iTabagone Era Cila me Vaka na Kalokalo
1. E vakaraitaka vakacava na iVolatabu nira na duatani na lotu Vakarisito dina? E ganiti ira vakacava na itabagone lotu Vakarisito nikua na vosa oqori?
1 A kaya o Jisu vei ira nona tisaipeli: “Oi kemudou na rarama kei vuravura.” (Maciu 5:14, 16) Era vaka na koro e toka ena dua na delana, e laurai votu ni cilava na rarama ni matanisiga. E vaka tale ga kina e levu na itabagone lotu Vakarisito nikua, era ‘cila me vaka na kalokalo ena vuravura butobuto’ ena nodra itovo vinaka kei na nodra gumatuataka na cakacaka vakavunau.—Fpai. 2:15, VV; Mala. 3:18.
2. Sala cava so o rawa ni vunau kina vei ira na qasenivuli se vei ira nomu lewenikalasi?
2 E Koronivuli: O na vunau vakacava e koronivuli? E so na itabagone era cakava oqo ena gauna e dau veitalanoataki kina ena lomanikalasi na ulutaga me vaka na wainimate gaga, bula vakaidewadewa, se na veivakaduiduitaki. Ni sa lesi e dua na tacida yalewa itabagone me vola na nodra vakacaca na batikadi, e vakayagataka na gauna oqori me vakamacalataka kina ni Matanitu ni Kalou ga e nodra inuinui dina na kawatamata. E tarai koya sara ga nona qasenivuli na totoka ni ka e vola, e rawa kina vua na tacida gone oqo me tomana nona dau vakamacala vua.
3. Rawa vakacava ni cila me vaka na kalokalo na nomu itovo e koronivuli?
3 Rawa ni o vakaraitaka tale ga ni o cila tiko me vaka na kalokalo ena nomu itovo, na rakorako ni nomu isulusulu kei na sasauni. (1 Kor. 4:9; 1 Tim. 2:9) Nira raica na vo ni gonevuli kei ira na qasenivuli na nomu itovo vinaka, era na rairai via kila na vuna o duatani kina, oqo ena vakarawarawataka nomu vakamacalataka vei ira na ka dina ena iVolatabu. (1 Pita 2:12; 3:1, 2) E sega ni ka rawarawa na bulataki ni itovo vakalou, ia ena vakalougatataki iko kina vakalevu o Jiova. (1 Pita 3:16, 17; 4:14) Me rawa nira qai kauaitaka o ira na nomu icaba se qasenivuli na itukutuku vinaka, rawa ni o wilika e dua na noda ivola ena gauna ni vakacagicagi se mo biuta tu ena dua na vanua e laurai levu.
4. Na cava e so na ka e yaga kina na vunau e koronivuli?
4 Nomu cila me vaka na kalokalo e koronivuli ena vakaukauataka nomu vakabauta, ena vukei iko tale ga mo sakitaka nomu veiqaravi vei Jiova. (Jere. 9:24) E itataqomaki tale ga. E kaya e dua na tacida itabagone, “Dua na yaga ni noqu vakamacalataka na noqu vakabauta oya nira sega ni sagai au na vo ni gonevuli meu cakava na ka e sega ni salavata kei na iVolatabu.”
5. (a) Era sa vakarabailevutaka tiko vakacava e so na itabagone na nodra cakacaka vakavunau? (b) Na cava nomu isausau vakayalo?
5 Vakarabailevutaka Nodra Cakacaka: Dua tale na sala era sa cila tiko kina na itabagone me vaka na kalokalo oya na nodra vakarabailevutaka nodra cakacaka vakavunau. Ni oti nona vuli ena sekedri e dua na tacida tagane, a toki sara ena dua na vanua e gadrevi sara tu ga kina e so mera veivuke ena kena kacivaki na itukutuku vinaka. E lewe ni dua na ivavakoso lailai, e dua ga na kena qase. “Dua na ka noqu marautaka na tiko e ke,” a vola vei nona itokani. “E veivakabulabulataki dina na cakacaka vakavunau! Rauta ni 20 na miniti na noqu vosa ena dua na vale, baleta nira via rogoca sara ga na itaukeinivale na ka eda lai tukuna vei ira.” E tomana: “Au diva tu mera cakava tale ga na ka vaka oqo na itabagone kece mera vakila kina na ka au vakila tu oqo. Sega tale ni dua na ka e rawa ni vakatauvatani kei na vinaka ni noda qaravi Jiova ena noda igu taucoko.”
6. Na cava o taleitaka me baleti ira na itabagone ena nomu ivavakoso?
6 Eda vakacaucautaki kemuni kece na itabagone ena nomuni cila tiko me vaka na kalokalo ena vuravura butobuto oqo! (1 Ces. 2:20) Ena nomuni qaravi Jiova ena lomamuni, yalomuni, nomuni nanuma, kei na nomuni kaukaua taucoko, oni na tauca dina ga e “yadrau e na bula oqo . . . ia e na gauna maimuri, na bula tawa mudu.”—Mari. 10:29, 30; 12:30.