Mo Dou Kakua ni “Rawai ena Veitemaki”

“Dou yadra tiko ka masu, mo dou kakua kina ni tacori e na vere [“rawai ena veitemaki,” NW].”​—MACIU 26:41, VV.

E TARAI Jisu sara ga na nona vakasamataka na tarabi ni veika e vakarau sotava. Na veika e vakarau sotava oqo e se sega ni sotava vakadua. Sa volekata oqo o Jisu Karisito, na Luve ni Kalou, na gauna me mai cava kina nona bula e vuravura. E kila ni sa vakarau vesu, lewai me vakamatei, qai vakoti ena kaunirarawa. E kila ni veika e vakatulewataka se cakava ena rawa ni vakarogovinakataki kina na yaca i Tamana, se kena veibasai me vakarogocataka. E kila tale ga ni vakabulai ni kawatamata e sa vakatau sara tu ga ena ka e cakava ena gauna oya. Sega ni vakabekataki ni na curuoso sara ga na nona vakasama. Ia na cava e cakava?

² E gole vata kei iratou nona tisaipeli o Jisu ina were o Kecisemani, na vanua e dau lako wasoma kina. E kea e qai lai biuti iratou nona yapositolo me gole vakatikitiki. Ni tiko taudua, sa qai masuti Tamana vakalomalagi me vakaukauataki koya, e talaucaka na lomana ena nona vakamamasu vei Tamana. E sega ni masu ga vakadua, ia e masu sara ga vakatolu. Dina ni tamata uasivi o Jisu ia e kila ni tarabi ni veika e vakarau sotava ena sega ni rawa ni vosota ena nona kaukaua ga.​—Maciu 26:36-44.

³ E sa tarabi tale tiko ga vei keda na veika eda sotava ena gauna oqo. Eda sa raica oti ena ivola oqo nida sa bula tiko ena iotioti ni veisiga ni ituvaki ca kei vuravura. Sa qai tarabi ga na veika e binia mai vei keda na vuravura i Setani, salavata mai kei na nona veitemaki. Noda vakatulewa kei na veika eda cakava o keda na kaya nida qarava na Kalou dina ena rawa ni rogo vinaka kina o koya, se beci kina, qai rawa ni vakatau tale ga kina na noda rawata na bula ena vuravura vou se sega. Eda lomani Jiova. Eda vinakata meda “vosota me yacova nai vakataotioti”​—na ivakataotioti ni noda bula se ivakataotioti ni ituvaki kei vuravura eda bula donuya tu oqo, o koya ga e liu vei rau. (Maciu 24:13) Ia, na cava meda cakava meda kua kina ni vakawelewele, meda qai yadra tiko?

⁴ Ni kila o Jisu ni na tarabi tale ga vei ira nona tisaipeli ena gauna oya kei na gauna oqo na veika era na sotava, e tukuna kina: “Dou yadra tiko ka masu, mo dou kakua kina ni tacori e na vere [“rawai ena veitemaki,” NW].” (Maciu 26:41, VV) Na cava na ibalebale ni veivosa oqo vei keda nikua? Na veitemaki cava o sotava tiko? E rawa vakacava mo “yadra tiko”?

Temaki ena Cava?

⁵ O keda kece eda dau temaki e veisiga meda tacori ena ‘icori ni Tevoro.’ (2 Timoci 2:26) E dodonu meda qaqarauni kina baleta e kaya na iVolatabu ni o Setani ena sagai keda vakatabakidua na qaravi Jiova. (1 Pita 5:8; Vakatakila 12:12, 17) Na cava e nona inaki? E sega ni nona inaki duadua ga me vakamatei keda. Baleta kevaka eda mate ena yalodina, eda sa na sega ni tovaki koya ena nona vakalelewa. E kila vinaka tale ga o Setani ni na sega ni dredre vua na Kalou me vakabulai ira tale na mate ena nona gauna lokuci.​—Luke 20:37, 38.

