O Doka Beka na Veika Tabu?
1 Ke tarogi vei keda eda doka beka se sega na veika tabu, e sega ni vakabekataki nida na vakaio! Na cava e so na isolisoli tabu ni Kalou eda doka?
2 Eda vakamareqeta dina na noda rawa ni veiwekani kei koya na Tamada vakalomalagi! E vakadeitaka vei keda ke da ‘toro voleka yani vua, ena toro voleka mai vei keda o koya.’ (Jeme. 4:8) Ke sega na isoro ni veivoli i Jisu Karisito ena sega ni dua ena rawata na bula tawamudu. (Joni 3:16) E qaqa ni noda masu e veisiga na noda vakavinavinakataka mai vu ni lomada na isolisoli talei oqo ni Kalou.
3 Erau ka tabu tale ga vei keda na Vosa uqeti ni Kalou, na iVolatabu, kei na isoqosoqo i Jiova e vuravura. Eda na vakaraitaka nida doka na isolisoli e rua oqo i Jiova ena noda bulataka na ivakavuvuli ni iVolatabu, da vaqaqacotaka na ivau ni loloma vakaveitacini, da muria vakavinaka na ituvatuva e liutaki vakalou, kei na noda tokoni ira era liutaki keda.—1 Pita 1:22.
4 E binikasauru na kakana vakayalo e vakarautaka tiko mai na dauveiqaravi yalodina ka vuku. Ena baci vakadinati tale ena soqo ni tikina ni yabaki oqo na “Muria na Vosa ni Kalou.” Eda na vakavulici kina ena veika e bibi, eda na marautaka tale ga na veimaliwai vinaka ni na yaga vei keda. Eda na vakaraitaka vakacava na noda doka mai vu ni lomada na isolisoli tabu oqo?
5 Kakua ni Biuta na Vale i Jiova: A vakadreti ira era a cakacaka vakaukaua ena kena taravaki tale na bai kei Jerusalemi o Niemaia mera ‘kakua ni biuta na vale ni nodra Kalou.’ (Niem. 10:39) Na “vale” i Jiova ena gauna oqo, oya na ituvatuva ni nona sokaloutaki. E okati ena ituvatuva oqo na noda soqo ni tikina. Eda vakaraitaka vei Jiova nida taleitaka dina na nona isolisoli ke da kua ni biuta se vakawalena na ituvatuva oqo, eda na tiko kina da qai vakarorogo vinaka sara. (Iper. 10:24, 25) Na cava eda sa navuca rawa me ivakaraitaki ni noda doka dina na soqo tabu oqo?
6 Tiko Ena Siga Tolutolu: Meda navuca yadua meda tiko ena siga tolutolu ni soqo. O sa navuca tiko mo na yaco totolo yani ena veisiga yadua, mo na tiko kina me yacova sara na itinitini ni masu ena Sigatabu? Ke vaka kina, o na kalougata dina. E sega ni ka rawarawa na noda na tiko ena soqo. Ena vinakati beka na yalodoudou meda kerea rawa kina me veisautaki na noda gauna ni cakacaka. Ena dredre beka na noda ilakolako ina soqo. Ia, kua ni laiva na veika oqo me vakataotaka na nomu na tiko kina.
7 Vakasamataka Mada na iVakaraitaki Totoka Oqo: Ena nodra ilakolako ina dua na soqo ni tikina ena yabaki sa oti, era sotava sara e so na sotia e dua na ilawalawa mataveitacini ena dua na vanua mai Aferika e caka tiko kina na ivalu. Era taroga na sotia: “O kemuni beka mai vei, oni lako tiko e vei?” Era sauma na tacida: “Keimami iVakadinadina i Jiova, keimami gole tiko ina soqo ni tikina.” Mani kaya e dua vei ira na sotia: “Ni kakua ni rerevaka e dua na ka na iVakadinadina i Jiova. Ni lako, ni lai vakayaco soqo, ena sega na leqa. Ia ni qaqarauni, oni na sotavi ira e levu na sotia. Ni muri tiko ga ena lomadonu ni gaunisala! Ke oni sotavi ira e levu nira kumukumuni tu, ni muri tiko ga ena lomadonu ni gaunisala!” Era muria oya na tacida, era yaco bula ina soqo. Era a kalougata na tacida oya nira vakaraitaka na nodra doka na veika tabu.
8 E levu tale ga na ka ni bolebole eda sotava me vakataki ira ga na tacida e Aferika. Ia, e sega ni vakabekataki ni rawa nida vakadamurimuria na nodra vakabauta, da vakadeitaka i lomada meda na tiko ena porokaramu kece ni noda soqo ni tikina. Ke gadrevi me veisau e so na noda ituvatuva, meda vakararavitaka vei Jiova nida kila ni na vakalougatataka na noda sasaga meda tiko ena porokaramu taucoko ni soqo.
9 O na Kalougata: Eda gadreva na Vosa ni Kalou, eda kila nida na tubu cake kina meda vakabulai. (1 Pita 2:2, VV) Noda tiko ena soqo ni tikina da qai vakarorogo vinaka ena porokaramu, ena vukei keda yadua meda vaqaqacotaka na noda vakabauta na Vosa, meda tusaqata rawa kina na sasaga kece i Setani. Nida vakayacora oqo, eda vakaraitaka vei Jiova kei ira kece tale ga era tu wavoliti keda nida doka dina na veika tabu, eda “sega ni vakataki ira sa suka tale . . . eda sa vakataki ira ga era sa vakabauta tiko me bula na yalo.”—Iper. 10:39; 12:16; Vkai. 27:11.
10 Eda rawa ni namaka ni na dolava na Kalou o Jiova na katuba ni lomalagi me qai sovaraka mai vakayauyau vei keda na veivakalougatataki vakayalo. (Mala. 3:10) O koya gona, mo tuvanaka mada ga mo kua ni calata na soqo ni tikina na “Muria na Vosa ni Kalou” mai na itekitekivu ni porokaramu ena mataka ni Vakaraubuka me yacova ni sa lai vakaemenitaki na itinitini ni masu ena yakavi ni Sigatabu. O na sega vakadua ni veivutunitaka na nomu na tiko kina!