Saga mo Tara na Lomadra na Vakarorogo

E MACALA ni bibi mo vakaitavi ena cakacaka vakavunau, ia e bibi sara mo saga me tara na lomadra na vakarogoci iko na nomu itukutuku. Ni cavuta na iVolatabu na loma ni tamata, e dau vakaibalebaletaka oya ina ka e sega ni laurai—e okati e ke na noda vakasama, vakanananu, kei na ka eda vakabauta dina. Ke vu dina mai lomada na ka eda cakava eda na sega ni cakava vakarairai wale ga. Sa rauta me kaya na iVolatabu ni lomada sara ga e kaburaki kina na sore ni ka dina. (Maciu 13:19) Na lomada tale ga oqo e dodonu me vu mai kina noda talairawarawa vua na Kalou.—Vkai. 3:1; Roma 6:17.

Me rawa ni tara sara na loma i koya e rogoci iko na nomu veivakavulici, oqo e vica na ka mo cakava: (1) Mo yalomatua; vakasamataka se cava sara mada e sa lewa tu na nona vakasama kei na nona vakanananu. (2) Vakadreti koya me vakatitobutaka nona lomana na Kalou kei na nona dokai koya. (3) Vukei koya me dikevi koya vakavinaka, de dua ena liaca kina ni vinakati vua e so na veisau me salavata kei na loma i Jiova.

Yalomatua. E duidui na vuna era se sega kina ni ciqoma na dina e so. Ni o vakavulici koya tiko nomu vuli iVolatabu, tovolea mo cavuraka laivi na vakasama cala e sa vakawakana tu vua, mo qai sosomitaka ena ivakavuvuli dina kei na kedra ivakadinadina. Vakasamataka e so na taro vaka oqo: ‘E kila beka o koya ni dodonu meda dau kauaitaka noda bula vakayalo? Na ka dina cava soti e sa vakabauta rawa tu? Na cava e so na ka e se lecava? E lai vakabauta tu vakacava e so na ivakavuvuli? E tiko beka e so na ka e dau malele kina na lomana e rawa ni vakataotaka tiko nona toso vakayalo kei na nona bulataka na ka e sa vulica?’

E sega ni ka rawarawa meda kila se lai vakabauta tu vakacava e so na ivakavuvuli. “Sa wai titobu na lewa e na loma ni tamata,” e kaya na Vosa Vakaibalebale 20:5, “ia na tamata vuku [se, “tamata yalomatua,” NW] ena takiva mai.” Na tamata yalomatua ena rawa ni kila na ka e sega ni laurai. Oqo ena vinakati kina na kauai, vakarorogo, kei na veinanumi.

Ni drau veivosakitaka kei nomu gonevuli e dua na ivakavuvuli vakaivolatabu kua ni kauaitaka wale ga na vosa e cavuta. Kauaitaka tale ga na veisau ni irairai ni matana kei na irogorogo ni domona. Ke o itubutubu, o na kila ni veiveisau o raica vei luvemu e ivakatakilakila ni veika e sa yaco tiko ena nona bula. Kua gona ni vakalecalecava na ivakatakilakila vaka oqo baleta nira sa tukuna sara tiko ga na ka e tiko e lomana.

Rawa ni o takiva mai na ka e tu e lomana e dua ke o vakasamataka vinaka na taro mo taroga. Rawa mo taroga: “Cava o nanuma me baleta na . . . ?” “O kila vakacava ni . . . ?” “Cava o na cakava ke . . . ?” Kua ga ni sivia tale na ka o vakataroga de nanuma ni o sa vaka tale na ovisa. Rawa ni o biuta vakamatau nomu taro me vaka beka oqo, “Vosoti au, rawa niu taro mada . . . ?” Sega ni ka rawarawa noda saga meda kila na ka e tu e lomana e dua, e taura na gauna. Vakalevu me tiko rawa na veivakabauti ni bera ni qai rawa vua e dua me talaucaka na lomana. Ia, se vinakati tiko ga na qaqarauni me kua ni nanuma kina o koya o vakataroga ni o sa taroga tiko e so na ka e sega ni nomu bisinisi.—1 Pita 4:15, VV.