⁶ E via vakarusa ga o Setani e dua na ka e bibi cake mai na noda bula, oya na noda yalodina vua na Kalou. E saga tiko o Setani me vakadinadinataka ni rawa ni vakamuai keda tani mai na noda qaravi Jiova. O koya gona, ke rawa nida bacani meda kua ni yalodina, oya meda muduka vakadua noda vunautaka na itukutuku vinaka, se meda kua ni muria na itovo vakarisito, sa na qaqa o Setani! (Efeso 6:11-13) Oya na vuna e temaki keda tiko kina o koya “na dauvere,” se na dauveitemaki.​—Maciu 4:3.

⁷ E levu sara “nai lawaki” i Setani. (Efeso 6:11) E rawa ni temaki keda ena domoni vakasivia ni iyau, rere, vakatitiqa, se qara marau. Ia e dau veirawai vakalevu ena nona veivakayalolailaitaki. Ni rui qaseqase, e kila vinaka ni rawa ni vakamalumalumutaki keda na yalolailai, ni rawarawa kina na noda rawai. (Vosa Vakaibalebale 24:10) O koya gona, e dau bacani keda meda soro koso ena gauna sara ga e dau raica kina ni ‘rarawa na yaloda.’​—Same 38:⁠8.

⁸ Nida sa volekata yani na ivakataotioti, e vaka me sa qai levu ga na ka e vakayalolailaitaki keda. (Raica na kato “So na Ka e Vakavuna na Yalolailai.”) Se mani cava e vakavuna, na yalolailai e dau vakamalumalumutaki keda. Noda “vakayagataka vinaka na gauna” nida vakayacora noda itavi vakayalo e okati kina na noda vulica na iVolatabu, noda tiko ena soqoni, kei na vakaitavi ena cakacaka vakavunau, e rawa ni ka ni bolebole kevaka e oca na yagoda, noda vakasama, se yaloda. (Efeso 5:15, 16, VV) Kua ni guilecava ni vinakata na Dauveitemaki meda soro koso. Ia oqo e sega ni gauna meda vakamalumalumu kina se vakawelewele. (Luke 21:34-36) Na cava meda cakava meda kua kina ni temaki, ia meda yadra tiko? Vakasamataka e va na ka e vakaturi oqo me vukei keda.

‘Masu Wasoma’

⁹ Vakararavi vei Jiova ena masu. Nanuma na ka e cakava o Jisu ena were o Kecisemani. Na cava e cakava ena gauna e curuoso sara tu ga kina nona vakasama? E kerei Jiova me vukei koya. Ena kaukaua ni nona masu e “vaka na titiri ni dra na nona buno ni sa titiri ki na qele.” (Luke 22:44, VV) Vakasamataka mada. E kilai Setani vinaka o Jisu. A raica tiko mai lomalagi na veitemaki kece i Setani ena nona saga me coriti ira na tamata ni Kalou. Ia e sega ga ni via nuitaki koya ga vakataki koya o Jisu me nanuma ni na rawarawa me vorata na veika ena bacani koya kina na Dauveitemaki. Ke vakila na Luve ni Kalou uasivi ni dodonu me masuta na Kalou me vukei koya, sa na qai wacava sara o keda!​—1 Pita 2:21.

¹⁰ Nanuma tale ga ni oti nona uqeti iratou nona tisaipeli me ratou ‘masu wasoma,’ a kaya o Jisu: “Sa gu na yalo, ia na yago sa malumalumu.” (Maciu 26:41) Na yago i cei e vakaibalebaletaka o Jisu? E sega ni yagona baleta ni a uasivi na yagona vakatamata. (1 Pita 2:22) Ia eratou sega ni vaka kina na nona tisaipeli. Ni ratou sucukaya mai na ivalavala ca, eratou na vinakata sara vakalevu na veivuke me rawa kina ni ratou vorata na veitemaki. (Roma 7:21-24) Oya na vuna e uqeti iratou kina, kei keda kece tale ga na lotu Vakarisito dina, meda masuta na veivuke ni Kalou meda kua ni rawai kina ena veitemaki. (Maciu 6:13) E dau rogoca na masu vaka oqori o Jiova. (Same 65:2) Ena sala cava? Ena rua mada ga na sala oqo.

