Me Veiuqeti Noda Veivakavulici
1 Era kila na italatala maqosa vakataki Paula ni nodra “wasea vakadodonu na ivakavuvuli dina” e okati kina eso tale na ka, sega ni kena wiligusutaki ga na tikinivolatabu. (2 Tim. 2:15) Eda na “sereka” vakamaqosa vakacava na Vosa ni Kalou nida veivakavulici?—Caka. 28:23.
2 Wilika na Vosa ni Kalou: Kena imatai, meda maqosa ni vakamua na veivosaki ina iVolatabu, me kila o taukeinivale ni tu kina na vuku vakalou. Ke da nuitaka na Vosa ni Kalou, ena rairai uqeti koya me vakarorogo vinaka nida wilika e dua na tikinivolatabu. (Iper. 4:12) Eda rawa ni kaya: “Au kila ni bibi me daru raica na rai ni Kalou me baleta na tikina qo. Rogoca na ka e tukuna na nona Vosa.” Meda wilika sara ga na iVolatabu, ke rawa.
3 Kena ikarua, meda vakamacalataka na tikinivolatabu eda wilika. Ena imatai ni gauna e wiliki kina e dua na tikinivolatabu e dau dredre vei ira e levu mera kila. Eda na vakamacalataka gona me salavata kei na ulutaga eda veivosakitaka tiko. (Luke 24:26, 27) Meda vakabibitaka na vosa ena tikinivolatabu e tokona noda ivakamacala. Eda na kila ke sa matata vei taukeinivale na tikina eda via vakabibitaka, ke da taro.—Vkai. 20:5; Caka. 8:30.
4 Vakamacala Mai na iVolatabu: Kena ikatolu, saga meda vakauqeta na lomadra kei na nodra vakasama. Meda vukei taukeinivale me kila ni tikinivolatabu eda wilika, e yaga tale ga vua. Noda vakamacala mai na iVolatabu ena rawa ni vakauqeta e dua me veisautaka nona ivakarau vakasama. (Caka. 17:2-4; 19:8) Kena ivakaraitaki, nida wilika oti na Same 83:18, eda rawa ni vakamacalataka na bibi noda kila na yacana e dua, qo ena tauyavu kina e dua na veitokani voleka. Oti, eda na rairai taroga, “O nanuma ni na vakaibalebale vakalevu noda masu ke da kila na yaca ni Kalou?” E yaga vakalevu nida sema na tikinivolatabu ina nona bula na itaukeinivale. Na iwalewale ni veivakavulici va qo ena Vosa ni Kalou, era na malele mai kina na yalomalumalumu mera sokalou vua na Kalou dina o Jiova, e Kalou bula tale ga.—Jere. 10:10.
[Taro]
1. Na cava e okati ena vakayagataki vakamaqosa ni Vosa ni Kalou ena cakacaka vakaitalatala?
2. Eda na vukei ira vakacava eso tale mera doka na Vosa ni Kalou?
3. Na cava meda cakava me kila kina o koya e rogoci keda na ibalebale ni tikinivolatabu eda wilika?
4. Na iotioti ni kalawa cava e yaga ena noda veivakavulici?