O Rawa ni Vakuai Iko ena Vuku ni Matanitu ni Kalou?

1. Na cava soti era dau vakuai ira kina e levu, na vuna?

ERA dau tu vakarau na tamata mera vakuai ira ena veika e bibi vei ira. O ira na itubutubu era dau vakayagataka nodra gauna, nodra ilavo kei na nodra igu ena veika e baleti luvedra. Ni vakatauvatani kei ira na gone era qito me ka ga ni marau, eso tale na gone era tereni vakaukaua me vica vata na aua e veisiga nira vinakata mera matataka nodra vanua ina Olympic. O Jisu tale ga e vakuai koya ena veika e bibi vua. E sega ni qara na bula vutuniyau, e sega tale ga ni vakaluveni. E vakatulewataka ga me vakaliuca na vakatetei ni Matanitu ni Kalou. (Maciu 4:17; Luke 9:58) O ira tale ga na nona imuri era vakuai ira vakalevu me rawa nira tokona na Matanitu ni Kalou. E bibi duadua vei ira na vakatetei ni Matanitu ni Kalou, ra qai vakuai ira mera tokona kina vakalevu. (Maciu 4:​18-22; 19:27) E vinaka meda taroga, ‘Na cava e bibi duadua ena noqu bula?’

2. (a) Na cava eso na ka bibi meda vakuai keda kina na lotu vaKarisito dina? (b) Na cava eso tale na cakacaka era vakaitavi kina na tacida?

² E bibi vei keda na lotu vaKarisito meda dau vakuai keda ena so na ka. Qori ena vukei keda meda veiwekani voleka tiko ga kei Jiova. Na noda vakuai keda e okati kina noda vakayagataka noda gauna kei na noda sasaga ena masu, wili iVolatabu, sokalou vakavuvale, tiko ena soqoni, kei na cakacaka vakavunau.a (Josua 1:8; Maciu 28:​19, 20; Iper. 10:​24, 25) E toso totolo na cakacaka vakavunau ena vuku ni noda sasaga kei na veivakalougatataki i Jiova, e levu tale ga era se tabili tiko ga ena “ulu-ni-vanua ni vale i Jiova.” (Aisea 2:2) E levu era tokona na Matanitu ni Kalou ena nodra vakuai ira mera veiqaravi e Peceli, mera veivuke ena tara Vale ni Soqoni kei na Assembly Hall, mera tuvanaka na veika e vauca na soqo lelevu se veivuke ena cakacaka ni vakacoko ni yaco na leqa tubukoso. E dina ni sega ni vakaroti keda o Jiova meda vakaitavi ena cakacaka qori meda rawata kina na bula, ia era bibi ena kena tokoni na Matanitu ni Kalou.

3. (a) Ena yaga vakacava na noda vakuai keda ena veika e vauca na Matanitu ni Kalou? (b) Na taro cava meda taroga?

³ Sa qai bibi ga vakalevu nikua na kena tokoni na Matanitu ni Kalou. Eda marau nida raica na nodra yalorawarawa e levu mera vakuai ira ena veika me baleti Jiova. (Wilika Same 54:6.) E dau vakamarautaki keda na yalo ni solika va qori nida waraka tiko na Matanitu ni Kalou. (Vkru. 16:15; Caka. 20:35) E bibi gona meda dikevi keda. Vakacava e tiko eso tale na ka eda rawa ni vakuai keda kina ena vuku ni Matanitu ni Kalou? Eda vakayagataka tiko vakacava noda gauna, ilavo, igu kei na noda taledi? Na cava meda nanuma tiko nida vakauai keda ena so na ka? Meda veivosakitaka mada na ka eda rawa ni vulica ena so na ivakaraitaki ni isoro e sega ni lavaki. Ena vukei keda qori meda marau kina vakalevu.

VAKACABOISORO E ISIRELI MAKAWA

4. E yaga vakacava vei ira na Isireli na vakacaboisoro?

⁴ E dau caka e Isireli makawa na vakacaboisoro me vosoti kina na valavala ca. E bibi dina qori me vakadonui ira kina o Jiova. Eso na isoro qori e vakaroti sara ga mera cabora, eso tale e vakatau ina tamata yadua. (Vunau 23:​37, 38) E rawa ni cabori na isorokama me isolisoli e cautaka e dua se nona iloloma vei Jiova. E dua na ivakaraitaki vakasakiti ni vakacaboisoro a vakayacori ena gauna a vakatabui kina na valenisoro ena gauna i Solomoni.​—2 Vei. 7:​4-6.

