‘Kua ni Dau Vosakudrukudru’

“Mo ni kakua ni cakava e dua na ka e na vosa kudrukudru se e na veileti.”​—FILIPAI 2:​14, VV.

1, 2. Na cava a tataunaka o Paula vei ira na lotu Vakarisito mai Filipai kei Korinica, ena vuku ni cava?

ENA ivola i Paula vei ira na lewe ni ivavakoso lotu Vakarisito mai Filipai ena imatai ni senitiuri, a tauca vei ira e levu sara na vosa ni veivakacaucautaki. E vakacaucautaki ira na nona itokani vakayalo ena koro oya ena nodra lomasavu, e vakaraitaka tale ga na nona dau marautaka na ka vinaka era cakava. Ia, e qai tataunaka vei ira o Paula mera “kakua ni cakava e dua na ka e na vosa kudrukudru.” (Filipai 2:​14, VV) Na cava e vaka kina oya na nona itatau?

² E kila o Paula na ka e rawa ni yaco ena vuku ni vosakudrukudru. Ena vica na yabaki yani i muri, a tataunaka mada vei ira mai Korinica mera qarauna na vosakudrukudru ni rawa ni veivakaleqai. E vakaraitaka vei ira o Paula nira a vakacudrui Jiova sara vakalevu na Isireli nira se lako voli ena vanualiwa. Era vakacudrui koya vakacava? Ena nodra galeleta na veika ca, nodra qaravi matakau, veidauci, nodra vakatovolei Jiova, kei na nodra vosakudrukudru. E uqeti ira mai Korinica o Paula mera vuli mai na veika a yaco oya. E vola: “Dou kakua talega ni daudidi [“dau vosakudrukudru,” NW], me vaka era sa didi [“vosakudrukudru”] eso a ra sa vakarusai e na dauveivakarusai.”​​—1 Korinica 10:​6-​11.

3. Na cava meda kauaitaka kina nikua na vosakudrukudru?

³ O keda na dauveiqaravi i Jiova ena gauna oqo eda vakaraitaka tale ga na yalo era a vakaraitaka na lewe ni ivavakoso mai Filipai. Eda gugumatua ena cakacaka vinaka da qai dau veilomani. (Joni 13:​34, 35) Ia, nida vakasamataka na leqa a yaco ena kedra maliwa na tamata ni Kalou ena gauna oya me baleta na vosakudrukudru, sa dodonu meda kauaitaka vakabibi nikua na ivakasala oqo: “Ni kakua ni cakava e dua na ka e na vosa kudrukudru.” Meda dikeva mada e liu e so na ivakaraitaki ni vosakudrukudru e cavuti ena iVolatabu. Oti eda na qai dikeva e so na ka e rawa nida cakava me kua ni yaco kina na vosakudrukudru baleta ni na lai tini ena levu sara na leqa.

Vosakudrukudrutaki Jiova e Dua na iSoqosoqo Ca

4. Na cava era kudruvaka na Isireli ena vanualiwa?

⁴ Na vosa vakaIperiu e kena ibalebale tiko na ‘vosakudrukudru, didi, vosavosa, se lule,’ e vakayagataki vakalevu ena iVolatabu me tukuna na ka e yaco vei ira na Isireli ena 40 na yabaki era tiko voli kina ena vanualiwa. So na gauna era sega ni lomavinaka na Isireli ena ka e sa vakarautaki vei ira, vakavuna sara mera dau vosakudrukudru. Kena ivakaraitaki, ni oti toka ga e vica na macawa nodra vakabulai mai Ijipita, era “didivaki Mosese kei Eroni nai soqosoqo taucoko ni Isireli.” Era didivaka na kedra ena nodra kaya: “E vinaka kevaka keimami a mate e na liga i Jiova mai na vanua ko Ijipita, ni keimami a tiko kei na kuro lewe ni manumanu, ni keimami a kana magiti ka marau kina! ia drau sa kauti keimami mai ki na vanua liwa oqo, me vakamatea nai vavakoso taucoko oqo e na viakana.”​​—Lako Yani 16:​1-3.

