Nomu Vosa Me ‘Io Qai Sega’ Tale?
Raica mada na ituvaki qo: E tuvanaka e dua na qase ni ivavakoso me rau na cakacaka vata kei na dua na cauravou papitaiso ena cakacaka vakavunau ena mataka ni Sigatabu. E lewena tale ga na qase ni ivavakoso qo na Komiti Veitaratara kei na Valenibula. Ia ena mataka ni siga ya e qiriti koya mai e dua na tacida tagane e laucoqa na watina, e sa cicivaki tale ga i valenibula. A kerea ke rawa ni vukei koya me vaqarai totolo e dua na vuniwai e tokona na noda rai me baleta na dra. Mani vakadaroya na qase ni ivavakoso na nona ituvatuva ni cakacaka vakavunau kei na cauravou ya, me rawa ni lai tokona kina vakayalololoma na vuvale e sotava na leqa tubukoso qo.
Vakasamataka tale mada e dua na ituvaki qo: A sureti e dua na tina e itubutubu le dua kei rau na luvena me ratou gade ena dua na yakavi vei dua na veiwatini eratou ivavakoso vata. Erau marautaka dina na gone ni tukuni vei rau na veisureti ya, rau nanamaki sara kina. Ia ni vo e dua na siga, rau tukuna na veiwatini vei tinadrau na gone ni basika vakasauri e dua na ituvaki ena vinakati kina me rau na vakadaroya na nodrau veisureti. A qai kila e muri o tinadrau na gone na vuna rau vakadarodaro kina. Ni oti ga nodrau veisureti na veiwatini vei ratou na veitinani, era mani sureti rau eso na nodrau itokani me rau gade yani ena bogi vata ga ya ena nodra vale, rau mani ciqoma na nodra veisureti.
Nida lotu vaKarisito, e dodonu ga meda dina ena ka eda yalataka. E sega ni dodonu meda ‘vakaio,’ oti meda ‘vakasega’ tale. (2 Kor. 1:18) Ia me vaka e laurai ena rua na ivakaraitaki ya, e sega ni tautauvata na ituvaki kece. Ena so na gauna, eda na rairai sega ni cakava rawa e dua na ka, sa na vinakati ga meda vakadaroya eso na ka eda sa tuvanaka tu. A sotava na ituvaki va qo na yapositolo o Paula.
BEITAKI O PAULA NI SEGA NI NUITAKI
Ena 55 S.K., a tiko mai Efeso o Paula donumaka na ikatolu ni nona ilakolako vakaulotu. A nona inaki me takosova na wasawasa na Aegean me lako i Korinica, oti me qai gole sara i Masitonia. Ni lesu tiko mai Jerusalemi, a tuvanaka sara me lai sikova tale na ivavakoso o Korinica, me lai kumuna na veika era via solia vakayalololoma vei ira na mataveitacini e Jerusalemi. (1 Kor. 16:3) Eda kila qo mai na ka e tukuna ena 2 Korinica 1:15, 16: “Ena noqu nuidei qo, au a nakita kina meu lako tale yani vei kemuni moni vakamarautaki tale. Au na lai cegu vakalailai vei kemuni ena noqu ilakolako i Masitonia, mai kea, au na lesu tale yani vei kemuni, oti moni qai tomani au vakalekaleka ena noqu ilakolako i Jutia.”
A rairai vola e liu o Paula ena dua na nona ivola vei ira na tacina mai Korinica na veika me baleta na nona ituvatuva. (1 Kor. 5:9) Oti ga vakalailai nona vola na ivola ya o Paula, a rogoca vei ratou na nona vuvale o Kiloi ni basika na duidui ena loma ni ivavakoso. (1 Kor. 1:10, 11) Mani veisautaka na nona ituvatuva qai vola e dua na ivola eda sa kila nikua me 1 Korinica. E veivakasalataki vakayalololoma o Paula, e veivakadodonutaki tale ga ena nona ivola qori. A vakamacalataka tale ga ni sa veisautaka na nona ilakolako, me liu mada i Masitonia qai muri i Korinica.—1 Kor. 16:5, 6.a
Nira ciqoma na mataveitacini mai Korinica na ivola i Paula, era beitaki koya eso na “yapositolo viavia uasivi” ena ivavakoso ya ni sega ni nuitaki, e sega ni vakayacora ena ka e yalataka. E sabaya qori ena nona taroga: “Au taura vakamamada beka na ka au a sa nakita? So beka na ka au dau nakita meu cakava ena vuku ni noqu gagadre ga vakatamata, meu kaya ‘Io, Io’ oti ga au kaya tale ‘Sega, Sega?’”—2 Kor. 1:17, 11:5.
Eda na rairai taroga: Vakacava a “taura vakamamada” o Paula na ituvaki ya? Sega! Na vosa e vakadewataki me ‘mamada’ e tiko kina na vakasama ni sega ni daudina, vaka ga e dua e sega ni nuitaki rawa, sega ni dina ena ka e yalataka. Nona taroga o Paula, “So beka na ka au dau nakita meu cakava ena vuku ni noqu gagadre ga vakatamata?” e dodonu me matata vei ira na lotu vaKarisito mai Korinica ni nona veisautaka o Paula na nona ituvatuva e sega ni baleta ni sega ni nuitaki.
