O Dau Tutaka na Vosa ni Kalou?
1 Levu nikua era vakacala na iVolatabu. O keda ga na lotu Vakarisito dina eda vakabauta ni Vosa ni Kalou. Eda kila ni ‘vakavuna na iVolatabu kece ga na Kalou,’ oya na vuna eda duavata kina kei na qaqanimasu i Jisu vei Tamana: “Sa ka dina na nomuni vosa.” (2 Tim. 3:16; Joni 17:17) Eda na tutaka gona vakacava na Vosa ni Kalou?
2 Vulica Vinaka me Kasa: Sega ni vakabekataki ni o Jisu a vulica vinaka sara ga na Vosa ni Kalou. Oya na vuna e dau yavu tu ga kina ni nona veivakavulici na iVolatabu. (Luke 4:16-21; 24:44-46) Ia vakacava o keda, cava meda cakava me kasa kina vei keda e levu na tikinivolatabu yaga? Meda wilika e veisiga na iVolatabu, da qai vakasamataka vakatitobu e dua na tikina eda raica ni na yaga ena cakacaka vakavunau. Nida vakavakarau ena soqoni, meda wilika na tikinivolatabu era sega ni lavetaki, da qai vakarautaka kina e dua na noda ivakamacala. Nida sa tiko ena soqoni, meda cega tale ga noda iVolatabu ke wiliki e dua na tikina. Ke da vulica vinaka na iVolatabu ena vakarautaki keda oqori meda “wasea vakadodonu nai vakavuvuli dina.”—2 Tim. 2:15.
3 Me Vosa ga na iVolatabu: Nida cakacaka vakavunau me vosa ga na iVolatabu. Kena ivakaraitaki, ke vakatara o itaukeinivale mo wilika e dua na tikinivolatabu, wilika sara. Ia ke taro se sabaya na noda ivakamacala, e vinaka meda vakayagataka ga na iVolatabu meda sauma kina na nona vakatataro. Ke osooso, rawa nida kerea meda wilika mada ga e dua na tikinivolatabu, ena noda kaya, “Me vaka ni oni osooso tiko, rawa beka niu wilika vei kemuni e dua na tikinivolatabu qo?” Ke rawa, wilika sara, me qai vakamuri iko tiko o itaukeinivale.
4 A wiliki vua e dua na itaukeinivale na tikinivolatabu e vakacala na Letoluvakalou, e kaya, “Au tamata dau lotu, ia au sega sara ga ni kila ni tukuni tu qo ena iVolatabu!” A taleitaka me vulica na iVolatabu. A kaya o Jisu ni o ira na nona sipi era na rogoca na domona. (Joni 10:16, 27) Na sala vinaka mera raica kina na tamata yalomalumalumu na ka dina, oya na nodra raica sara ga ena iVolatabu. Meda tutaka mada ga na Vosa dina ni Kalou!