5. Na ituvatuva cava e vakarautaka o Jiova vei ira na dravudravua?

⁵ E yalololoma o Jiova, e kila ni na sega ni tautauvata na ka era solia ni laurai vata kei na kedra ituvaki. E lavaki ena lawa ni Kalou me vakadavei na dra ni manumanu, me “iyaloyalo ga ni ka vinaka kece ena yaco mai” ena vuku i Luvena o Jisu. (Iper. 10:​1-4) Ia e yalorawarawa o Jiova ena muri ni lawa qori. Kena ivakaraitaki, ena ciqoma na Kalou na soqe ke sega ni rawa ni vakarautaki na sipi se bulumakau. Qori ena rawa kina vei ira na dravudravua mera marautaka na nodra vakacaboisoro vei Jiova. (Vunau 1:​3, 10, 14; 5:7) Ena rairai duidui na manumanu era cabori, ia e rua na ka e vinakati vei ira na cabora na isoro e sega ni lavaki.

6. Na cava ena vinakati vei ira era vakacaboisoro, cava e bibi kina me muri na ituvatuva qori?

⁶ Kena imatai, ena vinakati vua e vakacaboisoro me solia na ka vinaka duadua. A tukuna o Jiova ina matanitu o Isireli ni dodonu me vinaka na isoro era vakacabora me rawa nira “vinakati kina.” (Vunau 22:​18-20) Ke dua na tikina e ca ena nodra manumanu, ena sega ni vakadonuya o Jiova na nodra isoro. Kena ikarua, o koya e vakacaboisoro me savasava qai sega ni tauvi duka. Ke sega, ena vinakati me cabora na isoro ni ivalavala ca me rawa ni vinaka nona veiwekani kei Jiova ni bera ni cabora na isoro e sega ni lavaki. (Vunau 5:​5, 6, 15) E bibi dina me vakayacori qori. E vakarota o Jiova ni na muduki tani mai vei ira na tamata ni Kalou o koya e sega ni savasava ke kania na isoro ni veivinakati, e okati kina na isoro e sega ni lavaki. (Vunau 7:​20, 21) Ena yasana adua, ke vinaka nona veiwekani kei na Kalou o koya e vakacaboisoro qai sega ni dua na tikina e ca ena nona isoro, ena marautaka vakalevu nona solika.​—Wilika 1 Veigauna 29:9.

VAKACABOISORO NIKUA

7, 8. (a) Na cava era marautaka o ira na vakuai ira ena vuku ni Matanitu ni Kalou? (b) Na cava eso na ka e tu vei keda eda rawa ni vakayagataka?

⁷ Nikua, e levu era tu vakarau mera vakarabailevutaka nodra veiqaravi vei Jiova, e vakamarautaki koya tale ga qori. Eda na marau nida vukei ira na tacida. E tukuna e dua na tacida ni sega ni vakamacalataka rawa na marau e vakila ena gauna e vakaitavi kina ena tara Vale ni Soqoni kei na nodra vukei o ira na vakaleqai ena leqa tubukoso. E kaya: “Niu raica na nodra marau kei na nodra vakavinavinaka na mataveitacini nira curuma na nodra Vale ni Soqoni vou se nira vukei ni oti e dua na leqa tubukoso, e dau vakainaki sara ga kina na cakacaka kei na sasaga.”

⁸ Nikua, e levu na ka e cakava na isoqosoqo i Jiova me tokoni kina na cakacaka i Jiova. Ena 1904, e vola na tacida o C. T. Russell: “Meda vakadeitaka yadua ni digitaki keda na Turaga meda dauniyau ena noda vakayagataka noda gauna, noda dau veivakauqeti, ilavo kei na so tale, da qai vakayagataka vinaka na noda taledi qori me vakacaucautaki kina na noda Turaga.” Eda na rairai vakuai keda meda vakacaboisoro vei Jiova, ia eda na vakalougatataki kina vakalevu. (2 Sam. 24:​21-24) Vakacava e rawa nida vakayagataka vinaka na veika e tu vei keda?