¹¹ iMatai, e dau vukei keda na Kalou meda siqema rawa na ka eda temaki kina. Na veitemaki i Setani era vaka na icori era biu ena sala buto. Ke da sega ni raica, eda na tacori dina kina. Ia, e vakayagataka o Jiova na iVolatabu kei na ivola vakaivolatabu me vakararamataka noda sala, eda raica rawa kina na icori i Setani, eda sega ni rawai kina ena nona veitemaki. Ena veiyabaki sa sivi, sa dau vakasalataki keda na ivola e dau tabaki, na porokaramu ena soqo ni tikina kei na soqo ni tabacakacaka ena leqa e rawa ni basika ena ka ni veitemaki i Setani, me vaka na rerevaka na tamata, na ivalavala dukadukali, na domodomoiyau, kei na so tale. (Vosa Vakaibalebale 29:25; 1 Korinica 10:8-11; 1 Timoci 6:9, 10) Sega ni vakabekataki nida vakavinavinaka vei Jiova ena nona dau vakatakila vei keda na ivadi ca nei Setani. (2 Korinica 2:11, VV) Na ivakasala kece vaka oqo era isau ni noda masuta na veivuke meda kua ni rawai ena veitemaki.

¹² iKarua, e rogoca noda masu o Jiova ena nona solia vei keda na kaukaua meda tudei tiko ga kina nida temaki. E kaya nona Vosa: “Na Kalou . . . ena sega ni laivi kemudou mo dou dauveretaki vakalevu cake, me vaka ga na nomudou kaukauwa; ka na cakava talega kei na vere na sala mo dou dro kina.” (1 Korinica 10:13) Ena sega ni vakatara na Kalou e dua na veitemaki me sivia na noda kaukaua vakayalo, kevaka eda vakararavi tiko vua. E ‘cakava vakacava na sala meda dro kina’? E ‘solia na yalona tabu vei ira era kerea vua.’ (Luke 11:13) Na yalona tabu e rawa ni vukei keda meda nanuma na ivakavuvuli vakaivolatabu e rawa ni vakaukauataki keda meda dei tiko ga ena veika e dodonu. Ena vukei keda tale ga me dodonu na noda vakatulewa. (Joni 14:26; Jemesa 1:5, 6) E rawa ni vukei keda ena itovo e bibi me tiko vei keda meda vorata rawa kina na idre ni ivalavala ca. (Kalatia 5:22, 23) Na yalo tabu ni Kalou e rawa sara mada ga ni uqeti ira eda vakabauta vata mera ‘vakaukauataki keda.’ (Kolosa 4:11) O sega li ni vakavinavinakataka na yalololoma i Jiova ena nona rogoca noda masu ni kere veivuke?

Me Kua ni Sivia na Ka O Namaka

¹³ Meda yadra tiko, e dodonu me kua ni sivia na ka eda namaka. Eda dau malumalumu kece ena so na gauna ni bikai keda na dredre ni bula. Ia meda nanuma tiko ni sega ni yalataka na Kalou ni na maravu tu ga na noda bula ena vuravura oqo. O ira mada ga na tamata ni Kalou era cavuti ena iVolatabu era sotava tale ga na bula dredre. Era vakacacani, era dravudravua, era lomabibi, era dau tauvimate tale ga.​—Cakacaka 8:1; 2 Korinica 8:1, 2; 1 Cesalonaika 5:14; 1 Timoci 5:23.

