O Yalomatua Li?

ENA nona digitaki ira o Mosese na dauveilewai e Isireli, a “vakasaqara eso na tamata vuku, ka yalomatua, ka kilai.” (Vakarua 1:​13) E sega ni gadrevi wale ga na kilai ni ka o koya e dau salavata mai kei na nona bula dede e dua. Erau ka bibi tale ga na vuku kei na yalomatua.

E kilai na tamata yalomatua ena vinaka ni nona lewa vakamatau na ka e tukuna kei na nona ivalavala. E kaya na Webster’s Ninth New Collegiate Dictionary, ni tamata yalomatua ena “rawa ni vakaraitaki koya ni dau galu ena kena gauna veiganiti.” E dina ni tiko na “siga me vosa kina” kei “na siga me tiko lo kina,” e kila vinaka na tamata yalomatua na gauna me rau dui vakayagataki kina. (Dauvunau 3:7) E vinaka meda dau galu ga ena so na gauna, ni kaya na iVolatabu: “Ni sa levu na vosa ena sega ni yali na ka ca: ia ko koya sa tarova na tebenigusuna sa vuku.”​—Vosa Vakaibalebale 10:19.

Era qarauna tale ga na lotu Vakarisito mera yalomatua ena nodra bula veimaliwai vakataki ira. Dau vakavuqa ni o koya e dau vosa vakalevu se kaukaua taudua na gusuna e sega ni o koya na tamata dokai se nuitaki taudua. Vakasamataka ni o Mosese e “tamata kaukauwa e na vosa,” ia e sega ni rawa ni liutaka vinaka na matanitu o Isireli me yacova ni sa vakatovotovotaka rawa na vosota, na yalomalumalumu kei na lewa matau. (Cakacaka 7:​22, VV) O koya gona, e dodonu mera yalomalumalumu o ira era veiliutaki ni gadrevi mera taukena na yalo e dau vakamasuti rawarawa.​—Vosa Vakaibalebale 11:2.

O ira e vakataqara vei ira o Jisu Karisito mera lewa “na veika kece e tu vua” era vakatokai ena Vosa ni Kalou mera “yalo dina ka vuku [se, “yalomatua,” NW].” (Maciu 24:​45-​47, VV, neitou na matanivola kala.) Era sega ni viavialevu ena nodra via vakilakila e liu na ka ena nodra dui nanuma ga vakataki ira, me vaka beka nira vuku cake mai vei Jiova; se mera vakabebe tu ga ni sa vakamatatataki na inaki ni Kalou ena dua na ka. Ia, era kila vinaka na gauna mera vosa kina kei na gauna mera waraka galugalu kina na ivakamacala veiganiti. Ena vinaka vei ira kece na lotu Vakarisito mera vakatotomuria na nodra vakabauta me rawa nira yalomatua kina me vakataki ira na ilawalawa e vaka e le dua na dauveiqaravi.​—Iperiu 13:7.