9. Na cava eda vulica ena ivakaro i Jisu ena Luke 10:​2-4 me baleta na vakayagataki ni gauna?

⁹ Noda gauna. Dua na ka na levu ni gauna kei na sasaga e caka me vakadewataki qai tabaki na noda ivola, me tara na vale ni soqoni, tuvanaki na soqo lelevu, veivuke ena leqa tubukoso, kei na kena vakayacori e levu tale na itavi bibi. E lekaleka ga e dua na siga, e tukuna gona o Jisu e dua na ivakavuvuli me vukei keda. Ni talai ratou na nona tisaipeli me ratou vunau, a tukuna me ratou kua ni “kidavaka e dua e gaunisala, [me ratou] kua ni mokota.” (Luke 10:​2-4) Na cava e tauca kina o Jisu na ivakaro qori? E tukuna e dua na vuku ni iVolatabu: “Na nodra dau veikidavaki na kai Natuicake e duidui sara vei keda, nida cuva ga vakalailai, se lululu, ia [era] dau veimoko, era cuva, era tekicuva se davo sara ga ena qele. Na ka kece qo e kania vakalevu na gauna.” A sega ni uqeti ira tiko nona imuri o Jisu mera kua ni veikauaitaki. E vukei ira tiko ga mera raica ni vakaiyalayala ga na gauna e tu vei ira, ena vinakati kina mera vakayagataka vinaka me vakayacori kina na cakacaka bibi sara. (Efeso 5:16) Vakacava e rawa nida muria na ivakavuvuli qori me rawa ni levu na gauna meda tokona kina na cakacaka ni Matanitu ni Kalou?

10, 11. (a) E vakayagataki vakacava na noda cau me baleta na cakacaka e vuravura raraba? (b) Na ivakavuvuli cava ena 1 Korinica 16:​1, 2 e rawa ni vukei keda?

¹⁰ Noda ilavo. E vinakati na ilavo me tokoni kina na cakacaka e vauca na Matanitu ni Kalou. E veiyabaki e vakayagataki e rauta ni tini vakacaca na milioni na dola me baleti ira na ivakatawa dauveilakoyaki, painia lavotaki, kei ira na daukaulotu. Me tekivu mai na 1999, sa tara e sivia na 24,500 na Vale ni Soqoni ena veivanua e se vakatorocaketaki tiko. Ia e se vinakati me tara tale e rauta ni 6,400 na Vale ni Soqoni. Ena veivula, rauta ni 100 na milioni na ilavelave ni Vale ni Vakatawa kei na Yadra! era tabaki. E rawa kece qori ena nomuni cau vakailavo.

¹¹ E vakarautaka na yapositolo o Paula na ivakavuvuli meda muria nida cau. (Wilika 1 Korinica 16:​1, 2.) A uqeti vakalou me vakayaloqaqataki ira na tacina vakayalo e Korinica mera kua ni waraka sara me cava e dua na macawa mera qai raica se cava e vo, ia mera biuta vakatikitiki na ilavo ena itekivu ni macawa qai vakatau ena ka era rawata. Me vaka ga ena imatai ni senitiuri, era sa lalawataka rawa tu na tacida ena gauna qo na ka mera cautaka me vakatau ena kedra ituvaki. (Luke 21:​1-4; Caka. 4:​32-35) E talei vei Jiova na yalo ni solika va qori.

12, 13. Na cava e rawa ni vakavuna mera sega kina ni solia nodra igu taucoko se taledi eso, ia ena vukei ira vakacava o Jiova?

¹² Noda igu kei na taledi. Nida vakayagataka na noda igu kei na noda taledi ena vuku ni Matanitu ni Kalou, ena tokoni keda o Jiova. E yalataka ni na vukei keda meda kua ni malumalumu. (Aisea 40:​29-31) Vakacava eda dau nanuma ni sega ni yaga na kila se na taledi e tiko vei keda me tokoni kina na cakacaka ni Matanitu ni Kalou? Eda dau nanuma ni tiko eso tale era na qarava vinaka na itavi e lesi vei keda? Nanuma tiko o Jiova e rawa ni vakavinakataka na noda taledi, me vaka ga a cakava vei Pisalieli kei Aoliapi.​—Lako 31:​1-6; raica na imatai ni iyaloyalo.

¹³ E vinakata o Jiova meda solia na noda vinaka taucoko, me kua tale ga ni dua na ka e tarova qori. (Vkai. 3:27) Ena gauna sa tara tale kina na valenisoro e Jerusalemi, a tukuna o Jiova vei ira na Jiu mera vakasamataka vakabibi na ka era sa cakava tiko ena kena tokoni na cakacaka. (Akeai 1:​2-5) Era sa vakawelei ra qai sega ni raica vakabibi na cakacaka e lesi vei ira. E vinaka gona meda dikeva ke salavata tiko kei na loma ni Kalou na ka eda vakaliuca. Vakacava eda rawa ni ‘vakananuma na noda ivalavala’ me rawa nida vakaitavi vakalevu ena cakacaka ni Matanitu ni Kalou ena iotioti ni veisiga qo?

