Tiko na Ka Eda Rawa ni Solia Vei Jiova
1 O kila ni tiko na ka eda rawa ni solia vua na Kalou? O Epeli a cabora vei Jiova e so na manumanu uro qai savasava, vaka tale ga kina o Noa, kei Jope. (Vkte. 4:4; 8:20; Jope 1:5) Na veika qori e sega ni lai vakalevutaka na ka e taukena na Dauveibuli, baleta ni lewa tu na veika kece. Ia na vakacaboisoro eratou cakava na turaga yalodina qo e vakaraitaka na nodratou lomani Jiova dina. Vaka tale ga kina nikua, rawa nida vakayagataka noda kaukaua, gauna, kei na veika eda taukena meda cabora kina na ‘imadrali ni vakavinavinaka’ vei Jiova.—Iper. 13:15.
2 Gauna: E marautaki dina noda “volia” na gauna meda vakuai keda mai na veika e sega soti ni bibi da qai vakalevutaka noda cakacaka vakavunau! (Efeso 5:15, 16) Rawa nida veisautaka noda ituvatuva meda painia veivuke ena dua na vula se sivia ena loma ni dua na yabaki. Rawa nida vakalevutaka na gauna ni noda cakacaka vakavunau. Ke da vakalevutaka ena 30 na miniti noda cakacaka vakavunau e veimacawa, eda na rawata tale e rua na aua ena dua na vula me ikuri ni aua eda sa dau rawata tiko!
3 Kaukaua: Meda vakayagataka vinaka noda kaukaua ena cakacaka vakavunau mai na noda vakaogai keda ena ka ni marau se cakacaka ena vakaocai keda ga, da sega ni solia kina vei Jiova na noda vinaka kece. Noda lomaocaoca tale ga vakasivia ena ‘vakabibitaka na lomada,’ ena sega kina na kaukaua meda vakayagataka ena noda veiqaravi vei Jiova. (Vkai. 12:25) Ia ke da lomaocaocataka dina e dua na ka, vakacava meda ‘biuta vei Jiova’ na icolacola qori?—Same 55:22; Fpai. 4:6, 7.
4 Ka Eda Taukena: Rawa tale ga nida solia na veika e tu vei keda meda tokona kina na cakacaka vakavunau. A uqeti ira na lotu vaKarisito o Paula mera ‘biuta vakatikitiki toka e so na ka’ e veigauna me soli vei ira na gadreva dina tu. (1 Kor. 16:1, 2) Da rawa tale ga ni cakava qo ena noda biuta vakatikitiki toka e so na ilavo meda cautaka ena ivavakoso se ena noda cakacaka vakavunau ena vuravura raraba. E marautaka o Jiova na ka eda solia mai vu ni lomada dina ga ke lailai sara.—Luke 21:1-4.
5 Dua na ka na levu ni isolisoli vinaka e solia vei keda o Jiova. (Jeme. 1:17) Eda vakaraitaka noda vakavinavinaka nida solia noda gauna, kaukaua, kei na ka eda taukena meda qaravi koya kina. Qo ena vakamarautaki Jiova, ni dau ‘vinakati ira na dausolika ena marau.’—2 Kor. 9:7.