Na Loloma e Uqeti Keda Meda Vunau
1 Nida iVakadinadina i Jiova, eda kilai tani nida dauvunau gugumatua ni itukutuku ni Matanitu ni Kalou. (Maciu 24:14) Sa sivia na ononamilioni na dautukutuku era ogaoga tiko na vunau ena vuravura taucoko; ra na qai wili kina na ka vou nira mai veitomani. E tauri rawa na kedra iwiliwili ni laurai na kedra levu na vakaitavi tiko ena cakacaka oqo.
2 E bau ka toka ni bolebole na noda uqeti meda cakava na itavi oqo, se vakaevei? Eda sega ni vakasaurarataki kina, marici ena iyau, se soli vei keda e dua na itutu dokai. Nida se qai tekivu dautukutuku, e levu vei keda e rere nida nanuma nida lecaika, qai vakavuqa nira sega ni dau veiciqomi na itaukeinivale. (Maciu 24:9) E levu na lewenivanua era sega ni kila se cava sara mada e uqeti keda. E sega ni vakabekataki ni tiko na vuna vinaka eda vosota tiko kina.
3 Na Kaukaua ni Loloma: E vakaraitaka o Jisu na ivakaro levu duadua ena nona kaya meda ‘lomani Jiova na noda Kalou ena lomada taucoko, yaloda, nanuma, kei na noda kaukaua kece.’ (Mari. 12:30) Na noda lomani Jiova e yavutaki vakatitobu tu ena noda vakavinavinakataka se o cei o koya qai Kalou vakacava—e Turaga Sau, Dauveibuli e bulia na ka kece ga, o koya ‘me cabo vua na veivakalagilagi, na vakarokoroko, kei na kaukaua.’ (Vkta. 4:11, VV) E sega ni vakatauvatani rawa na nona itovo uasivi.—Lako 34:6, 7.
4 Na noda kilai Jiova da qai lomani koya e uqeti keda meda vakacila yani na noda rarama e matadra na tamata. (Maciu 5:16, VV) E cila na noda rarama nida vakacaucautaki koya e matanalevu, da veivosakitaka na nona cakacaka veivakurabuitaki, da qai kacivaka na itukutuku ni nona Matanitu. Me vaka ga na agilosi e vuka voli ena maliwa ni lomalagi kei vuravura, e tu vei keda “nai tukutuku-vinaka e sega ni oti rawa, me[da] vunautaka vei ira . . . na veimatanitu, kei na veimataqali, kei na duivosavosa, kei ira na tamata.” (Vkta. 14:6) Na noda loloma gona e cuqena tiko na cakacaka vakavunau e vuravura raraba.
5 O ira na tamata ni vuravura era raica na noda vunau me “ka lialia” qai vakaoti gauna. (1 Kor. 1:18) Era saga ena veivanua kece ga mera tarova na noda cakacaka. Na loloma mai vu ni lomada e uqeti keda meda kacivaka me vakataki iratou na yapositolo: ‘Ni sa dredre vei keimami me keimami kua ni tukuna na veika keimami a raica ka rogoca. . . . Sa kilikili kei keimami me keimami talairawarawa vua na Kalou, me kakua ga vei ira na tamata.’ (Caka. 4:20; 5:29) E tete tiko ga na cakacaka vakavunau e vuravura raraba dina ga nida tusaqati.
6 Na noda lomani Jiova e vaka na bukawaqa e lomada e uqeti keda tiko meda tukuna raraba na veicakacaka uasivi ni Kalou. (Jere. 20:9; 1 Pita 2:9, VV) Eda na tomana tiko ga na noda “vakatakila vei ira na lewe ni veivanua na nona cakacaka . . . ni sa cakava na ka sa uasivi sara”!—Aisea 12:4, 5.