Vakaukauataki Meda Vorata na Veitemaki, Meda Valuta na Yalolailai
“Dou na vakaukauataki ni sobuti kemudou na yalo tabu.”—CAKA. 1:8.
1, 2. Na cava a yalataka o Jisu ni na vukei ratou na nona tisaipeli, na cava ena vinakati kina me ratou vukei?
A KILA o Jisu ni ratou na sega ni rawa ni muria na nona tisaipeli na nona ivakaro kece ena nodratou kaukaua ga. Ni vakasamataki na levu ni vanua me ratou vunau kina, na nodra veitusaqati kaukaua na meca, kei na malumalumu ni yago ni tamata, e sa na vinakati ga na kaukaua mana levu. Qori na vuna a vakadeitaka kina vei ratou na nona tisaipeli ni bera ni lesu i lomalagi: “Dou na vakaukauataki ni sobuti kemudou na yalo tabu, dou na qai tukuni au e Jerusalemi, e Jutia, e Samaria, kei na veivanua yawa sara kei vuravura.”—Caka. 1:8.
2 A tekivu vakayacori na yalayala qori ena Penitiko 33 S.K., a vakaukauataki ira kina na imuri i Jisu Karisito na yalo tabu mera vunau e Jerusalemi. E sega ni dua ena rawa ni tarova qori. (Caka. 4:20) Ena gadrevi vakalevu me vakaukauataki keda kece na imuri dina i Jisu na Kalou “me yacova na ivakataotioti ni veika vakavuravura.”—Maciu 28:20.
3. (a) Vakamacalataka na kedrau duidui na yalo tabu kei na kaukaua. (b) Ena yaga vakacava na kaukaua e solia vei keda o Jiova?
3 A yalataka o Jisu vei ratou na nona tisaipeli ‘ni ratou na vakaukauataki ni sobuti ratou na yalo tabu.’ E duidui na kedrau ibalebale na “kaukaua” kei na “yalo.” Na yalo tabu na igu e vakayagataka na Kalou me uqeta na tamata se yavalata na veika ena vakayacora na lomana. Ia na kaukaua e rawa ni tukuni na “nona rawa ni cakava e dua na ka e vinakata se vakamawe na ka e cakava.” E tu na kaukaua vua na tamata se so tale na ka, ia e rawa ni sega ni vakayagataki tu me yacova na gauna e vinakati kina me vakayacori e dua na ka. Na yalo tabu e rawa ni vakatauvatani ena livaliva e curuma na batiri (rechargeable) me cakacaka rawa kina, ia na kaukaua e vaka na igu e sega ni laurai e maroroi toka ena batiri. Ena kaukaua gona e solia vei keda o Jiova ena vuku ni yalona tabu, eda rawa kina ni vakayacora na noda yalayala vaKarisito, eda na qai vakayagataka tale ga na kaukaua oya ni gadrevi meda vorata na veika e rawa ni vakaleqai keda vakayalo.—Wilika Maika 3:8; Kolosa 1:29.
4. Na cava ena veivosakitaki ena ulutaga qo, na cava na vuna?
4 Ena kilai vakacava nida vakaukauataki ena yalo tabu? Ena dusimaki keda vakacava na yalo tabu ena ka meda tukuna se cakava ena duidui ituvaki eda sotava? E levu sara na leqa eda sotava nida saga meda qaravi Jiova ena yalodina—e vakavuna qori o Setani, na ituvaki ca e lewa tu qo, se vu mai na yagoda ivalavala ca. E bibi meda valuta na leqa va qori meda rawa ni vosota tiko ga, da vakaitavi wasoma ena cakacaka vakaitalatala, qai vinaka tiko ga na noda veiwekani kei Jiova. Meda veivosakitaka mada na sala ena vakaukauataki keda kina na yalo tabu meda vorata na veitemaki, meda vosota nida oca, meda valuta tale ga na yalolailai.
Vakaukauataki Meda Vorata na Veitemaki
5. Eda na vakaukauataki vakacava nida masu?
5 A vakavulici ratou na nona imuri o Jisu me ratou masuta: “Kua ni vakatara me keimami rawai ena veivakatovolei, ia moni vakabulai keimami mai vua na Vunica.” (Maciu 6:13) O Jiova ena sega ni biuti ira na nona dauveiqaravi e nodra qaqanimasu qori. A kaya ena dua tale na gauna o Jisu ni ‘Tamada mai lomalagi ena solia na yalo tabu vei ira era kerea vua.’ (Luke 11:13) E veivakacegui dina na nona yalataka o Jiova me solia vei keda na yalona tabu meda cakava kina na ka e dodonu! Qori e sega ni kena ibalebale ni na tarova o Jiova na veitemaki. (1 Kor. 10:13) Ia e kena ibalebale ga me wasoma na noda masu nida temaki.—Maciu 26:42.