E vinakati tale ga na yalomatua mo kua kina ni vakacala vakatotolo na ka o rogoca. Nanuma tiko ni nomu inaki mo kila na ka e vakabauta nomu gonevuli mo rawa kina ni vakadeitaka na tikina mai na iVolatabu mo vakamacalataka vua me vakauqeti koya. Kua sara ni totolo mo vakacala nona ivakamacala. Saga ga mo kila na ivakarau ni yalo e tiko e daku ni veivosa e cavuti oya. O na qai kila kina se mo sauma vakacava; ni kila o gonevuli ni kauaitaki, sa na rawa tale ga ni vakatudaliga matua ina ka o na tukuna.—Vkai. 16:23.

Ni o vosa mada ga ina dua na ilawalawa, se rawa ga ni o uqeti ira na lewe ni ilawalawa yadua. E vakatau oqo ena nomu vakaraici ira vinaka tiko, o kauaitaka na irairai ni matadra, o dau taroga tale ga na taro vakavure vakasama mo kila kina se ra raica vakacava na ka o tukuna. Ke o kilai ira vinaka na vakarogoci iko, o na kauaitaka tale ga na ka e baleti ira kei na kedra ituvaki. Kauaitaka na nodra rai raraba na lewe ni ivavakoso ni o vakamacalataka tiko vei ira na Vosa ni Kalou.—Kala. 6:18.

Veivakadreti. Ena qai rawarawa sara nomu kila na ka mo tukuna ni o sa kila rawa na ka e vakabauta o koya o vosa tiko vua, na ka e sega ni vakabauta, kei na vuna e sega ni vakabauta kina. A tara sara ga na lomadra na vakarogoci koya o Jisu ni vakaturi oti ena nona ‘serelaka vei ira na iVolatabu,’ me salavata kei na ka e se qai yaco oti ga. (Luke 24:32, VV) Dodonu mo sema vinaka tale ga o iko na ka e sa sotava mai e dua, ka e diva, kei na ka e sa raica tiko ena Vosa ni Kalou. O na kila ni sa tara na loma i koya o vakavulica na ka e vulica ke vakadinata ni “Qo sara ga na KA DINA!”

Ni o vakabibitaka na vinaka i Jiova, nona loloma, nona yalovinaka, kei na dodonu ni nona ivalavala, o sa vukei ira tiko na vakarorogo mera vakatitobutaka nodra lomana na Kalou. Ni o taura na gauna mo vakaraitaka vei ira na itovo vinaka e raica vei ira na Kalou, o sa solia tiko vei ira na vuna mera vakabauta kina ni rawa nira veivolekati kei koya. O na vakayacora rawa oqo ena nomu veivosakitaka e so na tikinivolatabu me vaka na Same 139:1-3, Luke 21:1-4, kei na Joni 6:44, kei na nomu vukei ira mera raica na titobu ni nona kauaitaki ira nona tamata o Jiova, kei na nona volekati ira nona itokani yalodina. (Roma 8:38, 39) Vakaraitaka ni o Jiova e sega ni raica wale tiko ga na cala eda cakava, e raica na ivakarau taucoko ni noda bula, noda yalogu ena sokalou savasava, kei na noda vakamareqeta na yacana. (2 Vei. 19:2, 3; Iper. 6:10) E nanuma na veika matailalai baleti keda, ena vakatubuqoroqoro tale ga nona na vakabulai ira lesu tale mai “ko ira kecega e nai bulubulu [“nanumi,” NW].” (Joni 5:28, 29; Luke 12:6, 7) A buli na tamata me ucuya na Kalou, o koya gona, na veivosakitaki ni itovo ni Kalou ena rawa ni tara sara ga na loma i koya e rogoci keda.—Vkte. 1:27.

