E Bula na Vosa i Jiova
Veitikina Bibi Mai na iKatolu kei na iKava ni iWasewase ni iVola na Same
A TAROGA na daunisame ena gauna e masu tiko kina vua na Kalou: “Ena tukuni li na nomuni yalololoma e nai bulubulu? Se na nomuni yalodina e na Rusa?” (Same 88:11) E kena isau na sega. Eda na sega ni rawa ni vakacaucautaki Jiova ke da sega ni bula tiko. Nona vakacaucautaki o Jiova e vuna vinaka meda bula tiko kina, kei na noda bula tiko e vuna vinaka meda vakacaucautaki koya.
Na iKatolu kei na iKava ni iWasewase ni iVola na Same, mai na Same 73 ina 106, e vakamacalataka e levu na vuna vinaka meda dau vakacaucautaki koya kina na Dauveibuli da qai vakavinavinakataka na yacana. Noda vakasamataki ira na same oqori ena titobu kina noda taleitaka “na vosa ni Kalou” qai uqeti keda meda vakalevutaka qai vakavinakataka na noda dau vakacaucautaki koya. (Iperiu 4:12) Eda via dikeva sara ga na ka e kaya na iKatolu ni iWasewase ni iVola na Same.
“E YAGA VEI AU ME’U TORO VUA NA KALOU”
A tuva o Esafa se o ira na lewe ni nona vuvale na imatai ni 11 na same ena ikatolu ni iwasewase. Na iucu ni sere e vakamacalataki kina na ka a taqomaki Esafa me kua ni vakacalai na nona rai. E tini vinaka kina na ka e cakava. “Ia koi au,” e lagata, “e yaga vei au me’u toro vua na Kalou.” (Same 73:28) E tarava yani na Same 74 qai vakavotui kina na osivaki ni kena sa rusa o Jerusalemi. Na Same 75, 76, kei na 77 e vakaraitaki kina ni o Jiova e Turaganilewa yalododonu, e nodra iVakabula na yalomalua, qai Daurogoca na masu. Na Same 78 e railesuvi kina na veika a yaco e Isireli mai na gauna i Mosese me yacovi Tevita. E osivaki ena ika79 ni Same na rusa ni valenisoro. Na Same 80 e masuti kina mera vakabulai na tamata ni Kalou. E veiuqeti na Same 81 mera talairawarawa vei Jiova. Na Same 82 kei na 83 e masuti kina na Kalou me lewai ira na turaganilewa ca kei ira na nona meca.
“Sa guta vakalevu na yaloqu, ia sa mate e na via tiko e na lomanibai i Jiova” e tukuni ena dua na nodra qaqanisere na luve i Kora. (Same 84:2) Na Same 85 e kerei kina na nona veivakalougatataki na Kalou vei ira na sereki mai na tu vakavesu. E vakabibitaki ena same oqo ni uasivi sara na veivakalougatataki vakayalo mai na veivakalougatataki vakayago. Ena Same 86, e kerea kina o Tevita me taqomaki koya na Kalou, me vakavulici koya tale ga. Ena Same 87, a dua kina na sere me baleti Saioni vata kei ira na sucu kina, qai muria yani e dua na masu vei Jiova ena Same 88. E tuva na Same 89 o Icani, e rairai dua vei iratou na va na tamata vuku ena gauna a veiliutaki kina o Solomoni, qai vakabibitaki kina na yalololoma i Jiova kei na nona veiyalayalati kei Tevita.—1 Tui 4:31.
Saumi na Taro Vakaivolatabu:
73:9—E rawa vakacava vei ira na tamata ca mera “vosavakacataka na lomalagi, ka sa lakovi vuravura na yamedra”? O ira na tamata ca era sega ni dau kauaitaka e dua mai lomalagi se e vuravura, dau totolo gona na nodra vosavakacacataka na Kalou. Era kaseti ira tale ga na tamata ena yamedra.
74:13, 14—Na gauna cava e ‘bola kina na uludra na tavuto e lomaniwai, qai bola vakalalai na ulu ni livaiacani’ o Jiova? E vakatokai o “Fero na tui Ijipita,” me “tavuto sa koto e na maliwa ni nona uciwai.” (Isikeli 29:3, NW) Na Livaiacani e rawa ni vakaibalebaletaki vei ira na tamata kaukaua i Fero. Ni bola gona na uludra e rairai vakaibalebaletaki tiko ena druka vakaloloma i Fero kei na nona mataivalu ena gauna e vakabulai ira kina na Isireli o Jiova mai na nodra bobula tu e Ijipita.
