (b) O cei o ira na ‘luvedra na yalewa na tui’ kei ira na ‘itokani vakatui’ era marau vata kei na Taganevou?

³ Wilika Same 45:​8, 9. Na Taganevou, o Jisu Karisito, e dara na nona isulu vakatui lagilagi ni vakamau. Nona isulu e vaka na iboi ni ‘isaluaki talei,’ me vaka na mura kei na kasia, na isaluaki e dau vakayagataki me waiwai ni veilumuti e Isireli.​—Lako 30:​23-25.

⁴ Ni sa voleka tiko mai na gauna ni vakamau, sa qai marau ga vakalevu na Taganevou ni rogoca na totoka ni ivakatagi vakalomalagi e lalata nona vale. Era marau vata kei koya o ira na nona ‘itokani vakatui,’ qori na isoqosoqo vakalomalagi ni Kalou, era okati tiko kina na ‘luvedra yalewa na tui,’ qori o ira na agilosi yalodina. Sa na bau vakatubuqoroqoro dina nodra lagata na ka bula vakayalo mai lomalagi: “Meda marau, meda marau vakalevu . . . ni sa yaco mai na gauna ni nona vakamau na Lami”!

TU VAKARAU NA YALEWAVOU INA VAKAMAU

5. O cei na ‘wati ni Lami’?

⁵ Wilika Same 45:​10, 11. Eda sa mai kila na Taganevou, ia o cei na yalewavou? Qo e sega ni vakaibalebaletaka e dua ga na tamata, ia e dusi ira vakailawalawa o ira na lewe ni ivavakoso vaKarisito lumuti e liutaka tiko o Jisu Karisito. (Wilika Efeso 5:​23, 24.) O ira qo era na lewe ni Matanitu vakaMesaia i Karisito. (Luke 12:32) O ira na 144,000 na lotu vaKarisito lumuti qo, era na “muria tiko ga na Lami se mani vanua cava e lako kina.” (Vkta. 14:​1-4) Era na yaco mera ‘wati ni Lami,’ ra qai vakaitikotiko kei koya mai lomalagi.​—Vkta. 21:9; Joni 14:​2, 3.

6. Na cava era vakatokai kina na lumuti mera “luvena yalewa na tui,” na cava e tukuni kina mera ‘guilecavi ira na kai nodra’?

⁶ E sega ni vakatokai ga na wati ni Lami me “luvena yalewa,” e vakatokai tale ga me “luvena yalewa na tui.” (Same 45:13) O cei na “tui”? O Jiova. E okati ira na lotu vaKarisito lumuti mera “luvena.” (Roma 8:​15-17) Me vaka nira na yaco na lumuti mera watina na taganevou e lomalagi, era vakaroti kina: “Guilecava na kai nomu, kei na vale i tamamu [vakayago].” Kena ibalebale ena vinakati mera “vakasamataka tiko ga na veika mai cake, [mera] kua ni vakasamataka na veika ni vuravura.”​—Kolo. 3:​1-4.

7. (a) Na cava sa cakava voli mai o Karisito me vakarautaki yalewavou kina? (b) Na cava nona rai o yalewavou me baleti taganevou?

⁷ Ena veisenitiuri sa sivi, sa vakarautaka voli mai o Karisito na yalewavou ena vakawatitaka e lomalagi. E vakamacalataka na yapositolo o Paula ni o Karisito e “lomana na ivavakoso. . . qai solia kina nona bula, me rawa ni vakatabuya, me vakasavasavataka ena nona savata ena wai ni vosa ni Kalou, me taura kina na ivavakoso ena kena totoka kece, e sega ni takava e dua na duka se sanuki se dua na ka va qori, ia e dodonu me savasava, me kua ni vakamelei.” (Efeso 5:​25-27) E tukuna o Paula vei ira na lotu vaKarisito lumuti taumada e Korinica: “Dua na ka noqu kauaitaki kemuni me vaka ga na nona kauaitaki kemuni na Kalou, niu a musuki kemuni vua e dua me watimuni, meu rawa ni soli kemuni vei Karisito me vaka e dua na goneyalewa savasava.” (2 Kor. 11:2) E marautaka na Taganevou, na Tui o Jisu Karisito na ‘totoka’ vakayalo ni kena irairai na yalewavou. Na yalewavou e raici taganevou me nona “turaga” qai “vakarokoroko” vua.