Ena rawa tale ga ni tarai na lomana e dua ena gauna e sa vulica rawa kina me dau raici ira na tani mai na rai i Jiova. Na noda Kalou e kauaitaki keda yadua, e kauaitaki ira yadua tale ga na tani, veitalia se ituvaki vakacava era susu mai kina, matanitu cava era lewena, se ra kai vei. (Caka. 10:34, 35, VV) Ni kila rawa e dua na ka dina oqo, sa na dua na yavu vinaka vakaivolatabu me cavuraka tani kina mai lomana na veicati kei na veivakaduiduitaki. Oqo ena vukei koya me veimaliwai vinaka kei na tamata kece ga me salavata kei na nona vulica na loma ni Kalou.

Na rere dina e dua tale na ka mo saga mo bucina vei ira o vakavulica. (Same 111:10; Vkta. 14:6, 7) Nona dokai na Kalou se nona rerevaki dina ena rawa ni vakaukauataka e dua me rawata na ka ena sega ni rawata ena nona kaukaua ga. Nida veivosakitaka vata kei ira na so na veika vakarerevaki e dau cakava o Jiova, vaka kina na levu ni nona dau loloma, eda sa vukei ira tiko kina mera rerevaki Jiova dina, mera sega ni vinakata mera vakacudrui koya.—Same 66:5; Jere. 32:40.

Saga mera kila na vakarogoci iko ni bibi dina vei Jiova na ka era cakava. Ena vakila o Jiova na ka eda cakava, e rawa ni vakararawataki koya se vakamarautaki koya. (Same 78:40-42) Vakaraitaka vei ira ni nodra ivalavala e rawa ni sauma sara ga kina na Kalou na vosa ni bolebole i Setani.—Vkai. 27:11.

Vakaraitaka vei ira na vakarorogo nira na vakila na yaga ni nodra cakava na ka e vinakata na Kalou. (Aisea 48:17) O rawa ni cakava oqo ena nomu dusia na leqa kei na rarawa ena sotava e dua ni sega ni muria na ivakasala ni Kalou ena dua mada ga na gauna lekaleka. Vakaraitaka ni ivalavala ca e vakayawaki keda vua na Kalou, e kauta laivi tale ga na nodra dodonu na tani mera vulica vei keda na ka dina. (1 Ces. 4:6, NW) Vakaraitaka vei ira na vakarorogo ni dodonu mera marautaka na ka ni veivakalougatataki era sa sotava oti ena vuku ni nodra muria na lawa ni Kalou. Vukei ira mera raica ni nodra cakava tiko na loma i Jiova e ka marautaki baleta nira sega ni sotava kina na veika rarawa era sotava e levu nikua. Ni raica rawa e dua na vinaka ni nona cakava na ka e vinakata na Kalou, ena sega sara ga ni qai via cakava e dua na ka ena sega ni taleitaka. (Same 119:104) Ena sega ni ka ni vakacauoca vua nona talairawarawa, ia ena okata na nona talairawarawa me sala e vakaraitaka kina nona lomani Jiova sara ga.

Vukei Ira na Vakarorogo Mera Dikevi Ira. Me rawa ni dua e tubu tiko ga vakayalo, e bibi me kauaitaka na lomana. Vakamacalataka se na vukei keda vakacava ena tikina oqo na iVolatabu.

Vukei koya e rogoci iko me kila ni iVolatabu e sega ni lewena wale ga na ivunau, ivakasala, itukutuku makawa, kei na parofisai. E vakatakilai tale ga kina na vakasama ni Kalou. E tukuni ena Jemesa 1:22-25 (VV) ni Vosa ni Kalou e vaka na iloilo. O koya gona, na noda ciqoma se sega na ka e tukuna o Jiova kei na sala e dau vakayacora kina na lomana e sa vakaraitaka votu na ituvaki ni lomada. Sa na vakaraitaka tale ga se raici keda vakacava na Kalou baleta ni dau “vakatovolea na yalo [se, “loma ni tamata,” NW]” o koya. (Vkai. 17:3) Vakadreti ira na rogoci iko mera nanuma tiko oqo. Uqeti ira mera vakasamataka na itukutuku e vakarautaka mai vei keda na Kalou ena iVolatabu, kei na veisau ena kilikili mera vakayacora me rawa nira vakamarautaki koya cake kina vakalevu. Vukei ira mera raica ni wili iVolatabu e dua na sala e “vakalewa rawa” kina o Jiova “na nanuma kei na i naki ni lomadra na tamata” me rawa kina nira vakamalumalumutaki ira ni vinakati mera vakayacora e so na veisau ena nodra bula.—Iper. 4:12, VV; Roma 15:4.

