Uqeta na Lomadra Eda Vakavulica
1. E vakacava na lomadra na vakarorogo ni veivakavulici o Jisu?
1 O Jisu Karisito e dau uqeta na lomadra na vakarorogo. Dua na gauna, ni vakamacalataka oti na iVolatabu vei ratou na tisaipeli, e ‘uqeti’ sara ga na lomadratou. (Luke 24:32) Ni vu mai lomada noda talairawarawa vua na Kalou, eda na uqeti ira vakacava eda vakavulica me rawa nira cakava na veiveisau ena nodra bula?—Roma 6:17.
2. E yaga vakacava na maqosa kei na yalomatua nida uqeta na lomana e dua?
2 Maqosa Qai Yalomatua: Ke tukuni wale tu ga na ka e dodonu kei na ka e cala, ena sega ni uqeti ira mera veisau. Ke da vakacala tale ga nodra vakabauta ena levu ni tikinivolatabu eda wilika, de dua era na sega ni taleitaka. Me rawa nida uqeta e dua, e bibi na yalomatua meda kila na vuna e vakabauta kina e dua na ivakavuvuli kei na inaki e cakava kina qori. Nida maqosa ni digitaka vinaka na taro vakavure vakasama, ena uqeti koya me talaucaka na lomana. (Vkai. 20:5) Ni caka qori, sa na rawa nida digia na tikinivolatabu e rawa ni tara na lomana. Bibi gona meda dau veikauaitaki da qai yalovosovoso. (Vkai. 25:15) Meda nanuma tiko ni duidui na ivakarau ni nodra toso vakayalo na tamata yadua. Solia na gauna me rawa ni uqeta na yalo tabu i Jiova nona vakasama kei na ka me cakava.—Marika 4:26-29.
3. Eda na uqeti ira vakacava na gonevuli mera bucina na itovo vinaka?
3 Vukei Ira Mera Bucina na iTovo Vinaka: E vakamacalataki ena so na tikinivolatabu na vinaka i Jiova kei na nona loloma. Rawa nida vakayagataka qori meda vukei ira na gonevuli mera bucina na itovo vinaka. Kena ivakaraitaki na Same 139:1-4 se Luke 12:6, 7 e vakamacalataki kina na levu ni nona kauaitaki keda yadua na Kalou. Nira vakavinavinakataka mai vu ni lomadra na loloma soli wale i Jiova, era na lomana na Kalou ra qai via qaravi koya. (Roma 5:6-8; 1 Joni 4:19) Nira mai vulica ni tarai Jiova na nodra ivalavala, ena uqeti ira mera dokai koya ra qai vakacaucautaki koya ena ka kece era cakava.—Same 78:40, 41; Vkai. 23:15.
4. Eda na doka vakacava na nodra vakatulewa o ira eda vakavulica?
4 E sega ni vakasaurarataki keda o Jiova meda muria nona ivakaro. Ia e uqeti keda yadua meda raica na vinaka ni kena muri na nona ivakasala. (Aisea 48:17, 18) Eda vakatotomuria na iwalewale ni veivakavulici i Jiova me uqeta na lomadra na gonevuli. Nira vakadeitaka ni dodonu mera veisautaka nodra bula, ena yaga tawamudu vei ira. (Roma 12:2) Era na volekati Jiova tale ga ni dau “dikeva na lomada.”—Vkai. 17:3.