‘KAU VUA NA TUI’ NA YALEWAVOU

8. Na cava e veiganiti kina me tukuni ni ‘totoka na kena irairai’ na yalewavou?

⁸ Wilika Same 45:​13, 14a. Dua na ka na ‘totoka ni kena irairai’ na yalewavou ni gole ena vakamau vakatui. Ena Vakatakila 21:​2, na yalewavou e vakatautauvatataki ina dua na siti, o Jerusalemi Vou, e “uku me lako vei watina.” E laurai na “lagilagi ni Kalou” ena siti vakalomalagi qo, e ramase “me vaka na vatutalei totoka duadua, e vaka na vatu jasipa e tatalivaliva qai savasava me vaka na karisitala.” (Vkta. 21:​10, 11) E vakamacalataki vinaka ena Vakatakila na lagilagi kei na serau i Jerusalemi Vou. (Vkta. 21:​18-21) Sa rauta me tukuna na daunisame ni ‘totoka na kena irairai’ na yalewavou! Io, eda namaka ga me va qori na kena totoka, baleta ni vakayacori sara ga mai lomalagi na vakamau vakatui.

9. O cei “na tui” ena kau mai vua na yalewavou, e vakacava nona isulu ni vakamau na yalewavou?

⁹ Ena kau na yalewavou vei taganevou, na Tui vakaMesaia. Sa vakarautaki yalewavou tiko mai na Tui ena nona ‘vakasavasavataki koya, qori ena nona savati koya ena wai ni Vosa ni Kalou.’ E ‘savasava qai sega ni vakamelei rawa’ na yalewavou. (Efeso 5:​26, 27) Ena dara tale ga o yalewavou na isulu e ganita sara ga na soqo qo. Nona ‘isulu e tali vata kei na koula,’ sa na qai ‘kau o koya vua na tui ena isulu talitali.’ Ena vakamau ni Lami, “e sa vakadonui [na yalewavou] me vakaisulu ena lineni vinaka sara, e savasava qai sekavula, ni vakaibalebaletaka na nodra cakacaka dodonu na yalosavasava na lineni vinaka sara qori.”​—Vkta. 19:8.

‘SA YACO MAI NA GAUNA NI VAKAMAU’

10. Gauna cava ena vakayacori kina na vakamau ni Lami?

¹⁰ Wilika Vakatakila 19:7. Gauna cava sa na vakayacori kina na vakamau ni Lami? Sa ‘vakarautaki koya tu o yalewavou’ ena vakamau, ia na veitikina tarava ena wase qori e sega ni vakamacalataka tiko na vakamau. E vakamacalataki ga kina na iotioti ni iwasewase ni veivakararawataki levu. (Vkta. 19:​11-21) Vakacava, e kena ibalebale qori ni na caka e liu na vakamau qai muri nona vakacavara na Tui nona ravuravu ena qaqa? Sega. Na raivotu ena ivola na Vakatakila e sega ni biu mai vakaveitaravi. E tukuni ena ika45 ni Same, ni tekivu na vakamau vakatui ni oti nona vauca e dibina na Tui o Jisu Karisito na iseleiwau qai ravuti ira nona meca ena ‘qaqa.’​—Same 45:​3, 4.

11. Na cava eso na ka ena cakava veitaravi o Karisito me vakacavara kina nona ravuravu?

¹¹ Qo na ka eda vakadeitaka ni na yaco veitaravi: iMatai, ena vakarusai na “tinadra na saqamua” o Papiloni na Ka Levu, na lotu lasu kece e vuravura. (Vkta. 17:​1, 5, 16, 17; 19:​1, 2) Ni oti qori o Karisito ena vakatauca na lewa ni Kalou vei ira na vo ni veika ca i Setani e vuravura ena nona veivakarusai ena Amaketoni, na “ivalu ni siga levu ni Kalou Kaukaua Duadua.” (Vkta. 16:​14-16; 19:​19-21) Kena iotioti, sa na qai vakacavara na Tui Dauvala nona ravuravu ena nona biuti Setani kei ira nona timoni ena qara sega ni vakabotona, e vaka ga era mate nira sega ni cakava rawa e dua na ka.​—Vkta. 20:​1-3.