6. A yavutaka ena cava o Jisu na ka a tukuna ni temaki koya o Setani?
6 A yavutaka ena iVolatabu o Jisu na ka a tukuna ni temaki koya na Tevoro. A matata sara tu ga vua na ka e kaya na Vosa ni Kalou ena nona tukuna: “E volai . . . E volai tale ga . . . Lako tani, Setani! E volai, ‘E dodonu mo sokalou vei Jiova na nomu Kalou, mo qaravi koya duadua ga.’ ” Na nona lomani Jiova o Jisu kei na nona taleitaka na nona Vosa a uqeti koya me vorata na veitemaki ni Dauveivakatovolei. (Maciu 4:1-10) A biuti Jisu o Setani ni vorata tiko ga na nona veitemaki.
7. E yaga vakacava na iVolatabu ena noda vorata na veitemaki?
7 A nuitaka o Jisu na Vosa ni Kalou me vorata kina na veitemaki ni Tevoro, sa qai wacava sara na kena bibi meda cakava tale ga qori! Ia meda rawa ni vorata na Tevoro kei ira na nona ilala, meda vakadeitaka mada e liu meda kila na ivakatagedegede ni Kalou da qai muria vinaka sara. Na nodra vulica e levu na iVolatabu, na nodra kila kei na nodra raica vakabibi na vuku ni Kalou kei na nona yalododonu e uqeti ira mera muria na ivakatagedegede vakaivolatabu. Ni kaukaua na “vosa ni Kalou,” e rawa kina ni vakavotuya na “nanuma kei na inaki ni lomada.” (Iper. 4:12) Na levu ga ni noda wilika da qai vakananuma vakatitobu na iVolatabu, na levu tale ga ni noda ‘kila na ivunau i Jiova.’ (Tani. 9:13) E bibi gona meda dau vakananuma vakatitobu na tikinivolatabu e baleta na noda malumalumu.
8. Na sala cava eda rawa ni vakaukauataki kina ena yalo tabu?
8 Me ikuri ni nona nuitaka na iVolatabu, a vorata rawa tale ga na veitemaki o Jisu ni a ‘sobuti koya na yalo tabu.’ (Luke 4:1) Ena vakaukauataki keda tale ga va qori na yalo tabu ke da toro voleka vei Jiova nida vakayagataka vinaka na isolisoli e vakarautaka me vakaukauataki keda kina na yalona tabu me vaka na noda vulica na nona Vosa, na noda masu kei na noda veimaliwai kei ira na mataveitacini. (Jeme. 4:7, 8) E levu era raica tale ga ni yaga na nodra ogaoga vakalevu ena cakacaka vaKarisito, e dei tiko ga kina ena nodra vakasama na veika e veivakayaloqaqataki vakayalo.
9, 10. (a) Na cava eso na ka eda rawa ni temaki kina vakalevu? (b) Ena vakaukauataki iko vakacava na nomu vakasama vakatitobu kei na nomu masu mo vorata na veitemaki ena gauna mada ga o oca tu kina?
9 Na veitemaki cava e vinakati mo vorata? O sa bau temaki mo wedeva e dua e sega ni watimu? Ke o dawai, o bau vinakata ena dua na gauna mo drau lai sota taurua kei na dua e sega ni vakabauta? Nida sara tivi se da vakayagataka tiko na Internet, e rawa ni vakasauri ga na noda temaki meda raica na ka dukadukali. O sa sotava oti qori? Ke vaka kina, na cava o cakava? E ka vakayalomatua meda dau vakasamataka ni dua na cala e rawa ni vakavuna eso tale na cala, lai tini sara ena valavala ca bibi. (Jeme. 1:14, 15) Vakasamataka na nona rarawa o Jiova, o ira na mataveitacini, kei ira na noda vuvale ke da valavala ca bibi. Ia ena savasava na noda lewaeloma ke da yalodina tiko ga ena ivakavuvuli vakalou. (Wilika Same 119:37; Vosa Vakaibalebale 22:3.) Ni o temaki, vakadeitaka mo masuta mo vakaukauataki mo vorata na veitemaki.
10 E dua tale na ka me nanumi tiko me baleta na veitemaki ni Tevoro. A digia o Setani me temaki Jisu ni oti e 40 na siga na nona lolo tu ena vanualiwa. A raica na Tevoro ni “gauna veiganiti” sara ga oya me vakatovolei kina na yalodina i Jisu. (Luke 4:13) E dau vaqara tale ga o Setani na gauna veiganiti me vakatovolea kina na noda yalodina. E bibi gona meda kaukaua tiko ga vakayalo. E dau veitemaki o Setani ena gauna e raica kina nida malumalumu sara tu ga. Meda vakadeitaka gona meda masuta vagumatua na veitaqomaki i Jiova kei na yalona tabu ena gauna kece eda oca se yalolailai kina.—2 Kor. 12:8-10.