¹⁴ E dau bikai keda tale ga na leqa ena gauna oqo. Eda na vakacacani beka, eda leqa vakailavo, eda lomabibi, eda tauvimate, da qai sotava na veileqa tale e so. Ke taqomaki keda mai na veika ca kece o Jiova, ena sega beka ni dina kina na ka e beitaki Jiova kina o Setani? (Vosa Vakaibalebale 27:11) E dau vakatara o Jiova mera temaki se vakatovolei na nona tamata, so na gauna e rawa nira mate dole sara ena ligadra na dauveitusaqati.​—Joni 16:2.

¹⁵ Ia na cava e yalataka o Jiova? Me vaka sa vakaraitaki oti, e yalataka ni na vukei keda meda tudei nida temaki, kevaka eda vakararavi vua. (Vosa Vakaibalebale 3:5, 6) E dau taqomaki keda vakayalo me rawa kina ni qaqaco vinaka tiko ga na noda veiwekani kei koya ni vakayagataka na nona Vosa, na yalona tabu, kei na nona isoqosoqo. Ke vinaka tiko ga na veiwekani oqo, eda na qaqa, veitalia sara mada ga ke da mani mate. E sega ni dua na ka, okati kina na mate, e rawa ni tarova na Kalou ena nona saumi ira na nona tamata yalodina. (Iperiu 11:6) Ena vuravura vou sa roro voleka tiko mai, ena qai vakayacora kece kina o Jiova na vo ni nona vosa ni yalayala vei ira na lomani koya.​—Same 145:16.

Nanuma na Vakalelewa i Setani

¹⁶ Me rawa nida vosota me yacova na ivakataotioti, e dodonu meda nanuma na vakalelewa i Setani, e vakavuna nona vakatara tiko na Kalou na veika ca. Ke so na gauna e rui tarabi na veika eda sotava da qai temaki meda soro koso, e vinaka meda vakasamataka na nona vakalewa o Setani na veiliutaki i Jiova. E vakalewa tale ga na Dauveivakacalai oqo na nodra yalodina na dauveiqaravi ni Kalou. (Jope 1:8-11; 2:3, 4) Na vakalelewa oqo kei na sala e digitaka o Jiova me qai macala kina na lasu i Setani, e bibi cake mai na noda dui bula. E bibi cake vakacava?

¹⁷ Nona vakatara vakalekaleka tiko na Kalou meda sotava na veika rarawa e solia kina vei ira e so tale na gauna mera vakabauta na ka dina. Vakasamataka mada oqo: A bolea na rarawa o Jisu meda rawata kina na bula tawamudu. (Joni 3:16) Eda sega beka ni vakavinavinakataka oya? Ia, vakacava o keda? Eda na tu vakarau beka meda vosota vakalekaleka na veika dredre me rawa nira bula kina e so tale? Me rawa nida vosota me yacova na ivakataotioti, e bibi meda nanuma dei tiko ni uasivi cake na vuku nei Jiova mai vei keda. (Aisea 55:9) Ena qai tinia ga na veika ca ena gauna sa ganita kina me vakavotui na lasu ni vakalelewa i Setani. Nona cakava oya ena yaga vakalevu sara vei keda. Oqo tale ga na ka eda namaka vua na Kalou, ni dau dodonu vakaoti na ka e cakava!​—Roma 9:14-24.

‘Toro Voleka Vua na Kalou’

¹⁸ Meda kua ni vakawelewele ena gauna oqo, e dodonu meda volekati Jiova tiko ga. Nanuma dei toka ni saga vakaukaua tiko o Setani me vakacacana noda veiwekani vinaka kei Jiova. E saga o Setani meda vakabauta ni na sega ni yaco mai na ivakataotioti qai sega tale ga na betena na noda vunautaka na itukutuku vinaka se noda bulataka na ivakatagedegede vakaivolatabu. Ia o koya e “dau lasulasu ka sa vu mai vua na lasu kece ga.” (Joni 8:44, VV) Dodonu me noda inaki dei meda ‘vorata tiko ga na tevoro.’ Meda kua ni vakawaletaka na noda veiwekani kei Jiova. E uqeti keda na iVolatabu meda ‘toro voleka vua na Kalou, ena qai toro voleka mai vei keda o koya.’ (Jemesa 4:7, 8) Na cava mo cakava mo toro voleka sara kina vei Jiova?