75:4, 5, 10—Na cava e vakaibalebaletaki ena vosa “[i]leu”? Dua na iyaragi kaukaua na nodra ileu na manumanu. Koya gona na vosa “[i]leu” e vakatakarakarataka vinaka na kaukaua. O Jiova ga e laveta cake na nodra ileu na nona tamata, qai vakavuna nodra vakacerecerei, ia ena ‘musuka laivi na nodra ileu na tamata ca.’ Eda vakasalataki meda kua ni dau ‘kurea i cake na noda ileu’ meda dokadoka kina se viavialevu. Ni dau veivakacerecerei o Jiova, me raici gona na itavi bibi ena ivavakoso me ilesilesi i Jiova.—Same 75:7.
76:10—E rawa vakacava ni dokai o Jiova ena “cudru ni tamata”? Ena kune e so na ka vinaka ena vuku ni nona vakatara na Kalou mera cudruvi keda na tamata nida nona dauveiqaravi. Na veika dredre cava ga eda sotava kina ena rawa ni ka ni vuli vei keda. E vakatara tu o Jiova meda sotava tiko na veika rarawa, ia me yacova ga na ivakatagedegede eda rawa ni vuli kina. (1 Pita 5:10) ‘Ia na kena vo ni cudru ena vakadaroya na Kalou.’ Vakacava ke tini ena mate noda vakararawataki tiko? Oqo tale ga e rawa ni vakalagilagi kina o Jiova, nira na rawa ni vakacaucautaki Jiova o ira na raica noda vosota ena yalodina.
78:24, 25—Na cava e tukuni kina ni “sila ni lomalagi” na mana qai “kedra na agilose”? Sega ni ibalebale ni rua na matavosa oqori ni mana e kedra kakana na agilosi. Na “sila ni lomalagi” e vakaibalebaletaki tiko ga ena kena vu mai lomalagi. (Same 105:40) Nira vakaitikotiko mai lomalagi na agilosi, na matavosa “na kedra na agilose” e rawa ni kena ibalebale ni a vakarautaka na Kalou, o koya e tiko mai lomalagi. (Same 11:4) A rairai vakayagataki ira na agilosi o Jiova mera vakarautaka na mana vei ira na Isireli.
82:1, 6—O cei era vakatokai mera “kalou” kei ira na “luve i Koya sa Cecere sara”? Na rua na ivosavosa oqori e vakaibalebaletaki tiko vei ira na dauveilewai ni Isireli. E veiganiti oqo nira matataka na Kalou ra qai dau vosa ena vukuna.—Joni 10:33-36.
83:2— Na cava na ibalebale ni “viavialevu” e tukuni tiko e ke? E vakaibalebaletaki tiko ena nodra tu vakarau mera vakaraitaka nodra kaukaua, se mera yavala, vakauasivi nira veitusaqati, vala, se veivakacacani.
Na Ka Eda Vulica:
73:2-5, 18-20, 25, 28. E sega ni dodonu meda vuvutaka nodra rawaka na tamata ca, da kua tale ga ni vakatotomuria na nodra sala tawavakalou. Na nodra sala e titidara, era na tini ‘vakarusai’ ga. Ena maumau wale na noda sasaga meda muduka na itovo ca baleta ni na sega ni vakaoti rawa na itovo ca ena vuku ni nodra se veiliutaki tiko ga na tamata sega ni uasivi. Me vakataki Esafa, e ka vakayalomatua meda na vosota toka mada ga na veika ca nida “toro vua na Kalou” da qai marautaka na veiwekani voleka kei koya.
73:3, 6, 8, 27. Meda qarauni keda mai na dokadoka, viavialevu, veivakalialiai, kei na veivakacalai. Meda na qaqarauni tiko ga kevaka mada ga eda mani rawaka kina.
73:15-17. Ke da se lomalomaruataka tiko e dua na ka, de vinaka meda kua ni vakariri ni tukuna tu e matanalevu na noda nanuma. Ni ‘vosa vaka oqori’ e rawa sara ga ni vakayalolailaitaki ira e so tale. Meda vakasamataka vakamalua na ka e tiko e lomada, da qai saga ni walia ena noda dau vakasosoqoni kei ira eda vakabauta vata.—Vosa Vakaibalebale 18:1.