12, 13. (a) Gauna cava ena tekivu kina na vakamau ni Lami? (b) O cei e lomalagi ena marautaka na nona vakamau na Lami?

¹² Gauna ga era vakacavara kina na lotu vaKarisito lumuti nodra bula e vuravura ena iotioti ni veisiga qo, era na vakaturi sara mera lai bula e lomalagi. Ena loma ni dua na gauna ni oti nona vakarusai o Papiloni na Ka Levu, ena qai kumuna o Jisu na ivovo ni lumuti era lewe ni ilawalawa yalewavou. (1 Ces. 4:​16, 17) Ni bera gona ni tekivu na ivalu na Amaketoni, era sa na tiko kece e lomalagi o ira na lewe ni ilawalawa “yalewavou.” Ni oti na ivalu qori, sa na qai vakayacori na vakamau ni Lami. E sa na marautaki mada ga na soqo ni vakamau qori! E tukuni ena Vakatakila 19:9: “Era marau o ira na sureti ina soqo ni kana magiti ni vakamau ni Lami.” Era na marau dina na le 144,000 na lewe ni ilawalawa ni yalewavou. Ena marau tale ga vakalevu na Taganevou se na Tui nira tiko kece na nona itokani mera ‘kana ra qai gunu vata kei koya vakaivakatakarakara ena nona teveli ena nona Matanitu.’ (Luke 22:​18, 28-30) Ia eso tale era na marautaka na gauna qori.

¹³ Me vaka eda sa dikeva mai, era na lagata ena duavata na agilosi: “Meda marau, meda marau vakalevu, meda vakalagilagi koya [Jiova], ni sa yaco mai na gauna ni nona vakamau na Lami, sa vakarautaki koya tu na watina.” (Vkta. 19:​6, 7) Ia vakacava o ira na dauveiqaravi i Jiova e vuravura? Era na marau tale ga?

“ERA NA KAU MAI E NA MARAU”

14. Me vaka e vakamacalataki ena Same 45, o cei o ira ‘na itokani goneyalewa savasava’ ni yalewavou?

¹⁴ Wilika Same 45:​12, 14b, 15. A tukuna na parofita o Sakaraia nira na marau ni qaravi Jiova vata ena iotioti ni veisiga qo o ira na ivovo ni Isireli vakayalo kei ira na tamata mai na veiyasa i vuravura. E parofisaitaka: “E na gauna ko ya, era na mai taura na tutu ni nonai sulu e dua na Jiu, e lewe tini na tamata era duivosavosa mai na veivanua kecega, ka kaya, Keitou na lako vata kei kemudou: ni keitou sa rogoca sa tiko vata kei kemudou na Kalou.” (Saka. 8:23) Ena Same 45:​12, na “tini na tamata” e vakatayaloyalotaka na “goneyalewa ni Taia” kei na ‘tamata vutuniyau duadua.’ Na nodra soli iloloma vei ira na ivovo ni lumuti e ivakatakarakara ga. E dusia ga nira ‘qara tiko na nodra veivakadonui’ kei na nodra veidusimaki vakayalo na ivovo ni lumuti. Me tekivu mai na 1935, vica vata na milioni era sa laiva vei ira na ivovo ni lumuti me ‘dusimaki ira mera yalododonu.’ (Tani. 12:3) Nira nodra itokani yalodina na lotu vaKarisito lumuti, era sa vakasavasavataka tale ga na nodra bula mera savasava vakayalo. Oya na vuna era vakatokai kina mera ‘itokani goneyalewa savasava.’ O ira na itokani ni yalewavou qo, era sa yalataka na nodra bula vei Jiova ra qai vakaraitaka nira yalodina ena veiliutaki i Taganevou na Tui.

15. Era cakacaka vata vakacava o ira na ivovo ni ilawalawa ni yalewavou e vuravura kei na nodra ‘itokani goneyalewa savasava’?

¹⁵ Era marautaka vakalevu na ivovo ni lumuti era lewe ni ilawalawa yalewavou na nodra gumatua na nodra ‘itokani goneyalewa savasava’ ena vunautaki ni “itukutuku vinaka ni Matanitu” ena veiyasa i vuravura. (Maciu 24:14) Erau sega ni “kaya tiko ga na yalo tabu kei na yalewavou: ‘Mai!’ ” o ira tale ga era rogoca era kaya: “Mai!” (Vkta. 22:17) Io, o ira na ‘so tale na sipi’ era rogoci ira na ivovo ni lumuti ni yalewavou nira kaya “Mai!” era sa duavata tale ga kei na yalewavou ena nodra kaya “Mai!” vei ira na lewe i vuravura.​—Joni 10:16.

