Digia na Ka ni Veivakamarautaki e Yaga

“Vakadeitaka tiko ga na ka e vakadonuya na Turaga.”—EFESO 5:10.

1, 2. (a) E vakaraitaka vakacava na Vosa ni Kalou ni vinakata o Jiova meda marautaka na bula? (b) Ke da raica me ‘isolisoli ni Kalou’ na gauna galala meda marau kina, na cava ena uqeti keda meda cakava?

EDA wilika ena iVolatabu ni sega wale ga ni vinakata o Jiova meda bula e vuravura, e vinakata tale ga meda marau. Kena ivakaraitaki, e tukuni ena Same 104:14, 15 ni vakatubura o Jiova na “kakana mai na qele; kei na waini, sa vakamarautaka na loma ni tamata, kei na waiwai sa lumilumisa kina na matana, kei na kakana sa kaukauwa kina na loma ni tamata.” Io, e vakatubura o Jiova na itei me rawa kina na kakana, waiwai, kei na waini meda vakayagataka. Na waini e ‘vakamarautaka na loma ni tamata,’ dina ni sega ni bibi sara ena noda bula. (Dauv. 9:7; 10:19) Io, e vinakata o Jiova meda “marau.”—Caka. 14:16, 17.

² E sega ni dua na kena leqa ke da nanuma me tiko na gauna meda ‘raici ira kina na manumanuvuka’ kei na “lili ni veikau” se da cakava eso tale na ka ena vakabulabulataki keda qai vakamarautaki keda. (Maciu 6:26, 28; Same 8:3, 4) E nona ‘isolisoli na Kalou’ meda marautaka na bula. (Dauv. 3:12, 13) Ke da raica me isolisoli ni Kalou na gauna galala meda marau kina, ena uqeti keda qori meda vakayagataka ena sala me marau kina o Jiova.

Kena Veimataqali kei na Kena iYalayala

3. Na cava e duidui kina na nodra digidigi eso ena ka ni veivakamarautaki?

³ O ira e donu na nodra rai me baleta na ka ni veivakamarautaki, era kila ni levu na ka ni veivakamarautaki era na digidigi kina, ia era kila tale ga ni bibi me tiko na kena iyalayala. Na vuna? Me kilai qori, meda vakatauvatana mada na ka ni veivakamarautaki ina kakana. E duidui na kakana era taleitaka e levu ena veiyasai vuravura. Ena dua mada ga na vanua ena duidui na kakana era na taleitaka na lewenivanua e kea. E vaka tale ga qori na nodra raica na lotu vaKarisito e veiyasai vuravura na ka ni veivakamarautaki, ni na sega ni tautauvata na ka ni veivakamarautaki era taleitaka. Ena duidui na nodra rai na lotu vaKarisito era vakaitikotiko ena dua na vanua, eso era na taleitaka na wilivola, eso tale era nanuma ni vakavucesa. Eso era marautaka mera dau gade, ia eso tale era nanuma ni veivakaocai. Me vaka ga na noda rawa ni digia na kakana eda taleitaka, eda rawa tale ga ni cakava qori ena ka ni veivakamarautaki.—Roma 14:2-4.

4. Na cava me vakaiyalayala kina na ka ni veivakamarautaki eda digia? Vakatauvatana.

⁴ E tu vei keda na galala meda digia na ka ni veivakamarautaki eda taleitaka, ia eda na sega ni vakayagataka vakatawadodonu na galala qori. Meda raica tale mada na ivakaraitaki ni kakana. De dua eda na rawa ni kania na veimataqali kakana, ia eda na sega ga ni via kania na kakana e sa ca. E ka vakalialia dina ke da kania na kakana qori, ni na vakaleqa na noda bula. E tautauvata tale ga qori kei na levu ni ka ni veivakamarautaki yaga eda rawa ni digidigi kina. Eda na sega gona ni digia na ka ni veivakamarautaki e ririkotaki kina na bula, e voravora, se ca. Ke da digia na ka ni veivakamarautaki va qori, sa na sega ni salavata kei na ivakavuvuli vakaivolatabu, ena vakaleqa na noda bula vakayago se na noda bula vakayalo. Me vakaiyalayala gona na ka ni veivakamarautaki eda digia. E bibi meda vakasamataka vakavinaka na ka meda cakava da qai digia na kena ena yaga qai vakamarautaki Jiova. (Efeso 5:10) Eda na cakava vakacava qori?

