Soqo ni Tikina​—Gauna ni Marau!

¹ Na soqo ni tikina ni iVakadinadina i Jiova e gauna dina ni marau. Sa sivia oqo e duanadrau na yabaki na kena veivuke vakalevu na soqo vaka oqo ina tubu e yaco tiko ena noda isoqosoqo. Mai na itekitekivu lailai, eda sa raica tu oqo na veivakalougatataki vakaitamera i Jiova ena noda cakacaka e vuravura raraba. Na imatai ni noda soqo ni tikina ena noda gauna oqo a caka mai Chicago, Mereke, ena 1893, era a tiko kina e le 360 qai 70 era a papitaiso kina mera vakaraitaka na nodra yalataki ira vei Jiova. Ena soqo ni tikina na “Muria na Vosa ni Kalou” a vakayacori ena yabaki sa oti, na iwiliwili kece era a tiko kina e vuravura raraba era le 9,454,055, ra papitaiso kina e le 129,367. Sa rauta bagi meda marau!

² Me tekivu mai na gauna vakaivolatabu, na nodra soqoni vata na tamata ni Kalou e kilai tani ni dau vakavulici ira kina o Jiova. Ena gauna i Esera kei Niemaia, era dau vakarorogo na tamata ni wiliki vei ira na Lawa “mai na mataka ka yacova na siga levu.” (Niem. 8:2, 3) Nira kila vinaka cake kina na Lawa ena soqo oya, era “marau vakalevu” kina na tamata. (Niem. 8:8, 12) O keda tale ga eda marau ni soqo ni tikina e gauna vinaka meda rogoca kina na ivakasala vinaka i Jiova qai ciqoma na kakana vakayalo e vakarautaka na “dauveiqaravi yalo dina ka vuku” ena “kena gauna dodonu.” (Maciu 24:45, VV) Ni kaya o Jisu ni tamata ena bula ena “vosa kecega sa lako mai na gusu ni Kalou,” e bibi gona kina ena noda bula vakayalo na soqo ni tikina.​—Maciu 4:4.

³ E Yaga na Noda Sasaga Meda Tiko Kina: Me noda isausau kece meda na tiko ena porokaramu taucoko ni soqo ni tikina ni yabaki oqo na “Qasenivuli ni Vosa ni Kalou.” Meda navuca meda na yaco totolo yani ena veisiga, da qai tiko ga kina me yacova noda “vakaemeni” vata ena iotioti ni masu. Me rawati oqo, ena rairai gadrevi meda veisautaka na noda ituvatuva. Ena rairai vakadredretaki na noda kerea na noda iliuliu ni cakacaka meda na cegu mada mai na cakacaka ena vica na siga me rawa nida na tiko ena soqo oqo. Ena gadrevi meda lalawataka vakailiu, kua nida qai vukibera ni sa voleka mai na kena gauna. Ke da gadreva na icili se basi, meda veivosakitaka rawa ena gauna oqo. Na sasaga cava ga eda na cakava ena yaga!

⁴ E dina nida na vakayagataka na noda ilavo meda na tiko ena soqo ni tikina, ia e lailai wale ni vakatauvatani kei na kalougata eda na rawata kina na tamata i Jiova. Raica mada na nodra ivakaraitaki e so era saga mera tiko ena soqo ni veimatanitu na Divine Will (iNaki Vakalou) ena 1958, ena siti o Niu Yoka, Mereke. E dua na tacida tagane e sogota na nona bisinisi ni tarataravaki me rua na macawa, ena nona bole me lai veivuke ena soqo ni tikina qai tiko tale ga kina. E dua na tacida tagane mai Virgin Island e volitaka e lima na eka nona qele me rawa ni ratou tiko onoono vakavuvale ena soqo. Dua na veiwatini gone erau volitaka na nodrau waqa me rawa ni rau kauti iratou tolutolu na luvedrau, vula rua ina yabaki vitu, ina soqo ni tikina. E tukuni vei iratou e le tolu na cauravou eratou veitacini vakayago mai Kalifonia ni ratou sa na sega ni cakacaka ke ratou na lako ina soqo ni tikina. E sega vakadua ni tarovi iratou na vosa oya, eratou tiko ga ena soqo guiguilecavi dredre oya.

⁵ Vakalougatataka o Jiova na Noda Sasaga: E raica qai vakalougatataka o Jiova na nodra sasaga na nona tamata. (Iper. 6:10) Me kena ivakaraitaki, ena soqo ni tikina na Theocracy’s Increase (Tubu Vakalou) ena 1950, era rogoca kina na lewenisoqo na ivunau guiguilecavi dredre na “New Systems of Things” (iTuvaki ni Veika Vou). E uqeta na nodra tataleitaki o Brother Frederick Franz ena nona taroga: “Oni na marau beka mo ni kila na tiko ena soqo ni veimatanitu oqo ni tiko ena keda maliwa ena bogi nikua e so na ravouvou ni vuravura vou?” Sa sivia oqo e 50 na yabaki, eda se marautaka tiko ga na kena vakamatatataki na Same 45:16, NW.

⁶ Ni ratou tiko ena soqo ni tikina ena yabaki sa oti e dua na vuvale, e vola ena vakavinavinaka na ulunivuvale: “Ra veitacini, oni sega ni kila na kena veivakabulai na soqo ni tikina oqo. Keitou toki vakavuvale ina siti me keitou vaqara cakacaka, keitou vakila ga kina ni keitou sega ni toso vinaka vakayalo. . . . Keitou sa vakawalena na neitou itavi vakarisito. Keitou sa sega ni dau tiko ena soqoni, sa sega sara ga na cakacaka vakavunau. . . . E vakabulabulataki keitou sara ga na soqo ni tikina oqo, sa tekivu tale me keitou tekia e so na isausau vakayalo, keitou tuvanaka tale ga me keitou na rawata.”

⁷ E vakarautaka tiko o Jiova na kakana vakayalo e vinakati meda bula kina. E vakarautaka na veimataqali kakana bulabula ena noda soqo. Na noda vakavinavinakataka na isolisoli oqo ena rawa kina vei keda meda tukuna na ka e tukuna o Konilio ena gauna e sikovi koya kina na yapositolo o Pita: “Keimami sa qai tiko kecega eke e na mata ni Kalou, me keimami rogoca na ka kecega sa vakarota vei iko na Kalou.” (Caka. 10:33) Me noda isausau mada ga meda na marautaka na noda ‘tiko ena mata ni Kalou’ ena porokaramu kece ni soqo ni tikina ena yabaki oqo na “Qasenivuli ni Vosa ni Kalou!”