5. Era a didi sara tiko mada vei cei na Isireli ena gauna era didi kina?

⁵ E sega sara ga ni dina na nodra didi se na nodra kudru na Isireli. E vakarautaka vakayalololoma o Jiova na ka mera bula kina ena vanualiwa​​—na kakana kei na wai. Sega ni bau leqa na kedra kei na medra na Isireli, se me ririkotaki nodra bula me nanumi kina ni rawa nira mate ena vanualiwa. Ena nodra sega ga ni lomavakacegu, era vakatubutaka kina na ituvaki era sotava voli, ra tekivu vosakudrukudru sara. E dina nira a kudruvaki Mosese kei Eroni, ia vei Jiova, era sa kudruvaki koya sara tiko ga. A kaya o Mosese vei ira na Isireli: “Sa rogoca ko Jiova na nomuni didi kemuni sa didivaki koya kina: ia ko cei koi keirau? a nomuni didi sa sega ni baleti keirau, sa baleti Jiova ga.”​​—Lako Yani 16:​4-8.

6, 7. Me vaka e cavuti ena Tiko Voli Mai na Lekutu 14:​1-3, e veisau vakacava na nodra rai na Isireli?

⁶ Ia, sega ni dede, era se baci vosakudrukudru tale na Isireli. A tala o Mosese e 12 na yamata me ratou lai raica na Vanua Yalataki. Lewe tini eratou kauta lesu mai na itukutuku ca. Cava e qai yaco? “A ra sa didivaki Mosese kei Eroni ko ira kecega na Isireli: a ra sa kaya vei rau nai soqosoqo taucoko, Ulei, na Kalou, E ca ni da a sega ni ciba mai na vanua ko Ijipita! Ulei, na Kalou, sa ca ni da a sega ni ciba e na vanua liwa oqo! Ia ka cava sa kauti keda mai ko Jiova ki na vanua oqo [Kenani], me da bale kina e nai seleiwau, ka me ra vakabobulataki na watida kei na luveda? sa sega li ni vinaka cake me da lesu tale ki Ijipita?”​​—Tiko Voli Mai na Lekutu 14:​1-3.

⁷ Dua na ka na nodra veisau na Isireli! A sega ni tukuni rawa na nodra marau nira sereki mai Ijipita, vaka kina nodra vakabulai mai na Wasa Damudamu, e vakavuna sara ga mera lagata na sere ni veivakacaucautaki vei Jiova. (Lako Yani 15:​1-​21) Ia, e yali vakasauri na nodra marau na tamata ni Kalou ni sa vaka e dredre vei ira na bula ena vanualiwa, ra rerevaki ira tale ga na kai Kenani. Sa ra sega ni qai vakavinavinakataka na Kalou ena galala e solia vei ira, sa ra mai beitaki koya ga nira nanuma ni sa vakuai vei ira e so na ka. Na nodra vosakudrukudru gona e vakaraitaka ni sa yali vei ira na yalo ni vakavinavinaka. Era sa sega ni vakavinavinakataki Jiova ena veika e vakarautaka vei ira. Sa rauta me kaya: “Me vakaevei na kena dede me’u vosoti ira nai soqosoqo ca oqo, era daudidi vei au?”​​—Tiko Voli Mai na Lekutu 14:27; 21:5.

Vosakudrukudru ena iMatai ni Senitiuri

8, 9. Vakamacalataka e so na ivakaraitaki ni vosakudrukudru e volai ena iVolatabu Vakirisi Vakarisito.

⁸ Na ivakaraitaki sa cavuti oti e vauci tiko kina e dua na ilawalawa tamata e vakabauti nira a vakaraitaka votu na nodra sega ni lomavakacegu. Ia, ni tiko voli mai Jerusalemi o Jisu Karisito donuya na Solevu ni Valetabanikau ena 32 S.K., era “vosataki koya lo vakalevu ko ira na tamata.” (Joni 7:​12, 13, 32) Ena nodra veivosaki lo tiko, e so era kaya ni tamata vinaka, e so tale era kaya ni sega.

⁹ Ena dua tale na gauna, a sureti o Jisu kei iratou nona tisaipeli ina vale i Livai, se o Maciu, na daukumuni ivakacavacava. “Era sa qai vosakudrukudrutaki iratou na tisaipeli ko ira na Farisi kei ira na nodra daunilawa, ka ra kaya, ‘A cava ko dou kana ka gunu vata kina kei ira na daukumuni i vakacavacava kei ira na tamata i valavala ca?’ ” (Luke 5:​27-​30, VV) E Kalili, ena dua tale na gauna e muri, era “vosakudrukudrutaki koya ko ira na kai Jutia, ni sa kaya, Oi au na madrai sa lako sobu mai lomalagi.” E so mada ga na imuri i Jisu era a sega ni taleitaka na ka e tukuna, ra mani vosakudrukudru tale ga.​​—Joni 6:​41, 60, 61.