16. Na ka dokai cava e solia o Jiova vei ira na so tale na sipi?

¹⁶ O ira na ivovo ni lumuti era lomani ira na nodra itokani na so tale na sipi. Dua na ka nodra marau ni vakadonuya o Jiova mera marautaka tale ga na so tale na sipi na vakamau ni Lami. E parofisaitaki ni o ira na ‘itokani goneyalewa savasava’ qo era na “kau mai e na marau kei na reki.” Era nuitaka na bula tawamudu e vuravura na so tale na sipi, ia era marau vata kei na vuvale vakayalo i Jiova ena gauna e caka kina na vakamau ni Lami mai Lomalagi. E veidonui vinaka qori kei na ka e tukuni ena Vakatakila, oya nira “tucake tu ena mata ni idabedabe vakaturaga kei na mata ni Lami” o ira na ilawalawa “isoqosoqo levu.” Era qaravi Jiova tiko ena loma ni bai ni valenisoro vakayalo e vuravura.​—Vkta. 7:​9, 15.

“O IRA NA LUVEMU ERA NA TUBU MEI SOSOMI KEI IRA NA TAMAMU”

17, 18. E vakavatukana vakacava na vakamau ni Lami, o cei era na okati Karisito me tamadra ena Duanaudolu ni Yabaki ni Veiliutaki?

¹⁷ Wilika Same 45:16. Dua tale na ka era na marautaka ‘na itokani goneyalewa savasava’ ni yalewavou, qori nodra raica na kena sa vakavatukana na vakamau ena vuravura vou. Na Taganevou se o koya na Tui, ena vakaturi ira na ‘tamana’ e vuravura, ira qo era na yaco mera ‘luvena’ e vuravura. (Joni 5:​25-29; Iper. 11:35) O Jisu ena lesia eso vei ira qori mera “turaga e vuravura taucoko.” Eda vakabauta tale ga ni na rairai lesia o Karisito eso na qase ni ivavakoso era yalodina tiko nikua mera veiliutaki ena vuravura vou.​—Aisea 32:1.

¹⁸ Ena loma ni Duanaudolu na Yabaki ni nona veiliutaki na Tui, ena yaco tale ga o Karisito me Tamadra na so tale. Ena sala cava? Ni o ira kece era cakacakataka nodra vakabauta na isoro ni veivoli i Karisito ena gauna qori, era na bula tawamudu e vuravura. (Joni 3:16) Koya gona, sa na yaco o Karisito me “Tama ni Gauna tawa mudu.”​—Aisea 9:​6, 7.

UQETI MERA ‘VAKATAKILA NA YACANA’

19, 20. E tarai keda kece vakacava na lotu vaKarisito dina nikua na veika vakasakiti e tukuni ena Same 45?

¹⁹ Wilika Same 45:​1, 17. E yaga vei keda kece na lotu vaKarisito na veika e volatukutukutaki ena Same 45. Era vakanamata na ivovo ni lumuti era se tiko e vuravura mera tomani ira na tacidra e lomalagi kei na Taganevou ena qai watidra. Era vinakata sara ga na so tale na sipi mera talairawarawa tiko ga vua na nodra Tui lagilagi, era marautaka tale ga nira se rawa ni cakacaka vata kei ira na ivovo ni ilawalawa ni yalewavou era se bula tiko e vuravura. Ni oti na nodrau vakamau o Karisito kei ira na lai veiliutaki kei koya ena Matanitu ni Kalou, erau na vakarautaka na veivakalougatataki e sega ni tukuni rawa vei ira na lewe i vuravura.​—Vkta. 7:17; 21:​1-4.

²⁰ Nida vakanamata tiko ena kena vakayacori na ka “vinaka” me baleti koya na Tui vakaMesaia, vakacava e sega ni uqeti keda qori meda ‘vakatakila na yacana’? Meda dua mada ga vei ira era ‘vakalagilagia na Tui me tawamudu.’