VAKUAI KEDA ME VAKATAU ENA KA EDA RAWATA

14, 15. (a) E uqeti keda vakacava na nodra ivakaraitaki na tacida ena veivanua era sega ni rawati ira? (b) Na cava meda cakava?

¹⁴ Levu era vakaitikotiko ena vanua e dredre kina na bula se takalevu kina na bula dravudravua. E dau veivuke na isoqosoqo me “vakalevutaka” na ka e lailai vei ira na tacida era bula ena veivanua qori. (2 Kor. 8:14) Ia o ira mada ga na tacida era sega ni rawati ira era raica vakabibi na solika. E taleitaka dina o Jiova nira solika ena marau na dravudravua.​—2 Kor. 9:7.

¹⁵ Ena dua na vanua e Aferika, era dravudravua vakalevu na lewena, eso na tacida ena vanua qori era tea e dua na iwase ni nodra were ra qai volitaka na veika e rawa mai kina me tokoni kina na Matanitu ni Kalou. Ena vanua tiko ga oya, era via veivuke na mataveitacini ena tara ni nodra Vale ni Soqoni. Ia na cakacaka qori ena vakayacori tiko ena gauna ni teitei. Nira via veivuke dina na mataveitacini, era cakacaka ena Vale ni Soqoni ena siga ra qai lai teitei ena yakavi. E tu dina vei ira na yalo ni vakuai ira! Eda lai nanumi ira kina na tacida e Masitonia ena imatai ni senitiuri. Era “dravudravua sara,” ia era kerea mera veivuke ena itavi dokai e vakayacori tiko. (2 Kor. 8:​1-4) Meda ‘solia yadua mada ga na ka e lakovata kei na veivakalougatataki i Jiova vei keda.’​—Wilika Vakarua 16:17.

16. Eda na vakadeitaka vakacava ni na ciqoma o Jiova na noda isoro?

¹⁶ Ia e dua na ka meda qaqarauni kina. Me vakataki ira na Isireli makawa, meda vakadeitaka ni na vakadonuya na Kalou na isoro eda cabora vua. E bibi meda dau veiraurautaka na ka, meda qarava kina na itavi bibi e vauca noda vuvale kei na noda sokalou vei Jiova. Ke da solia noda gauna kei na noda iyau ena vukudra na so tale, e sega ni kena ibalebale meda vakaweleweletaka na nodra bula vakayago, vakayalo tale ga na noda vuvale. E vaka ga eda solia tiko na ka e sega ni tu vei keda. (Wilika 2 Korinica 8:12.) E dodonu tale ga me dei tiko na noda bula vakayalo, me rawa nida vakadonui tiko ga kina. (1 Kor. 9:​26, 27) Meda nanuma tiko, ni gauna eda muria kina na ivakatagedegede vakaivolatabu, ena veivakacegui qai marautaki vakalevu na noda isoro, ena ‘ciqoma vakalevu’ o Jiova.

TALEI NA NODA ISORO

17, 18. Na cava o nanuma me baleti ira era vakuai ira ena veika e vauca na Matanitu ni Kalou, na cava e dodonu meda vakasamataka kece?

¹⁷ Levu na tacida era ‘vaka na isoro waini e liviraki’ ena nodra tokona na cakacaka bibi e vauca na Matanitu ni Kalou. (Fpai. 2:17) Eda vakavinavinakataki ira dina o ira era vakaraitaka na yalo ni solika va qori. Eda vakavinavinakataka tale ga na nodra yalovinaka kei na nodra vakuai ira na nodra lewenivuvale na tacida era liutaka na cakacaka e vauca na Matanitu ni Kalou.

¹⁸ Levu dina na cakacaka e vinakati meda tokona kina na veika e vauca na Matanitu ni Kalou. Meda masulaka mada ga da qai vakasamataka kece na sala eda rawa ni vakaitavi kina vakalevu, me vakatau ena keda ituvaki. Meda nuidei nida na vakalougatataki vakalevu ena gauna qo, qai vakalevu sara “ena gauna se bera mai.”​—Mari. 10:​28-30.