73:21-24. E vakatauvatani na noda ‘rarawataka’ tiko na nodra rawaka na tamata ca ina nodra ivalavala na manumanu era sega ni vakasama. E dau totolo ga na basika ni rai vaka oqori qai vu tiko ga mai na ka eda vakasamataka. Ia, e dodonu me vakamuai keda na ivakasala i Jiova, da vakadeitaka ni na ‘taura tiko na ligada imatau’ qai tokoni keda. Kena ikuri, ena ‘kauti keda ina vanua vakaiukuuku’ o Jiova meda veiwekani voleka kina kei koya.
77:6. Noda dau kauaitaka mai vu ni lomada na veika dina vakayalo, salavata kei na noda dau vakasaqaqara matua, ena gadrevi kina na gauna meda vuli da qai vakasamataka vakabibi na ka eda vulica. E bibi gona me bau tiko mada ga na gauna galala meda vakayacora kina oya!
79:9. E dau rogoca na noda masu o Jiova, vakauasivi na kena e vakacerecerei tiko kina na yacana.
81:13, 16. E veivakalougatataki na noda dau vakarorogo vei Jiova da qai muria nona sala.—Vosa Vakaibalebale 10:22.
82:2, 5. Na lewa vakatawadodonu sa vakavuna me “yavala kecega [kina] na yavu kei vuravura.” Sega ni vakabekataki nira na tiko yavavala ga na kawatamata ena vuku ni lewa vaka oqori.
84:1-4, 10-12. Era ivakaraitaki vinaka vei keda na daunisame nira dau doka na vale ni sokalou i Jiova, ra lomavakacegu tale ga ena itavi dokai era lesi kina.
86:5. Da vakavinavinaka ni o Jiova e “daulomadonu [“dau veivosoti,” NW]”! E dau vakaraica na ivakadinadina me yavu ni nona vosoti ira na daucakacala era veivutuni.
87:5, 6. Era na kila beka o ira na bula ena parataisi e vuravura na yacadra na vakaturi mera lai bula i lomalagi? E vakaraitaka na rua na tikina oqori ni na rawa ni vaka kina.
88:13, 14. Ni berabera na saumi ni noda masu ni kere veivuke me baleta e dua na leqa, ena rawa ni kena ibalebale ni vinakata sara ga o Jiova meda vakaraitaka noda yalodina ni qaravi koya.
“DOU VAKAMOLIMOLI VUA, KA VOSAVINAKATAKA NA YACANA”
Dikeva mada na vu ni nona vakacaucautaki o Jiova me vaka e laurai ena ikava ni iwasewase ni same. Ena Same 90 e veidutaitaka o Mosese na nona bula tiko na “Tui ni veitaba gauna” kei na lekaleka ni bula ni tamata. (1 Timoci 1:17, VV) Ena Same 91:2, e tukuna o Mosese ni o Jiova e nona ‘idrodro kei na nona bainivalu’—e iVurevure ni nona tiko dei. Na vica tale na same e tarava e vakamacalataki kina na itovo talei i Jiova, na uasivi ni nona vuku, kei na nona cakacaka totoka. E tolu na sere e kedra iucu na matavosa: “Sa lewa ko Jiova.” (Same 93:1; 97:1; 99:1) E tukuni Jiova na daunisame ni Dauveibuli, qai veisureti meda “vakamolimoli vua, ka vosavinakataka na yacana.”—Same 100:4.
Ena vakayacora vakacava na nona itavi e dua na iliuliu e rerevaki Jiova? E saumi na taro oqori ena Same 101, a vola o Tui Tevita. E tukuni ena same e tarava ni o Jiova ena “goleva na nodra masu na luveniyali, ka na sega ni beca na nodra masu.” (Same 102:17) E kune ena ika103 ni Same na yalololoma i Jiova kei na nona yalovinaka. Ni vakamacalataka na levu ni cakacaka ni Kalou e vuravura, e kaya na daunisame: “I Jiova, sa ka levu vakaidina na nomuni cakacaka! Ka sa caka vakavuku kecega.” (Same 104:24) Na iotioti ni rua na sere ena iKava ni iWasewase e baleta tiko na veivakurabuitaki ni cakacaka i Jiova.—Same 105:2, 5; 106:7, 22.
Saumi na Taro Vakaivolatabu:
91:1, 2—Na cava na ‘yasana vuni i koya sa Cecere sara,’ qai rawa vakacava nida “tiko” kina? Oqo e vakatakarakarataka tiko na vanua eda na taqomaki kina vakayalo—e itataqomaki ena veivakacacani vakayalo. E yasana vuni baleta nira sega ni kila o ira na sega ni nuitaka na Kalou. Ena qai yaco ga o Jiova me noda itikotiko ke da nuitaki koya me noda idrodro kei na bainivalu, da vakacaucautaki koya ni Tui Cecere ni lomalagi kei vuravura, da qai vunautaka na itukutuku vinaka ni Matanitu ni Kalou. Eda taqomaki vakayalo nida kila ni o Jiova e dau tu vakarau me vukei keda.—Same 90:1.