Vakaukauataki Meda Vosota Nida Oca, Meda Valuta na Yalolailai
11, 12. (a) Na cava era yalolailai kina e levu nikua? (b) Na cava e rawa ni vakaukauataki keda meda valuta na yalolailai?
11 Eda na yalolailai ena so na gauna nida ivalavala ca. E rawarawa sara meda yalolailai nikua nida bula tu qo ena gauna e levu kina na ka e dau vakavu lomaocaoca. Eda sa rairai tu qo ena gauna dredre duadua meda bau donuya. (2 Tim. 3:1-5) Nida waraka tiko na Amaketoni, e sa na qai dredre ga na bula vakailavo, ena levu tale ga na ka ena leqataki se lomaocaocataki. Ena sega gona ni kurabuitaki ni na dredre vakalevu vei ira eso mera vakayacora na nodra itavi mera qarava na nodra vuvale, mera vakarautaka na ka mera bula kina. Era vakila o ira qori ni tarabi vakalevu na nodra icolacola, era wawale se ra sa rui oca ni sa sivia tale na ka era cakava se rawata ena loma ga ni dua na gauna lekaleka. Ke o vakila tiko qori, na cava o rawa ni cakava mo vosota kina?
12 Nanuma tiko, a vakadeitaka o Jisu vei ratou na nona imuri ni na solia vei ratou e dua na dauveivuke—na yalo tabu ni Kalou. (Wilika Joni 14:16, 17.) Qori na igu kaukaua duadua ena lomalagi kei na vuravura. E ‘uasivi na ka e rawa ni cakava’ o Jiova ena yalona tabu meda vakaukauataki meda vosota na veivakatovolei cava ga eda sotava. (Efeso 3:20) E tukuna na yapositolo o Paula ke da nuitaka na yalo tabu, eda vakila na “kaukaua e uasivia na kaukaua ni tamata,” dina ga nida “sogolati ena sala kece.” (2 Kor. 4:7, 8) E sega ni yalataka o Jiova ni na kauta laivi na noda nuiqawaqawa, ia e vakadeitaka ga ni na vakaukauataki keda ena yalona tabu meda vosota rawa kina.—Fpai. 4:13.
13. (a) E vakaukauataki vakacava e dua na itabagone me vosota na kena ituvaki? (b) E dua tale na ivakaraitaki va qori o kila?
13 Raica mada na ivakaraitaki i Stephanie, e yabaki 19 qai painia tudei tiko. A strouk ni yabaki 12, qai laurai ni tubu tiko e dua na ka ena nona mona. Sa sele oti vakarua, vakayacori vua na veiqaravi vakavuniwai e vakatokai na radiation. A strouk tale vakarua, mani vakaleqa na yagona ena yasana imawi qai vakabuawataka na nona rai. E sega ni dau vakaocai koya o Stephanie ena ka e tawayaga, na kaukaua e bau toka vua e sa vakayagataki ga ena veika e bibi cake me vaka na soqoni vaKarisito kei na cakacaka vakavunau. Ia e levu na sala e vakila kina ni vakaukauataki koya na yalo tabu i Jiova me vosota. Ni dau lomabibi, e dau vakayaloqaqataki koya na nodra irogo na mataveitacini ena noda ivola vakaivolatabu. Era veitokoni na mataveitacini nira dau volavola vua se ra vakayaloqaqataki koya nira vosa vua ni bera na soqoni se ni oti. O ira na tataleitaki era vakavinavinakataka na veika e vakavulici ira tiko kina ena nodra gole i nona vale mera lai vuli iVolatabu. Qori na ka kece e dau vakavinavinakataka vakalevu vei Jiova o Stephanie. E vakadinata ni vakayacori ena vukuna na Same 41:3, na nona tikinivolatabu taleitaki.
14. Na cava meda kua ni cakava nida yalolailai, na cava na vuna?
14 Nida oca se nuiqawaqawa, meda kua sara ni nanuma nida na valuta qori ke da vakalailaitaka na gauna eda vakayagataka ena cakacaka vaKarisito. Qori e ka vakalialia dina. Na cava na vuna? Baleta eda vakaukauataki ena yalo tabu nida vulica vakataki keda se vakavuvale na iVolatabu, nida vakaitavi ena cakacaka vakavunau, kei na noda tiko ena soqoni. E dau veivakacegui na cakacaka vaKarisito. (Wilika Maciu 11:28, 29.) E levu na tacida era dau oca tu nira gole ina soqoni, ia nira lesu i vale, e vaka ga era vakaukauataki tale!