¹⁹ E dodonu mo vakasamataka vakabibi na nomu veiwekani kei Jiova, me okati tale ga kina nomu vakamamasu vua. Ke tarabi vei iko na bula, talaucaka na lomamu vei Jiova. Na kena matata nomu masu, na kena rawarawa tale ga ni nomu raica na kena isau. De dua ena sega ni vaka na ka o nanuma, ia ke nomu gagadre mo dokai koya mo yalodina tale ga vua, ena vukei iko dina o Jiova mo vosota tiko. (1 Joni 5:14) Ni o vakila na vinaka ni nona ivakasala, o na qai toro voleka ga vua. E bibi tale ga mo wilika o qai vakasamataka vinaka na itovo i Jiova kei na nona sala e vakamacalataki ena iVolatabu. Nomu vakasama vakatitobu vaka oqori ena vukei iko mo kilai koya vinaka; ena kaukaua sara kina na nomu lomani koya. (Same 19:14) Na loloma oqo e vaka e dua na ivakadei kaukaua, o na sega ni rawai kina ena veitemaki cava ga, ena vakaukauataki iko tale ga mo yadra tiko ga.​—1 Joni 5:3.

²⁰ Nida toro volekati Jiova, e bibi tale ga meda kabiti ira na tacida vakayalo. Oqo ena qai vakamacalataki ena iotioti ni iwasewase ni ivola oqo.

TARO NI VULI

• Na cava e cakava o Jisu ni tarabi vua na ka e vakarau sotava ni vakarau cava na nona bula e vuravura? Na cava e tukuna vei iratou na nona tisaipeli? (Para. 1-4)

• Na cava e sagai keda kina vakaukaua na sokalou vei Jiova o Setani, e dau temaki keda vakacava? (Para. 5-8)

• Meda tudei nida temaki, na cava e bibi kina meda masu wasoma (Para. 9-12), me kua ni sivia na veika eda namaka (Para. 13-15), meda nanuma na vakalelewa i Setani (Para. 16-17), da qai ‘toro voleka vua na Kalou’ (Para. 18-20)?

[Kato ena tabana e 25]

So na Ka e Vakavuna na Yalolailai

Tauvimate/Qase. Ke vakaleqai keda na tautauvimate se na noda sa qase, oqo e rawa ni vakayalolailaitaki keda baleta ni sa vakaiyalayala ga na veika eda rawa ni cakava ena noda qarava na Kalou.​—Iperiu 6:10.

Yalodatuvu. E rawa nida datuvu ke sega soti ni ciqomi na noda vunautaka na Vosa ni Kalou.​—Vosa Vakaibalebale 13:12.

Ni o nanuma ni o tawayaga. Ke o vakalolomataki tu mai vakadede, o rawa ni nanuma ni o sega ni lomani, se sega ni lomani iko mada ga o Jiova.​—1 Joni 3:19, 20.

Rarawa. Ke dua na tacimu vakayalo e vakacudrui iko, oqo e rawa ni vakayalolailaitaki iko, e rawa ni temaki iko sara mada ga mo muduka nomu lakova na soqoni vakarisito se cakacaka vakavunau.​—Luke 17:1.

Vakacacani. E rawa nira saqati iko, vakacacani iko, se vakasewasewani iko o ira era sega ni qaravi Jiova.​—2 Timoci 3:12; 2 Pita 3:3, 4.

[iYaloyalo ena tabana e 26]

E uqeti keda o Jisu meda ‘masu wasoma’ meda kua kina ni rawai ena veitemaki