10, 11. Na cava e vu ni nodra vosakudrukudru na Jiu vosa vaKirisi, na cava era vulica na qase ni ivavakoso vakarisito ena gauna oqo me baleta na wali ni vosakudrukudru oya?

¹⁰ Ia, e duatani na vosakudrukudru a yaco ni oti toka ga na Penitiko ni 33 S.K., baleta ni a yaga vakalevu sara ina ivavakoso. Sa ra mai vakila tiko na tisaipeli vou era cavutu mai na taudaku kei Isireli na nodra lomasavu na tacidra vakayalo e Jutia, ia e qai basika e dua na leqa e baleta tiko na wasei vinaka ni ka ni veivuke. E kaya na kena itukutuku ni qai yaco na vosakudrukudru ena gauna oya ena nodra “didi ko ira na vulagi ni veimatanitu tani vei ira na Iperiu, ni sa sega ni nanumi ko ira na nodra yada e na veivota ni yau e na veisiga.”​​—Cakacaka 6:1.

¹¹ O ira na vosakudrukudru oqo e sega ni vakataki ira na Isireli ena vanualiwa. Na nodra kudru na Jiu vosa vaKirisi e sega ni vu mai na nodra nanumi ira ga, se nodra sega ni lomavakacegu ena kedra ituvaki. Era kauaitaka tiko na nodra sega ni vakacegui e so na yada. Kena ikuri, o ira era kudru oqo era sega ni vakatubu ca se lulevaki Jiova. Era vakaraitaka ga vei iratou na yapositolo nodra kauai, ra yavala sara na yapositolo mera vakavinakataka baleta ni tiko na yavu vinaka ni kudru oya. Era ivakaraitaki vinaka dina na yapositolo vei ira na qase ni ivavakoso vakarisito ena gauna oqo! Era qaqarauni tale ga na ivakatawa vakayalo oqo me kua ni ‘tasogo na qara ni daligadra nira tagi na dravudravua.’​​—Vosa Vakaibalebale 21:13; Cakacaka 6:​2-6.

Na Vosakudrukudru e Rawa ni Tini ena Leqa

12, 13. (a) O rawa ni vakatauvatana kei na cava na leqa e rawa ni yaco ena vuku ni vosakudrukudru? (b) Na cava soti e rawa ni vakavuna na vosakudrukudru?

¹² E macala mai na levu na itukutuku ni vosakudrukudru eda sa raica, ni ka oqo e dau vakaleqai ira na tamata ni Kalou ena gauna sa oti. O koya gona, e dodonu meda vakasamataka sara vakabibi na leqa e rawa ni vakavuna ena gauna oqo. De veiganiti me dua mada na kena vosa vakatautauvata. E dau totolo sara na veveka ni kaukamea. Ke sega ni caka e dua na ka ni se qai tekivu veveka, e rawa ni yaco me levu, tini sara me sa sega ni caka rawa kina e dua na ka. Levu na lori era sa sega ni cici e gaunisala nikua, sega ena vuku ni ca ni idini, ena vuku ga ni veveka ni kaukamea, e leqataki kina nodra bula na pasidia. Eda na taurivaka vakacava na vosa vakatautauvata oqo ina vosakudrukudru?

¹³ Ena dau veveka ga na kaukamea. Nida tamata ivalavala ca tale ga, ena dau malele ga na lomada meda vosakudrukudru. Dodonu meda yadrayadravaki tiko da qai qarauna ke via kadre mai lomada. E dau qai totolo sara na veveka ena suasua se wai masima, ena dau totolo tale ga noda via vosakudrukudru nida sotava na veika dredre. Na nuiqawaqawa tale ga e rawa ni vukica e dua na leqa somidi me lai leqa levu. Ni torosobu tiko na ituvaki kei vuravura ena gauna ni ivakataotioti oqo, sa na levu tiko ga mai na ka e rawa ni vakavuna na vosakudrukudru. (2 Timoci 3:​1-5, NW) Rawa ni dua na dauveiqaravi i Jiova e vosakudrukudrutaka e dua tale. De na vu ena dua ga na ka lailai, nona sega ni taleitaka beka e dua na tacida na nona malumalumu e dua tale, se na veika e rawata, se itavi e vakacolati vua.

