Mera Vukei Vakacava na Watidra na Tacida Vakayalo Era Sega ni Tiko ena Dina?
1 E levu era sega ni qaravi Jiova e tiko ena dina na kedra isa, era taleitaki ira na iVakadinadina kei na ivavakoso, ia e dredre ga nodra toso mai mera qarava na Kalou. E kaya e dua na tagane e tiko ena dina na watina: “E dredre dina vei au na lako e veivale.” E so tale era se bulataka tiko ga na itovo e veisaqasaqa kei na iVolatabu, se ra nanuma ni sega vei ira na gauna mera vakaitavitaki ira kina ena cakacaka vakalou me vaka era cakava tiko na dui watidra. Ia, eda na vukei ira vakacava?
2 Dau Veikauaitaki: Na noda kauaitaki ira kei na veika era leqataka tu ena rawa ni uqeti ira mera vulica kina na ivakavuvuli dina vakaivolatabu. (Fpai. 2:4) O ira era a sega ni tu ena dina e liu, era dau tukuna wasoma na veikauaitaki vakayalololoma era dau vakaraitaka na mataveitacini vei ira. E kaya tale na tagane sa tukuni oti toka mai: “Sa dau kauaitaki au dina o José, e dua na qase ni ivavakoso. Na nona dau veiuqeti e vakavuna sara ga noqu taura vakabibi na vuli.” E nanuma lesu e dua tale na tagane ni gauna era sikovi koya yani kina na tacida tagane, era dau saga sara ga mera veitalanoataka na ka e taleitaka. E kaya: “E veisautaka sara ga na noqu rai me baleta na vakabauta i watiqu. Era yalomatua na nona itokani qai levu na ka era kila.”—1 Kor. 9:20-23.
3 Dau Veivukei: E rawa tale ga ni tarai ira na noda dau veivukei. (Vkai. 3:27; Kala. 6:10) Na gauna e ca kina na nona motoka e dua na tagane e sega ni tiko ena dina, e vukei koya e dua na tacida. “E tarai au sara ga na ka oya,” e kaya. Dua tale na tacida e veivuke ena tara ni nona bai ni vale e dua na tacida yalewa. Dua na siga taucoko rau cakacaka vata tiko kina kei na wati i koya na tacida yalewa oya e sega ni tiko ena dina. Rau mani veikilai vinaka sara ena loma ni gauna oqori. Oti tale e rua na macawa, e tukuna vua na tacida o koya na wati ganeda: “Sa kena gauna oqo meu sa veisau kina. Au kerea mo sa vakavulici au mada ena iVolatabu?” E toso vinaka na nona vuli, sa mai dua na tacida papitaiso edaidai.
4 O koya gona nida vakasaqarai ira voli na ganiti ira na noda itukutuku ena noda yavala, meda kua ni cegu ni vukei ira tale ga na watidra na tacida vakayalo era sega ni tiko ena dina.—1 Tim. 2:1-4.