Vakavulici Luvemu me Dua na iTalatala

¹E sureti ira na itabagone o Jiova mera vakacaucautaki koya. (Same 148:12, 13) Era na sega gona ni vakavulici ira wale ga na luvedra na itubutubu lotu vaKarisito ena ka dina ena iVolatabu kei na lawa ni Kalou me baleta na itovo savasava. Ia era na vakavulici ira tale ga mera italatala ni itukutuku vinaka. Era na cakava tiko ga vakacava qori?

²iVakaraitaki Vinaka: A tukuna na dauveilewai o Kitioni vei ira na 300 na nona tamata: “Dou raici au mada ka kitaka me vaka ka’u sa kitaka.” (Dvei. 7:17) O ira na gone era dau vakatotomuria ga na ka era raica ni cakava na nodra itubutubu. E dau cakacaka ena bogi e dua na tama, ni suka mai ena mataka ni Vakarauwai ena sega ni dau moce, dina ni wawale ena kauti ratou ga na luvena ena cakacaka vakavunau. E sega ni tukuna e dua na ka, ia eratou sa vulica kina na luvena na bibi ni cakacaka vakavunau. (Maciu 6:​33) Era dau raica na luvemu ni o marautaka mo cakava na veika e vauci ena sokalou me vaka na masu, wili iVolatabu, vakamacala ena soqoni, kei na cakacaka vakavunau? Sa macala tu ga ni na sega ni taucoko na nomu ivakaraitaki. Ia ena rawarawa sara vei ira na luvemu mera muria na veika o vakavulica me baleta na qaravi Jiova ke ra raica ni o dau gumatua ni qaravi koya.​—Vkru. 6:6, 7; Roma 2:21, 22.

³Kotora Eso na iSausau: Era na sega ni cegu na itubutubu ni vakavulici luvedra mera lako, vosa, vakaisulutaki ira ga, kei na vuqa tale. Nira tubu cake tiko ena kotori tale ga vei ira eso na isausau vovou. Ia ke ra lotu vaKarisito na itubutubu, mera vukei luvedra mera tekia ra qai sauva na isausau vakayalo me vakatau ena nodra yabaki kei na ka era kila. (1 Kor. 9:26) O vakavulici luvemu me vakamacala ena nona vosa ga qai vakarautaka vakataki koya na nona itavi ena Koronivuli ni Vuli Vunau? (Same 35:18) O vakavulici koya tale ga me vakaitavi ena basoga kece ni cakacaka vakaitalatala? O kotora na isausau mera papitaiso ra qai cakacaka vakaitalatala vakatabakidua? O dau uqeti ira mera veimaliwai kei ira na daukaulotu gugumatua era na vakayaloqaqataki ira?​—Vkai. 13:20.

⁴E kaya na daunisame: “O ni a vakavulici au, na Kalou, ni’u a gone: Ka yacova na gauna oqo ka’u sa tukuna tiko na nomuni cakacaka e veivakurabuitaki.” (Same 71:17) Mo vakavulica na luvemu ni se gone me dua na italatala. Na yavu vakayalo o vakavulica kina na luvemu ena yaga vua ni sa uabula!​—Vkai. 22:6.

[Taro]

1. Na cava e uqeta na Same 148:12, 13 mera cakava na itubutubu lotu vaKarisito?

2. Ena tarai ira vakacava na gone na nodra ivakaraitaki vinaka na itubutubu?

3. Na isausau vakayalo cava me kotora na itubutubu vei luvedra mera sauva?

4. Ena yaga vakacava vei gone ni vakavulici koya ena cakacaka vakavunau o rau nona itubutubu ni se gone?