E so na vuli iVolatabu era dau via bulataka sara ga na ka era vulica; ia e tarovi ira voli na nodra leqataka tale tiko na ka era nanuma e so. Era se valuta tale tiko beka ga e so na gagadre vakayago. Se ra butubuturua voli, era via qarava na Kalou, ena dua tale na yasana era via kubeta tiko ga e so na itovo vakavuravura. Vakaraitaka vakadodonu na ca ni butubuturua. (1 Tui 18:21) Uqeti ira mera masuta na Kalou me dikeva na lomadra, me vakasavasavataka tale ga.—Same 26:2; 139:23, 24.

Vakaraitaka vei ira ni sega ni lecava o Jiova na nodra sasaga, ni tukuni tale ga ena iVolatabu na ituvaki era sotava tiko. (Roma 7:22, 23) Vukei ira mera qaqarauni mera kua ni vakalaiva na lomadra ivalavala ca me lewai ira.—Vkai. 3:5, 6; 28:26; Jere. 17:9, 10.

Uqeti koya e rogoci iko tiko me dikeva na vuna e dau cakava kina e so na ka. Vakavulici koya me dau dikevi koya ena so na taro vaka oqo: ‘Na cava meu cakava kina qo? Ena vakaraitaka beka vei Jiova na ka au cakava qo niu vakavinavinakataka dina na ka kece e sa cakava ena vukuqu?’ Vakadeitaki gonevuli me kila ni veivakadonui i Jiova e iyau talei duadua e rawa ni dua e taukena.

Vukei ira na rogoci iko mera kila na ibalebale ni nodra qaravi Jiova ‘ena lomadra taucoko.’ (Luke 10:27) Kena ibalebale oqo ni nodra rai, nanuma, kei na nodra gagadre e dodonu me salasalavata kei na ka e vinakata o Jiova. O koya gona, vakavulici ira na rogoci iko mera kua ni kauaitaka wale ga na ka era cakava, mera kauaitaka tale ga na ka era nanuma me baleta na ka e vinakata na Kalou, kei na nodra inaki ena nodra qaravi koya. (Same 37:4) Nira liaca na nomu gonevuli e so na vanua e dodonu mera vakavinakataka, vakauqeti ira mera dau masuti Jiova: “Ni vakaduataka na lomaqu me rerevaka na yacamuni.”—Same 86:11.

Ni dua na gonevuli e sa tauyavutaka rawa nona veiwekani kei Jiova, sa na sega tale ni gadrevi mo uqeti koya me talairawarawa vua, nona vakabauta ga e sa na uqeti koya. O koya ga vakataki koya e sa na “tovolea sara” me “kila na ka e vinakata na Turaga.” (Efeso 5:10, VV; Fpai. 2:12) Oqo na mataqali talairawarawa e vinakata o Jiova.—Vkai. 23:15.

Nanuma tiko ni o Jiova e dikeva na loma ni tamata yadua, o koya ga ena vakayarayarataki ira na tamata vua. (Vkai. 21:2; Joni 6:44) O keda eda cakacakavata ga kei koya. (1 Kor. 3:9) E vakayagataka wale ga o koya na gusuda me veivakamasuti kina. (2 Kor. 5:20; Caka. 16:14) O Jiova e sega ni vakasaurarataka e dua me ciqoma na ka dina, ia nida vakayagataka na iVolatabu, e rawa ni uqeta na lomadra na vakarorogo mera liaca nira sa rogoca sara tiko ga na isau ni nodra vakatataro—se nodra masu. Dau vakasamataka tiko na veika oqo ena gauna kece o veivakavulici kina, masuta tale ga na veidusimaki i Jiova kei na nona veivuke.—1 Vei. 29:18, 19; Efeso 1:16-18.