E vakacala o Paula na veibeitaki ya ni vola: “Ni daudina na Kalou, keitou na sega gona ni vakaio, oti me keitou vakasega tale.” (2 Kor. 1:18) A kauaitaka dina o Paula na ka e bibi vei ira na tacina vakayalo e Korinica ena gauna a veisautaka kina na nona ituvatuva. Eda wilika ena 2 Korinica 1:23, ni veisautaka na nona ituvatuva me lako i Korinica ni ‘sega ni vinakata mera rarawa vakalevu.’ Io, e solia na gauna vei ira mera vakadodonutaka na ka kece ni bera ni lai sikovi ira yani. Me vaka ga a namaka o Paula ni tiko mai Masitonia, e rogoca vei Taito ni tarai ira dina na nona ivola, era luluvu kina ra qai veivutuni. Qo e vakamarautaki Paula dina.—2 Kor. 6:11; 7:5-7.
KAYA NA “EMENI” VUA NA KALOU
Ni beitaki o Paula ni sega ni daudina, ena rairai basika kina na vakasama ni na sega ni nuitaki ni na cakava na ka e yalataka e veisiga, ena sega tale ga ni nuitaki na nona cakacaka vakavunau. Ia e vakadreta vei ira e Korinica o Paula ni a vunautaki Jisu Karisito vei ira. “E Io ga na Io vua na Luve ni Kalou, o Karisito Jisu. E sega ni Io, me qai Sega tale, o koya keitou vunautaka vei kemuni, o yau, o Silivenusi, kei Timoci.” (2 Kor. 1:19) Vakacava a sega ni nuitaki o Jisu Karisito, o koya e vakatotomuria o Paula? Sega! Ena nona bula kei na nona cakacaka vakaitalatala, a tukuna tiko ga na ka dina o Jisu. (Joni 14:6; 18:37) Ke dina qai nuitaki na ka e vunautaka o Jisu, qai vunautaka tale ga na itukutuku qori o Paula, kena ibalebale e nuitaki tale ga na ka e vunautaka na yapositolo.
Eda kila ni o Jiova e “Kalou daudina.” (Same 31:5) Eda kila qo mai na ka e vola tarava o Paula: “Se mani levu vakacava na ka e yalataka na Kalou, era Io kece ga ena vuku i luvena,” o Karisito. E sega ni vakamelei rawa o Jisu ena nona yalodina e vuravura, e sega ni vakatitiqataki kina e dua na ka me baleta na yalayala i Jiova. E tomana o Paula: “O koya gona, ena vukuna [Jisu] tale ga eda tukuna kina vua na Kalou ‘Emeni’ me vakalagilagi kina.” (2 Kor. 1:20) O Jisu sara ga na ivakadei, se na “Emeni,” oya ni nona yalayala kece na Kalou o Jiova ena yaco dina!
Me vaka ga nodrau dau tukuna o Jiova kei Jisu na ka dina, o Paula tale ga e dau tukuna na ka dina. (2 Kor. 1:19) E nuitaki o koya, e sega ni yalayala ena “gagadre ga vakatamata.” (2 Kor. 1:17) E lako ga ena “yalo tabu.” (Kala. 5:16) Ni veimaliwai kei ira eso tale, e kauaitaka dina na ka e bibi vei ira. E daudina ena nona vakaio!
E DAU IO NODA IO?
Sa matau vei ira e levu era sega ni bulataka na ivakavuvuli vakaivolatabu nikua, mera yalayala ra qai voroka tale ni basika eso na leqa lalai se ni basika e dua tale na ka era taleitaka vakalevu. Ena veika vakabisinisi, e sega ni dei na nodra “vakaio” dina ga ni sa biu tu vakaivola. E levu era sa sega ni raica na nodrau veidinadinati e rua ena vakawati me dua na veidinadinati me maroroi ena nodra bula taucoko. Ia na levu ni veisere e caka, e vakaraitaka nira raica e levu ni vakawati e vaka ga e dua na isema e rawarawa na kena tagutuvi.—2 Tim. 3:1, 2.
Vakacava o iko? E dau Io na nomu Io? Me vaka e laurai ena itekitekivu ni ulutaga qo, o na rairai vakadaroya e dua na nomu ituvatuva, sega ni kena ibalebale qori ni o sega ni nuitaki, ena vuku ga ni so na ituvaki e sega ni o lewa rawa. Ia ni o dua na lotu vaKarisito o qai yalataka e dua na ka, saga sara ena nomu igu kece mo cakava na ka kece o rawata mo cakava kina na ka o yalataka. (Same 15:4; Maciu 5:37) Ke o cakava qori, o na kilai mo tamata nuitaki, o daudina ena nomu vosa, o dau tukuna e veigauna na ka dina. (Efeso 4:15, 25; Jeme. 5:12) Nira kila eso ni rawa ni o nuitaki ena veika e vauca na bula ni veisiga, ena rawa tale ga nira tu vakarau mera vakarorogo ni o lai tukuna yani na ka dina me baleta na Matanitu ni Kalou. Koya gona, meda vakadeitaka mada ga me Io na noda Io!
a Ni oti nona vola o Paula na 1 Korinica, a qai lako dina i Tiroa me dewa sara yani i Masitonia, na vanua e lai vola kina na 2 Korinica. (2 Kor. 2:12; 7:5) Ena dua na gauna e muri, a qai sikovi ira dina mai Korinica.