5. Eda na kila vakacava ke salavata tiko kei na ivakatagedegede vakaivolatabu na ka ni veivakamarautaki eda digia?

⁵ E bibi me salavata kei na ivakatagedegede vakaivolatabu na ka ni veivakamarautaki eda digia, qori ena vakamarautaki keda, ena marau tale ga kina o Jiova. (Same 86:11) Me rawa nida kila se va qori na ka ni veivakamarautaki eda taleitaka, e vinaka me dua na noda lisi. Na lisi qori e tarogi kina e tolu na taro, na cava e okati kina, vakacava na levu ni gauna, o cei e noda ilala. Meda dikevi ira yadua mada.

Na Cava e Okati Kina?

6. Na ka ni veivakamarautaki cava meda cata, na cava na vuna?

⁶ Ni bera nida digia e dua na ka ni veivakamarautaki, na imatai ni taro meda taroga: ‘Na cava e okati kina?’ Nida qara tiko na isaunitaro qori, e bibi meda nanuma ni rua tiko na iwasewase ni ka ni veivakamarautaki. Na imatai ni iwasewase eda na cata, na kena ikarua eda na rairai taleitaka. Na cava e okati ena imatai ni iwasewase? E levu na ka ni veivakamarautaki ena vuravura ca qo e laurai kina na itovo e beci kina na ivakavuvuli vakaivolatabu se lawa ni Kalou. (1 Joni 5:19) O ira na lotu vaKarisito dina era na sega tu ga ni digia na ka ni veivakamarautaki va qori. E okati kina na ivalavala voravora, vakatevoro, veimoceri vakamataqali vata, iyaloyalo ca, se ivalavala kaukaua se na kena e tokona na ka vakasisila. (1 Kor. 6:9, 10; wilika Vakatakila 21:8.) Se mani vanua cava eda tu kina, na noda sega ni via galeleta na ka ni veivakamarautaki va qori eda sa vakaraitaka tiko kina vei Jiova nida ‘cata na ka ca.’—Roma 12:9; 1 Joni 1:5, 6.

7, 8. Na cava meda cakava meda digia vinaka kina na ka ni veivakamarautaki? Vakatauvatana.

⁷ Na ikarua ni wasewase ni ka ni veivakamarautaki e sega sara ni laurai kina na ivalavala e beci kina na Vosa ni Kalou. Ena ituvaki qori, ni bera nida digia na ka ni veivakamarautaki, e bibi meda vakatauvatana qori kei na rai i Jiova me baleta na kena e veiganiti, me vaka e laurai ena ivakavuvuli vakaivolatabu. (Vkai. 4:10, 11) Oti sa na qai vinakati meda vakatulewa vinaka me vinaka tiko ga kina na noda lewaeloma. (Kala. 6:5; 1 Tim. 1:19) Eda na cakava vakacava qori? Vakasamataka mada qo: Ni bera nida vakayagataka e dua na kakana eda se qai kania vakadua, eda na via kila e liu na kena isaluwaki. E tautauvata tale ga qori ni bera nida digia e dua na ka ni veivakamarautaki. E bibi meda kila na cava soti e dau caka kina.—Efeso 5:17.

⁸ Kena ivakaraitaki, o na rairai taleitaka na qito. E sega ni dua na kena ca qori ni dau marautaki qai taleitaki. Vakacava ke o taleitaka e dua na qito baleta ni kaukaua kina na yalo ni veisisivi, e ririkotaki kina na bula, e levu kina na mavoa, e caka kina na marau vakalialia, kaukaua kina na boletaki vanua, se dua na ka va qori? Ni o vakasamataka vinaka na ka e dau caka ena ka ni veivakamarautaki, o na kila kina ni mataqali qito va qori e sega ni salavata kei na ivakarau ni rai i Jiova se na itukutuku ni veisaututaki kei na veilomani eda dau vunautaka. (Aisea 61:1; Kala. 5:19-21) Ena yasana adua, ke o digia na ka ni veivakamarautaki e sega ni beci kina na lawa i Jiova, ena yaga qai vakabulabulataki keda.—Kala. 5:22, 23; wilika Filipai 4:8.

Vakacava na Levu ni Gauna mo Vakayagataka Kina?

9. Na cava ena kilai ni o sauma na taro ‘Vakacava na levu ni gauna au na vakayagataka?’

⁹ Na ikarua ni taro mo taroga: ‘Vakacava na levu ni gauna au na vakayagataka? Gauna cava meu vakayagataka kina?’ Eda sa veivosakitaka mai na imatai ni taro: Na cava e okati kina? Na nomu sauma na taro qori ena kilai kina na ka eda dau taleitaka kei na kena e sega. Ia na noda sauma na ikarua ni taro qo, ena kilai kina na ka eda vakaliuca—na ka e bibi kei na kena e sega. Koya gona, o na kila vakacava ke veiganiti tiko na levu ni gauna o vakayagataka ena ka ni veivakamarautaki o digia?