14, 15. Ke sa tekivu meda dau kudruvaka e so na ka, na cava meda kua ni vakawaletaka kina?

¹⁴ Kevaka e matau vei keda meda dau vakalelewa da qai sega ni cakava kina e dua na ka, sa na rawa ni yaco me tiki ni noda bula na vosakudrukudru. Na vosakudrukudru ena rawa dina ga ni vakaleqai keda. Nira vosakudrukudrutaka na Isireli na bula ena vanualiwa, era lai tini beitaki Jiova sara. (Lako Yani 16:8) Me kua mada ga ni yaco oya vei keda!

¹⁵ Na kaukamea e rawa ni tarovi na kena veveka ke boro ena kena itatarovi, sagai tale ga vakatotolo na vanua lalai era sa tekivu veveka. E rawa tale ga nida lewa na malele ni lomada meda kua ni vosakudrukudru kevaka eda siqema totolo ni bera ni tete, da masulaka, da saga sara meda vakavinakataka. Eda na vakayacora vakacava oqo?

Raica na Ka Mai na Rai i Jiova

16. Na cava meda cakava meda kua kina ni dau vosakudrukudru?

¹⁶ O koya e dau vosakudrukudru e dau nanumi koya ga kei na nona leqa, e sega ni kauaitaka na ka e vakalougatataki kina ni sa yaco me iVakadinadina i Jiova. Eda na sega ni dau kudruvaka na ka kevaka eda dau vakananuma na ka ni veivakalougatataki vaka oqo. Kena ivakaraitaki, eda kalougata kece nida vakatokai sara ga ena yaca i Jiova. (Aisea 43:10) E rawa nida toro voleka vua, e rawa tale ga nida masu vua ena gauna ga eda vinakata, ni ‘daurogo masu’ o koya. (Same 65:2; Jemesa 4:8) E vakainaki na noda bula baleta nida kila ni vakalewa o Setani na veiliutaki i Jiova, eda okata gona me ka dokai na noda saga meda yalodina tiko ga vua na Kalou. (Vosa Vakaibalebale 27:11) Eda rawa ni vakaitavi wasoma ena vunautaki ni itukutuku vinaka ni Matanitu ni Kalou. (Maciu 24:14) E vinaka noda lewaeloma nida vakabauta na isoro ni veivoli i Jisu Karisito. (Joni 3:​16) Oqo na veika eda vakalougatataki kina, e dina nida na vosota voli e levu na ka dredre.

17. Cava meda saga kina meda raica na ka mai na rai i Jiova, kevaka mada ga e tu e so na ka e dodonu me kudruvaki?

¹⁷ Meda saga meda raica na ka mai na rai i Jiova, sega ena noda rai ga. A lagata na daunisame o Tevita: “Kemuni Jiova, mo ni vakatakila mai vei au na nomuni sala; ni vakavulici au e na nomuni lakolako.” (Same 25:4) Ke da kudruvaka e dua na ka e dodonu dina me kudruvaki, kua ni guilecava ni kila tale tiko ga o Jiova. E rawa ni vakadodonutaka na ka ena gauna totolo duadua. Ia, na cava e vakalaiva kina ena so na gauna me yacovi keda tu mada e so na ka dredre? De vakayacora oqo ena nona via vukei keda meda vakavinakataka e so na noda itovo me vaka na yalomalua, dauvosota, vakabauta, kei na vosovoso vakadede.​​—Jemesa 1:​2-4.

18, 19. Vakamacalataka na ka e rawa ni yaco ke da tauri keda tu ga vakamalua da qai sega ni vosakudrukudru ni yaco e so na leqa.

¹⁸ Noda tauri keda tu ga vakamalua da qai sega ni vosakudrukudru ni yaco e so na ka eda vakaleqai kina, ena vakataucokotaka na noda sulumaka na itovo vinaka, ena rawa nira vuli tale ga kina o ira era raica na ka eda sotava. Ena yabaki 2003, era vodo basi e dua na ilawalawa iVakadinadina i Jiova mai Jamani mera lai tiko ena dua na soqo ni tikina e Hungary. E sega ni iVakadinadina i Jiova na draiva ni basi, a sega tale ga ni vinakata me tomani ira voli na iVakadinadina me tini na siga. Ia, e veisau sara ga vakadua na nona vakasama ni sa oti na nona kauti ira voli. Ena vuku ni cava?