15. (a) E yalataka beka o Jiova ni na rawarawa tu ga na nona bula e dua na lotu vaKarisito? Me yavutaki ena iVolatabu na ivakamacala. (b) Na cava e yalataka vei keda na Kalou, na taro cava meda taroga?
15 Ia e sega ni kena ibalebale oya ni na rawarawa tu ga na noda cakava na noda itavi vaKarisito. E vinakati na sasaga me yalodina tiko ga kina e dua na lotu vaKarisito. (Maciu 16:24-26; Luke 13:24) Ia ena vakayagataka na yalona tabu o Jiova me vakaukauataki koya e oca. A vola na parofita o Aisea: “Ko ira era sa waraki Jiova era na vakaukauwataki tale; era na cabe cake me vaka era vakatabana vakaikeli; era na cici, ka sega ni oca, era na lako tu, ka sega ni malumalumu.” (Aisea 40:29-31) Ke sa va oya, e vinaka meda taroga, Na cava e vu dina ni noda oca vakayalo?
16. Na cava eda rawa ni cakava meda kauta laivi kina na veika e rairai vakavuna tiko na noda oca se yalolailai?
16 E uqeti keda na Vosa i Jiova meda ‘vakadeitaka na veika era bibi sara.’ (Fpai. 1:10) A vakatauvatana na yapositolo o Paula na bula vaKarisito ina veitaucici balavu, qai uqeti vakalou me vola: “Meda biuta laivi na ka bibi kece . . . , meda qai ciciva tiko ga ena vosota na cere e tu e matada.” (Iper. 12:1) A vakabibitaka tiko e keri meda biuta laivi na veika e tawayaga, e ikuri ga ni icolacola vei keda qai veivakaocai. De dua e sa rui sivia tale na ka eda vakaogai keda tiko kina. Ena gauna gona o oca se nuiqawaqawa kina, e vinaka mo dikeva tale mada na levu ni gauna o vakayagataka tiko ena cakacaka saumi, na levu ni gauna o veigadeyaki kina, kei na levu ni gauna o vakayagataka ena qito kei na ka ni veivakamarautaki tale eso. Ke da yalorawarawa da qai yalomalumalumu, eda na vakadinata ni vakaiyalayala ga na ka eda rawa ni cakava, da qai yalana na veika e tawayaga.
17. Na cava era rairai yalolailai kina eso, na cava e vakadeitaka vei keda o Jiova?
17 De dua era yalolailai tale ga eso ni sega ni yaco totolo mai na icavacava ni ituvaki ca qo me vaka era namaka tu. (Vkai. 13:12) E rawa ni vakayaloqaqataki koya e va tiko qori na nona rai na ka e tukuni ena Apakuki 2:3: “Ni na dede mada na raivotu me qai yaco na gauna sa loku, ia ni sa yaco nai otioti ni gauna, ena qai vosa, ena sega ni lasu: kevaka ena berabera, mo waraka ga; ena yaco vakaidina ga, ena sega ni berabera sara.” E vakadeitaka vei keda o Jiova ni na yaco mai na icavacava ni ituvaki ca qo ena gauna sara ga sa lokuca tu!
18. (a) Na yalayala cava e vakaukauataki iko? (b) Ena yaga vakacava vei keda na ulutaga e tarava?
18 Eda vakanamata kece tu na dauveiqaravi i Jiova ina gauna sa na oti kina na oca kei na yalolailai, era sa na ‘gone tale’ o ira kece era na bula. (Jope 33:25) Ena gauna mada ga qo, ena vakayaloqaqataka na lomada na yalo tabu nida vakaitavi ena cakacaka vaKarisito e dau veivakabulabulataki. (2 Kor. 4:16; Efeso 3:16) Kua ni vakatara me tarova na oca na nomu vakalougatataki tawamudu. Ena oti na veivakatovolei kece se mani veitemaki, oca, se yalolailai, ke sega ni yaco qori nikua, ia ena vuravura vou ni Kalou. Ena veivosakitaki ena ulutaga e tarava na sala e vakaukauataki keda kina na yalo tabu meda tudei nida vakacacani, meda vorata na idre ni veimurimuri, da qai vosota na leqa tale eso.
O na Sauma Vakacava?
• E vakaukauataki keda vakacava na wili iVolatabu?
• Eda vakaukauataki vakacava ena masu kei na noda vakasama vakatitobu?
• Na cava eda rawa ni cakava meda kauta laivi kina na veika e rairai vakavuna tiko na yalolailai?
[iYaloyalo ena tabana e 24]
Na soqoni vaKarisito e veivakabulabulataki vakayalo