10, 11. E vukei keda vakacava na vosa i Jisu ena Maciu 6:33 meda vakatulewataka na levu ni gauna eda vakayagataka ena ka ni veivakamarautaki?

¹⁰ A tukuna o Jisu Karisito vei ratou na nona imuri: “Mo lomani Jiova na nomu Kalou ena lomamu taucoko, ena nomu bula taucoko, ena nomu vakasama taucoko, kei na nomu kaukaua taucoko.” (Mari. 12:30) Io, ena liu duadua ena noda bula na noda lomani Jiova. Eda na cakava ga qori ena noda muria na ivakasala i Jisu: “Moni vakaliuca tiko ga na matanitu ni Kalou kei na nona yalododonu, ena qai soli vei kemuni na ka kece qo.” (Maciu 6:33) Ena vukei keda vakacava na vosa i Jisu meda kila kina se bibi vakacava na ka ni veivakamarautaki ena noda bula kei na levu ni gauna meda vakayagataka kina?

¹¹ Dikeva mada qo: A vakasalataki keda o Jisu meda “vakaliuca tiko ga na matanitu ni Kalou.” A sega ni tukuna meda ‘vakasaqara duadua ga na matanitu ni Kalou.’ Macala ga ni kila o Jisu ni levu tale na ka eda na vakasaqara ena noda bula. Eda na vinakata na vale, kakana, isulu, vuli, cakacaka, na ka ni veivakamarautaki, kei na so tale. Ia ke da vakasaqara tiko na ka kece qori, e dua ga ena bibi vei keda—na ka e vauca na matanitu ni Kalou. (1 Kor. 7:29-31) Ni matata vei keda qori, eda na rawa ni cakava kina eso tale na ka, me vaka na ka ni veivakamarautaki, ia eda na cakava qori ena sala me vakaliuci tiko ga kina na ka e bibi duadua, qori na ka e vauca na matanitu ni Kalou. Ke da cakava qori, ena yaga na ka ni veivakamarautaki e caka vakarauta.

12. E yaga vakacava na ivakavuvuli ena Luke 14:28 ena ka e vauca na ka ni veivakamarautaki?

¹² Koya gona, ni bera nida digia e dua na ka ni veivakamarautaki, meda cakacakataka rawa na levu ni ka e caka kina. (Luke 14:28) E bibi meda vakasamataka na levu ni gauna e kania na ka ni veivakamarautaki. Oti meda qai vakatulewataka na levu ni gauna meda vakayagataka kina. Ena tawayaga na ka ni veivakamarautaki, ke da sega ni lai kauaitaka kina na ka e bibi sara me vaka na vuli vakataki keda, sokalou vakavuvale, tiko ena soqoni, se cakacaka vakavunau. (Mari. 8:36) Ia ke vakabulabulataki keda na ka ni veivakamarautaki e caka vakarauta meda vakaliuca tiko ga kina na matanitu ni Kalou, de dua ena yaga vakalevu qori.

O Cei o Ira Noqu iLala?

13. Na cava meda vakasamataka kina vakavinaka na noda ilala nida digia na ka ni veivakamarautaki?

¹³ Na ikatolu ni taro mo taroga, ‘O cei era noqu ilala ena noqu gauna galala?’ E bibi meda vakasamataka o ira eda vakailala vata ena noda gauna galala. Na vuna? Baleta o ira na noda ilala, era na vakamuai keda vakalevu ena ka ni veivakamarautaki meda taleitaka. E dau marautaki na kana ke da kana vata kei ira na noda itokani vinaka, e va tale ga qori na ka ni veivakamarautaki. Ena marautaki vakalevu ke ra tiko na noda itokani vinaka. Macala ga ni levu vei keda, vakabibi o ira na itabagone era dau marautaka na ka ni veivakamarautaki kei ira tale eso. Me rawa ni yaga na ka ni veivakamarautaki eda digia, e vinaka meda vakasamataka rawa o cei e veiganiti meda marautaka vata, o cei tale ga meda yawaka.—2 Vei. 19:2; wilika Vosa Vakaibalebale 13:20; Jeme. 4:4.

14, 15. (a) Na ivakaraitaki cava e kotora o Jisu ena nona digia vinaka na nona itokani? (b) Na taro cava meda taroga me baleta na noda itokani?