¹⁹ E levu sara na leqa e yaco ena nodra ilakolako. Ia, era sega vakadua ni vosakudrukudru na iVakadinadina. Kaya o draiva ni oqo e dua na ilala pasidia vinaka duadua e qai bau sotava! Yalataka sara ga o koya ni na vakacurumi ira na iVakadinadina i Jiova ke ra tukituki yani ina nona vale. Era ivakaraitaki vinaka dina na pasidia oqo ena nodra ‘sega ni cakava e dua na ka ena vosakudrukudru’!

Rawati na Duavata ena Veivosovosoti

20. Na cava meda dau veivosoti kina?

²⁰ Vakacava ke da sega ni taleitaka e dua na ka me baleta e dua na tacida vakayalo? Ke mani bibi, e dodonu meda muria na idusidusi e volai ena Maciu 18:​15-​17. Ia, levu na gauna e sega ni gadrevi oqo, baleta ni dau yaco ga na leqa lalai. O koya gona, vakacava mo vakayagataka na ituvaki vaka oqori mo vulica kina na veivosoti? E vola o Paula: “Dou veivosoti vakai kemudou, ka kakua ni veicudruvi, kevaka sa dua na ka sa rarawa kina e dua; me vaka sa sega ni cudruvi kemudou . . . [“o Jiova,” NW], mo dou vaka talega kina. Ia me liu e na ka kecega oqo na dauloloma, o koya sai vau vinaka sara.” (Kolosa 3:​13, 14) Eda dau yalorawarawa beka meda veivosoti? Sega li nida dau cakava e levu na ka e dodonu me vosakudrukudru kina o Jiova? Ia, e sega ni cakava oya, e lomani keda ga, e vosoti keda.

21. Cava e rawa nira cakava o ira era rogoca na noda vosakudrukudru?

²¹ Se mani cava eda rarawataka, ena sega ni wali oqori ena vosakudrukudru. Na vosa vakaIperiu e vakadewataki me “vosakudrukudru” e rawa ni kena ibalebale tale ga na “vosavosa.” Eda dau sega ni taleitaki ira na dau vosakudrukudru, eda dau yawaki ira. Oqo tale ga na ka era na cakava na tiko tikivi keda kevaka eda dau vosakudrukudru se vosavosa. Rawa nira sa tekivu yawaki keda sara ga! Era na kauai beka e so nira rogoca noda vosavosa, ia ena sega sara ga ni dua e uqeti na lomana me toro voleka mai vei keda.

22. Cava e kaya e dua na goneyalewa me baleti keda na iVakadinadina i Jiova?

²² Na veivosoti ena rawati kina na duavata​​—e dua na ka vakamareqeti vei keda na tamata i Jiova. (Same 133:​1-3) Ena dua na vanua mai Urope, a volavola e dua na goneyalewa lotu Katolika yabaki 17 ina valenivolavola ni tabana ni iVakadinadina i Jiova me vakaraitaka kina nona qoroi ira. E kaya: “Oqo duadua ga na isoqosoqo au kila era sega ni veitawasei na lewena ena veicati, kocokoco, duiyaloyalo, nanumi koya ga, se veisei.”

23. Na cava eda na dikeva ena ulutaga e tarava?

²³ Noda vakamuduotaka na veika vakayalo e vakalougatataki keda kina na Kalou dina o Jiova, ena vukei keda meda vakatetea yani na duavata, meda kua tale ga ni vosakudrukudrutaki ira na tani ena ka e nodra ga. Na ulutaga e tarava ena vakaraitaka na sala e yaga kina vei keda na itovo vakalou ena noda tarovi keda mai na dua tale na mataqali vosakudrukudru​​—noda vosakudrukudrutaka na isoqosoqo i Jiova e vuravura.

O se Nanuma?

• Vakamacalataka na veika e okati ena vosakudrukudru.

• Vosa vakatautauvata cava e vakaraitaka vinaka na ka e rawa ni yaco ena vuku ni vosakudrukudru?

• Na cava meda cakava ke da siqema ni sa via malele na lomada meda vosakudrukudru?

• Ena tarovi keda vakacava mai na vosakudrukudru na noda tu vakarau meda veivosoti?

[iYaloyalo ena tabana e 14]

Era vosakudrukudrutaki Jiova sara ga na Isireli!

[iYaloyalo ena tabana e 17]

O dau saga beka mo raica na ka mai na rai i Jiova?

[iYaloyalo ena tabana e 18]

Ena rawati na duavata vakarisito ena veivosovosoti