92:12—Ena sala cava e “bulabula” kina na yalododonu “me vaka na balabala [“vuniniusawa,” NW]”? E kilai vakalevu na vuniniusawa ena kena dau vuavuaivinaka. Na tamata yalododonu e vaka sara ga na vuniniusawa ni dodonu nona ivalavala vei Jiova qai vuataka na “vua vinaka,” okati kina nona dau cakacaka vinaka.—Maciu 7:17-20.
Na Ka Eda Vulica:
90:7, 8, 13, 14. Ena vakacaraki ga na noda veiwekani kei na Kalou dina nida dau cakacala. Sega ni dua na ivalavala ca me na vunitaki rawa e matana. Ia, kevaka eda veivutuni dina da qai biuta na sala ca, ena ciqomi keda o Jiova, ‘qai vakamamautaki keda ena nona loloma.’
90:10, 12. Ni sa rui lekaleka na bula, e dodonu meda ‘wilika na noda siga.’ Ena sala cava? Ena noda ‘vagolea na lomada ina vuku’ se meda yalomatua me kua ni vakasabusabutaki na siga sa vo, ia meda vakamarautaki Jiova ga. Ena vinakati gona meda vakaliuca ga na veika vakayalo da qai vakayagataka vinaka na noda gauna.—Efeso 5:15, 16; Filipai 1:10.
90:17. E veiganiti meda masuti Jiova me ‘vakataudeitaka na cakacaka ni ligada’ qai vakalougatataka na noda sasaga ena cakacaka vakavunau.
92:14, 15. Nira dau vulica vagumatua na Vosa ni Kalou na sa qase ra qai dau sosoqoni vata kei ira na tamata i Jiova era na “drokadroka ka bulabula” tiko ga—ra kaukaua tale ga vakayalo—ra qai yaga sara vakalevu ena ivavakoso.
94:19. Se mani cava e dau ‘vakaleqa na noda vakanananu’ ena vakaukauataki keda na noda wilika da qai vakasamataka na ka ni ‘veivakacegui’ e tu ena iVolatabu.
95:7, 8. Noda rogoca na ivakasala vakaivolatabu, da vakasamataka, da qai muria sara, ena taqomaki keda mai na noda dau yalokaukaua.—Iperiu 3:7, 8.
106:36, 37. E tukuni ena rua na tikina oqo ni qaravi matakau e tautauvata kei na vakacaboisoro vei ira na tevoro. E vakaraitaka oqo ni o koya e vakayagataka na matakau sa rawa sara ga ni vakamuai koya tiko na tevoro. E uqeti keda kina na iVolatabu: “Maroroi [“taqomaki,” NW] kemudou mai na veimatakau.”—1 Joni 5:21.
“Dou ia Vei Jiova na Vakavinavinaka”!
E tini na iotioti ni tolu na sere ena iKava ni iWasewase ni iVola na Same ena veivakadreti oqo: “Dou ia vei Jiova na vakavinavinaka”! Oqori e iucu tale ga ni iotioti ni same. (Same 104:35; 105:45; 106:1, 48) E volai vakalevu na matavosa “Dou ia vei Jiova na vakavinavinaka” ena iKava ni iWasewase ni same oqo.
Io, sa levu sara ga na vuna vinaka eda rawa kina ni vakacaucautaki Jiova. Eda vulica ena Same 73 ina 106 e levu sara na ka meda vakasamataka, e vakamamautaka na lomada ena noda vakavinavinakataka na Tamada vakalomalagi. Nida vakasamataka na veika kece sa cakava ena vukuda kei na veika ena qai vakayacora ena dua na gauna mai muri, sega li ni uqeti keda oqori meda “vakavinavinaka vei Jiova” ena noda kaukaua taucoko?
[iYaloyalo ena tabana e 10]
Me vakataki Esafa ga, eda rawa ni vosota na veika ca nida “toro vua na Kalou”
[iYaloyalo ena tabana e 11]
Vakadrukai o Fero ena Wasa Damudamu
[iYaloyalo ena tabana e 11]
O kila se cava e tukuni kina ni mana e “kedra na agilose”?
[iYaloyalo ena tabana e 13]
Na cava ena vakacegui keda ni ‘vakaleqai na noda vakanananu’?