¹⁴ Ena yaga vakalevu nida muria na ivakaraitaki i Jisu ena nona dau digia na nona itokani. Me tekivu mai na buli ni vuravura, e se lomana tiko ga na kawatamata o Jisu. (Vkai. 8:31) Ni se bula voli e vuravura, e dau kauaitaki ira kece vakayalololoma na lewenivanua. (Maciu 15:29-37) Ia e kila o Jisu na duidui ni veikilai kei na veitokani. E dau kauaitaka na tamata kece ga, ia e veitokani voleka ga kei ira era muria na ka e vinakata. A tukuna vei ratou na 11 na nona yapositolo yalodina: “Dou noqu itokani ga kevaka dou cakava na ka au vakarota vei kemudou.” (Joni 15:14; raica tale ga Joni 13:27, 30.) O ira ga era muri koya ra qai qaravi Jiova era nona itokani.

¹⁵ Ni o vakasamataka tiko se o cei me nomu itokani voleka, e bibi meda nanuma tiko na vosa i Jisu. Taroga mada qo: ‘Vakacava e laurai ena ka e tukuna kei na ka e cakava ni muria na ivakaro i Jiova kei Jisu? E tautauvata na neirau rai me baleta na iVolatabu kei na kena ivakatagedegede? Vakacava keu vakailala kei koya, ena uqeti au meu vakaliuca na Matanitu ni Kalou, meu yalodina tale ga vei Jiova?’ Ke o vakadeitaka ni nomu isaunitaro na io, o sa digia qori e dua na nomu itokani vinaka mo drau marautaka vata na nomu gauna galala.—Wilika Same 119:63; 2 Kor. 6:14; 2 Tim. 2:22.

E Veiganiti na Ka ni Veivakamarautaki au Digia?

16. Na cava meda taroga me baleta na ka ni veivakamarautaki?

¹⁶ Eda veivosakitaka mai e tolu na tuvaki e umani ena ka ni veivakamarautaki—na ka e okati kina, na gauna e vakayagataki kina, kei ira na noda ilala. Me yaga na ka ni veivakamarautaki, e bibi me salavata kei na ivakatagedegede vakaivolatabu na tolu na ituvaki qori. Koya gona, ni bera nida digia e dua na ka ni veivakamarautaki, e bibi meda vakasamataka vakavinaka. E vinaka meda taroga na ka e okati kina: ‘Na cava sara mada e dau caka kina? E veiuqeti se sega?’ (Vkai. 4:20-27) Meda taroga tale ga: ‘Vakacava na levu ni gauna au vakayagataka kina? E veirauti se sivia tale?’ (1 Tim. 4:8) Vakacava na noda ilala: ‘O cei au na vakailala vata kei ira ena noqu gauna galala? Era ilala vinaka se sega?’—Dauv. 9:18; 1 Kor. 15:33.

17, 18. (a) Eda na kila vakacava ni salavata kei na ivakatagedegede vakaivolatabu na ka ni veivakamarautaki eda digia? (b) Na cava mo cakava ni o digia na ka ni veivakamarautaki?

¹⁷ Ke dua na ka ni veivakamarautaki e beci kina na ivakatagedegede vakaivolatabu ena tolu na ituvaki eda sa veivosakitaka mai, e sega ni ka vakayalomatua meda digia. Ia ke da vakadeitaka ni ka ni veivakamarautaki eda digia e salavata kei na ivakatagedegede vakaivolatabu, ena lagiti ga kina o Jiova, ena yaga tale ga vei keda.—Same 119:33-35.

¹⁸ Koya gona, nida digia e dua na ka ni veivakamarautaki, meda cakava mada ga na ka e dodonu ena kena gauna veiganiti kei ira na ilala vinaka. Io, meda saga kece meda muria na ivakasala vakaivolatabu qo: “Se oni kana se gunu se cava ga oni cakava, moni cakava na ka kece me dokai kina na Kalou.”—1 Kor. 10:31.

O Rawa ni Vakamacalataka?

Me baleta na ka ni veivakamarautaki, o na muria vakacava na ivakavuvuli vakaivolatabu ena . . .

• Filipai 4:8?

• Maciu 6:33?

• Vosa Vakaibalebale 13:20?

[Diagram ena tabana e 9]

(Raica tale na ivola)

✔Na ka e okati kina

[Diagram ena tabana e 10]

(Raica tale na ivola)

✔Levu ni gauna

[Diagram ena tabana e 12]

(Raica tale na ivola)

✔Noda ilala

[iYaloyalo ena tabana e 10]

Eda na muria vakacava na ivakaraitaki Jisu nida digia na noda itokani kei na ka ni veivakamarautaki?